16-муьн январь, сервор Догъисту Сергей Меликов кор сохди э Дербенд ве Дербенди район. Рэхьбер регион фегьм сохди социальни объектгьо, гировунди жерге вохурдеигьо, гоф сохди э зигьисдегоргьоревоз, пуьруьш сохди э нушудорегоргьоревоз органгьо хьуькуьм омборетарафлуье параменди Дербенде.
Эзуш бэгъэй, Сергей Меликов фегьм сохди хокорубэхшсохдение комплекс ве полигон, коминигьо мибу бедел гуьнжолуьи руйбиреи э ТКО, коминики имбуруз гуьнжуьнде оморе э Догъисту.
Суьфдеи кор Сергей Меликов гlуьзет сохди ёргири догъистуни командире Эрика Селимова.
Полковник ве эну гердундегормошин Равшан Селимов телеф бирет э сергири январь э ДТП э вэхд веровундеи гъовхои везифегьо. Сервор республике венори гуьл эки гъоврегьой эн угьо э ватан довгlогъуллугъсохгьо, э Дербенди район.
Эзуновлейге Сергей Меликов дори э гъовумгьой Эрик Селимов медаль «Эри нушудореи мердьети», коминиревоз командир бири бэхшире эз уьлуьм эулое. У бирмунди э хьэвесевоз гьеммишелуьг э ёргири гьишдеи игиде: гьемшегьери школере миё бу доре нум энуре ве поюнде э жиге ю бюст.
Э Дербенди район сервор Догъисту вохурди э сэхьибгьой консервни завуд ООО «ПОШ» Павел Тарасов ве Тавархан Пашаев.
Компания омборте пенж сал мол ведешенде хуьшге помодур, домбул, фуьлфуьл, мури ве зейтун э брендевоз «Enjoy food». Гьемме мол хьозуьр сохде оморени эз экологически темизе хоме мол, кошде веровундигьо э сэхьиблуье сэхьрогьо э Догъисту.
Гьеймогьоине корхоне гьисди э Магарамкентски район. Гъувотлуьи эну гуьнжуьндени экуьнди 80 гьозор бонкегьо э мегь. Мол фуьрсоре оморени э е ченд регионгьой Уруссиет.
Э вохурдеи пуьруьш сохде омори везифегьо компание дорунде э республике зейтундори богъ мейдоневоз 50 гектаргьо ве вокурде цех э молведешендеи зейтуни руьгъэн. Гъэдер инвестиций гуьнжуьндени экуьнди 300 млн монет, мибу э гуьнжо овурде экуьнди 100 жиге кор. Компание хьозуьри эз хьисоб хуьшде данани доре биёвгьо гьемкоркигьоре.
Гьисди везифе э гуьнжо овурде молведешендеи пурлуье е гъэдер – эз дошде веровунде хоме мол те хьозур сохде зейтуни руьгъэн, комини мибу э кор венгесде эри молведешенде хуьшге хьэвуьжгьо.
Корсохдегор барасилуь дошде ведировунди суьфдеи бедел.
Сервор республике мейл гирди хьэвес пул дорегоре. «Проект эри иму мерэгълуьи. Э рынок гьисди пуьрсиреи э ижире мэхьсуьл. Гузет сохде эз ишму хэёллуье гъэрорномегьо ве нушудореи проект. Песде фегьм мисохим минкине тегьер кумекии дореи», — гуфдири Сергей Меликов.
Э ёр овурденим, зуте э рамке ПМЭФ бири гъулкешире оморе разименди э компаниеревоз «ISFA» э товун дешендеи богъ ве вокурдеи завуд.
Э Дербенд сервор регион вохурди э зигьисдегоргьоревоз куьгьне омборетебэгъэи хуне э куче Свердлов.
Пенжтебэгъэи вокурдеи вокурде омори э 1972-муьн сал ве хьисоб сохде 78 хуне. Гьейсэгlэт хуне куьгьне бири ве михьтожлуьи э гъуьчсохи. Э и хогьиширевоз чендгъэдерие руйбиреи зигьисдегоргьо.
