Э гIэрей еклуье гуьрдлеме эн Республикански э лешгер оголзеренигьо комиссие ве эн Зутее штаб эн Республикей Догъисту, гирошди э зир рэхьберьети эн Сервор Догъисту Сергей Меликов. Э гуьрдлеме пуьруьш сохде оморебу вожиблуье пуьрсуьшгьо, расиренигьо э одомигьо огол зере оморенуьтгьо э лешгер ве мерэгълуь сохдеи угьоре эки гирошдеи гъуллугъире э игъролноме гуьре э Ерэгъленмише Гъувотгьо эн Уруссиетлуье Федерацие.
Сергей Меликов гуфди, ки оголзеренигьо компание э республике гировунде оморени э вэхди ю. У э ер овурди э товун тозеивенгесдеигьо, комигьоки сер мигируьт кор сохде эз салигеревоз ве минкин миду гировунде оголзереире э лешгерие гъуллугъи согъ сал. И бирмундени, ки мероприятиегьо, ологълуь гьисдигьо э оголзереиревоз э лешгер, ижирегьоре чуьн медицински фегьмсохи ве гуьрдлемей эн оголзеренигьо комиссиере, имогьой гIэмел миев гировунде согъ сал, эз 10-муьн-31-муьн декабрь. Оммо оголзерегоргьо э лешгер фуьрсоре миев гьевелире хуно э дуь гIэдотлуье вэхд.
Вожиблуье жирелуьи эн оголзереи э лешгер бири э кор венгесдеи мэгIлуьметие системере эн «Еклуье нуботноме эн лешгерие хьисобсохи»: э гуьнжо овурдеи электронни повесткегьоре ве фуьрсореи мэгIлуьметигьоре э товун энугьо э оголзерегоргьо э лешгер эз портал хьуькуьметлуье гъуллугъигьо. Лешгерие комиссар эн республике Абдурахман Мурадханов бирмунди мэгIлуьметире э товун кор эн оголзеренигьо комиссиегьо эн муниципальни районгьоре ве шегьерлуье иловлегьоре, гьемчуьн э товун барасигьо фуьрсореи одомигьоре э лешгерие гъуллугъи э ноябрь эн 2025-муьн сал. У гуфди, ки фуьрсореи оголзерегоргьоре э лешгер гирошдени э план гуьре.
Гьемчуьн гуфдире оморебу, ки э Догъисту поизине оголзереи одомигьоре э лешгерие гъуллугъи веровунде омори э 100% эз вэхд зуте. Гьемме фуьрсоре омори эз 3 гьозор оголзерегоргьо омбарте, э и хьисоб эз 2,5 гьозор одомигьо омбарте – э Ерэгъленмише Гъувотгьо эн Уруссиетлуье федерацие.
Кимигьо лешгерие комиссариатгьо эз вэхд зуте веровундет тапшуьрмишигьой хуьшдере. Барасилуь веровундет везифере Хунзахски ве Тарумовски районгьо. Гьемчуьн эз вэхд зуте доренуьт э лешгер оголзерегоргьоре Махачкале, Дербенд, Догъистонлуье Огни, Кизляр, Дорум-Сухокумск, Дербентски, Кизлярски ве Бабаюртовски райнгьо.
Э гуьрдлеме фегьм схде оморебу пуьрсуьш хьозуьрлуьгъи одомигьо э лешгерие-хьисобсохие сенигIэтгьо э соводие идорегьо эн региональни отделениегьо эн ДОСААФ.
Сервор регион гуфдиребу, ки гьемметарафлуье хьозуьр сохдеи жовонгьоре эки гъуллугъи э лешгер – и вожиблуье пойнореини эки муьхькем сохдеи хьозуьрбиреи вилеете ве параменд сохдеи сенигIэтлуье вердушигьоре э мибугьо гъэлхэндчигьой иму.
Гьееки э уревоз, э гофгьой эн сервор регион гуьре, вегуьрде лешгерие сенигIэте э пушой жовоне одомигьо вокурдени тозе минкингьо, бирмунденки мэгIнолуьи эн теоголзеренигьо хьозуьрлуьгъире.
Э гофгьой эн военком республике гуьре, тапшуьрмиши эри хьозуьрлуьгъи э суьфдеи вэхд эн 2025-муьн-2026-муьн хунденигьо сал гуьнжуьнде омори 456 одоми, эз комигьоки вихде омори 366.
Эри мерэгълуь сохдеи жовонгьоре е жерге пуьрсуьшгьо гъэрор сохде омори, э и хьисоб пул дореи эри кирой хуне. Лешгерие комиссар меслэхьэти дори: ихдилот сохде э могьлугъ э товун верзуьшигьой хундеи э РО ДОСААФ гьовои; сернуьшгьой оголзеренигьо комиссиегьоре гьееки э лешгерие комиссаргьоревоз эн шегьерлуье иловлегьо ве эн муниципальни районгьо гереки вегуьрде э назари хуьшде вихдеире ве хуте сохдеи курсантгьоре э автошколегьо.
Сернуьш региональни отделение эн ДОСААФ Шамиль Алиев ихдилот сохди, ки э имбурузине руз отделениегьо одомигьоре хуте сохдени э хьофд соводие идорегьой республике. Эри гирошдигьо хунденигьо 2024-муьн-2025-муьн сал хундет ве экзаменгьоре дорет 780 одоми.
Сергей Меликов гуфдиребу, ки гереки хубте сохде хунденигьо-моллуье биней идорере. Э гофгьой эн сервор регион гуьре, гереки омбаре тигъэт доре э хьозуьрлуьгъи жовонгьо, сер гуьрде эз риз муниципалитетгьо. У э ер овурди э товун э гуьнжо овурдеи классгьоре эри кор сохдеи э беспилотникгьоревоз э е жерге регионгьо.
