Э зир рэхьбери премьер-министр Догъисту гирошди эхирлуье э 2025-муьн сал гуьрдлеме эн Хьуькуьм Республике.
Э кор рузине план дешенде омори жерге пуьрсуьшгьо: корисохи э тозе сохдеи эшгълуье рэхь мошини пассажири рэхь; арт веровундеи э 2025-муьн сал Гъэрорноме Хьуькуьм Догъисту РД эз 30-муьн январь 2025-муьн сал №10 «Э товун тогlинноме жерге кор, э жиге овурде оморе органгьоревоз веровундение кор хьуькуьм РД э гъэршуй корисохи зулумкори э мескен Республике Догъисту»; барасигьо вечирение кампание ве хьозуьр сохдеи эз онгур гьерчуь бисдо э 2025-муьн сал; корисохи э нореи жугьобдорлуьгоре, зеверсохи барасилуьире ве э гъэршуй кори сохдеи гъонунсуьзе нушудореи э ихдиёри дореи ве э кор венгесдеи кумекиире.
Гьечуь, корсохгьо кабмин пуьруьш сохдет барасигьо вечиренигьо кампание ве хьозуьр сохдеи эз онгур гьерчуь бисдо э 2025-муьн сал. Не денишире э зобуне гьовой рузгор э сентябрь 2025-муьн сал ве ворушгьо, онгурбогъдоргьо дануьсди неки дошде ведировунде, оммо ве екем зевер сохди гъэдер бегьере э той сохдеи бирмунушигьо гьевелине сал.
Премьер-министр РД мэгlлуьм сохди, чуьки Догъисту суьфдеини э вечиреи бегьер ве мейдонгьо онгурбогъ э Уруссиет, эз Краснодари дигьбон бэгъэй. Эз жэгlмие мейдон онгурбогъгьо э Уруссиети Федерацие – 105 гьозор га, омборте чоримуьн бэхш – 26% енебуге 27,6 гьозор га – гьисди эн Республике Догъисту. Э имбурузине руз бегьер вечире омори – омборте 302 гьозор тонн.
Э товун барасигьо вечиренигьо кампание э вэхд гирошдеи гуьрдлеме э премьер-министр регион мэгlлуьм сохди сернуьш Комитет э онгурбогъдори ве мол ичкуи рэхьберсохи РД Шериф Керимханов.
Эз гофгьой эну, э республике э кор венесде омори 4 дуьруьжде инвестпроект э кошде веровунде онгурбогъгьо, разилуьи коминигьоре э вэхд 2024-2026-муьн салгьо миё бу дешендеи экуьнди 1354,8 га тозе онгурбогъгьо. Э имбурузине руз дешенде омори омборте 525 га э дугълеи гlовдореиревоз. Гъэдер доре оморе пулгьо зевер сохде омори 1 млрд 420 млн монет э гуьнжолуьиревоз омборте 200 гьеммишеине корисохи жигегьо.
Э гъэд угьо проект АО «Кизлярски коньячни завуд» «Дешендеи онгурбогъгьо э мейдон 311 га э Дербенди дигьбон РД», э рамка комини э жиге овурди дешендеи жогьиле онгурбогъгьо э мейдон 245,3 га. Хьэвесгоргьо проект э дешендеи онгурбогъгьо э дугълеи гlовдореиревоз 572 га э дигь Митаги-Казмаляр Дербенди район бирмунуши ООО «Каспийская лоза», бири кошде оморе офтолуье гуьле э мейдон 150 га. ООО «Дербенд шороб» э кор венгесде проект э дешенде онгурбогъгьо э дугълеи гlовдореиревоз э хории муьлк мейдоневоз 331,8 га э дигь Джалган Дербенди район. АО «Кизлярски коньячни завуд» миё бу дешенде оморе онгурбогъгьо э мейдон 140 га э Кизлярски район, гъэдер хэржилугьи, разилуьи э бизнес-планевоз, гуьнжуьндени 255 млн монет.
«Э биёвгьо сал Комитетовоз миё бу э кор венгесде дуь инвестпроект э вокурдеи онгуригьомбор мощностьгьо комини мибу 1000 тонн э Дербенди район – агрофирма «Татляр» ве Каякентски – СПОК «Гъирмизинепартизански», кор венгесдеи комигьо рухсет доре зеверсохи мощность э дошдеи онгуре ве бинелуье гъэдер векенде четинигьо агрологистике», гуфдири Шериф Керимханов.
Э гуьрдлеме Хьуькуьм Догъисту гьемиге бири бирмунуши генеральни сервор агрохолдинг «Татляр» э Дербенди район Яхья Гаджиев.
Эз гофгьой эну, онгурбогъдори рафде расири дуьруьжде барасилуье бегьер э гьеммей республике.
«300 тонн онгур иму вечирейм э 2003-2004-муьн салгьо, гьеймогьой – омборте 20 гьозор тонн. Фикир сохит, э имбурузине руз э сезон вечиреи бирени гьеле 1000 корсохгьо. Иму дорейм корисохи жигегьо, дорейм минкин эри корисохи хэлгъ»,- гlуьзет сохди генсервор агрохолдинг.
Э гуьрдлеме кабинет министргьо РД жейле пуьруьш сохдет пуьрсуьшгьо артгьо веровундеи э 2025-муьн сал Гъэрорноме Хьуькуьм РД эз 30-муьн январь 2025-муьн сал №10 «Э товун тогlинноме жерге кор, э жиге овурде оморе органгьоревоз веровундение кор хьуькуьм РД э гъэршуй корисохи зулумкори э мескен Республике Догъисту».
Чуьтам гlуьзет сохди Абдулмуслим Абдулмуслимов, э гъосут гъэршуй корисохи гье и терсдиигьо э федеральни ве республикани риз гъэдерлуьи гъобул сохде омори жерге программни документгьо, э гъэрор нореи Сервор Республике Догъисту э гуьнжо овурде омори корисохи десде э веровундеи Омборежирелуье план гъэршуй корисохи гlилм эн жейлее хэёл зулумкори э Уруссиет э 2024-2028-муьн салгьо э Республике Догъисту.
«Хьуькуьмевоз республике тогlин сохде омори нуботноме эз 11 жерге кор, э жиге овурде республикани органгьоревоз веровундение хьуькуьм э гъэршуй корисохи зулумкори э мескен республике, веровунде оморе екиге жерге коргьо, гьисдигьо э зофру сохдеи социальни базе зулумкори.
Гировунде жерге кор миё бу веровунде оморе гуьрд сохдеиревоз бинере ве э кор венгесдеи гьемме минкине системегьо соводи, жовоне политике ве культуре, гьевел э гъэножогъи у жире хэлгъ, коминигьо омборте гъувотсусуьзи эри корисохи жейлее хэёл зулумкори ве фикир неонацизм э гъосут зуте мэгlлуьм сохдеи гьинорменди угьоре»,- гуфдири у.
Э гуьрдлеме э гьисдигьо пуьрсуьш бирмунуши сервор Миннаца, Минобргlилми, Минжовонгьо ве МЧС РД.
Бегьем сохдеи эхирлуье э 2025-муьн сал гуьрдлеме Хьуькуьм РД, премьер-министр регион Абдулмуслим Абдулмуслимов согъбоши гуфдири э рэхьбергьой министерств ве хьуькуьм э гировунде кор э социально-экономически параменди республике.