Э жиге ю сервор республике те эхир гуш дошди руйбиреи сэхьибгьой хунегьоре ве гъуллугъ дори э куьндлуье вэхд хьозуьр сохде проект капитальни гъуьчсохи. Везифе норе омори тозеден гъуьчсохи фасад ве бун, э гуьнжо овурдеи гьомбори жигегьоре, дегиш сохдеи инженери коммуникацигьоре, хубте сохде иловлей хунеи мескен.
Э гъэдимие шегьер э бэхшвегири сервор регион бири вокурде оморе тозе гlэили богъче э 250 жиге.
Сетебэгъэи гlэили богъче веровурд сохде омори э 250 гlэилгьо – гье у 14 десде, э у хьисоб дуь десде гlэилхоне. Сервор республике гоф сохди э гьемкоркигьоревоз ве гlэилгьоревоз, фегьм сохди хурекхонере, возисохе утогъгьоре, екиге утогъгьоре.
Э гlэили богъчере гьисди музыкеи ве физкультури утогъгьо, э лифтевоз ве пандусгьоревоз. Мескен э иловле оводуне сохде омори: э жиге ю норе омори спортивни ве возисохе мейдонгьо, чордогъ тэхдеи.
Ханлар Пашабеков э ёр овурди, чуьки э гьонине вэхд э Дербенд вокурде оморени пенж гlэили богъчегьо э гъэдеревоз 890 жиге, чуь руьхсет доре э 2027-муьн сал нисд сохде гьисдигьо нубот э гlэили богъчегьо шегьер.
Гье э у руз Сергей Меликов фегьм сохди хокорубэхшсохдение завуд ве полигон. Э имбурузине руз вокурдеи комплекс миё бу варасде оморе. Оборудование барасилуь фегьм сохде омори ве хьозуьри эри э кор венгесдеи. Э пушо – эхирлуье технически коргьо, оводуне сохдеи мескенгьоре, бегьем сохдеи вокурдеи полигоне ве бегьем э кор венгесдеи комплексгьоре.
Завуд э гьеймогьоине оборудованиеревоз э пурлуье гъувотлуьиревоз мидануь бэхш сохде э жире гуьре, пеймуней гурунди ве мол те 200 гьозор тонн ТКО э сал. Ведешенде хоме мол мибу фуьрсоре оморе эри песдеине кор сохдеи. Тоннгьой хокоруре э тегьер макулатуре, шише, пластик ве гьовун мибу дуьимуьн зиндегуни.
Хокору, дуьимуьн гиле минкинсуьз э кор венгесде, мибу битехьэим сохде оморе заралсуьз эри ведебурра иловле.
Э гирошдигьо орине Сергей Меликов гировунди гуьрдлеме э товун пуьрсуьшгьо э кор венгесдеи системе руйбиреи э ТКО э Догъисту, э коминики сервор республике гуфдири, чуьки э гье и сал гьемме вокурде оморигьо объектгьо мибу бегьем варасде.
Э ёр овурденим, э республике вокурде оморени шеш объектгьо э кор венгесдеи хокоругьоре – гье и хокорубэхшсохдение комплексгьо э Хасавюртовски, Карабудахкентски ве Дербенди районгьо ве полигонгьо э Хасавюртовски, Кумторкалински ве Дербенди районгьо.
Корисохе рафдеи бегьем бири гуьрдлемеревоз э рэхьбергьоревоз муниципальни соводи, э коминики э у хьисоб бири пуьруьшсохи рэхь омборежиреи параменди Дербенде.
Э ёр овурденим, чуьки программа параменди Дербенде мибу гировунде те 2030-муьн сал э хотур кумекии дореи хуьшдени ю президент вилеет Владимир Путин ве дуь э екиревоз корисохи региональни хьуькуьм ве Минэкономпараменди РФ.
