Пушобергьой эн жэгIмиет дин-догIоти эн жугьургьой Уруссиет омбаракбу сохдет диндошдегоргьоре э Хьэнукоиревоз, гуфдиренки, ки и мигIид э ер овурдени э товун несигIэтие гъэрорноме ве э товун гьисгьой эн верзуьшлуьи хуьшде.
Хьэнукои, еки эз вожиблуье мигIидгьой жугьургьо, сер гуьрде оморени эз вэхд нуьшдеи Чуьшме 14-муьн декабрь.
«Келетегьой иму э хотур нум Офирегор голхмиши гировундет э гъэршуй эн лап келе хьуькуьмет эн гъэдимие гIуьлом. Гьечи, омбарегъэдерлуье лешгер «Хашмонаим» дербедогъун сохди лешгер эн битпересгьоре… Чуьтам гурунд не бисдоге – десгьоре фушунде герек нисди, ве гьер руз гереки сохде омбарте, эз гирошдигьо руз. Муьгlуьжуьзлуье гъувот эз Офирегор веди бирени гьэгъигъэт умогьой, кейки хуьшдени туь сохдени гьеммере, чуьре дануьсдни, кейки хуьшдени туь гьеммише рафдени э пушово ве э зевер»,- гуфдире оморени э омбаракбуи э Тelegram-канал эн серворлуье раби эн Уруссиет Берл Лазар.
Президент Федерацие эн жэгIмиет дин-догIоти эн жугьургьой Уруссиет (ФЕОР), раби Александр Борода гуфдири, ки Хьэнукои э ер овурдени несигIэтие вихдеи, поисдигьо э пушой гьер одоми. «Гъолхмиши Макеевгьо ве муьгIуьжуьзи Хьэнокуи бирмунденуьт, чуь, эгенер одоми нушу дорени эри дузе кор, гьемме гъувотгьой хуьшдере фуьрсорени эри расиреи э везифе, у неки вегуьрдени гъувот эз зевер, оммо ве вихдени гъисмет хуьшдере. Э II-муьн девр те деврон иму вихдеи поисдебу гьечуь: муьди бошимге э гIилм эн жейлее хэел эн кесгьо, нэгI сохде герекиге эз у, э чуь туь бовор сохдени, енебуге бире азадлуье одоми, вихденигьо уре, чуьтам у мизию. И вихдеи э жир-бе-жире регионгьо бежид поисдени э пушой гьер одоми, ве ме хосденуьм, чуьнки товуш эн гIэтош Хьэнукои дегесуьнуь гъувоте э жуьн ишму», — гуфдире оморени э омбаракбуи Борода эки жигIметгьой дин-догIоти.
Хьэнукои – зимисдуне мигIид эн товуши, эн азадини ве гирошдеи эз гьемме синемишигьо, ве эри гьеймогьине эрхэгьо у еровурдини э товун гьисгьо эн верзуьшлуьи хуьшде ве э товун ихдиери зигьисде э гуьрей боворинигьо ве гIэдотгьой хуьшде, гуфдире оморени э омбаракбуи президент эн ГIэрейхэлгъие фонд эн жугьургьой догъи эн Герман Захарьяев.
«Товуш шэгIмгьо бирмундени тозеден биреи жуьне ве войгере эки динлуье зиндегуни. Гьер шев шиновусде оморени борухо сохдеигьо ве ихдилот сохде оморени гъозие эн Маккавейски гъолхмиши, э биевгьо эрхэгьо э ер овурденки э товун вожиблуьи ергири ве дошдеи торихлуье ологъире. Бешгъэй гировундеи мигIиде э хуне, гьисди вожиблуье синогъи «э хэлгъ фирегь мэгIлуьм сохдеи муьгIуьжуьзе», омбаргьо лампегьоре норенуьт э ен пенжерегьо, эри бирмунде э иловле бирегоргьо рачи ве мэгIнолуьи Хьэнукоире», — гуфдири Герман Захурьяев.
Хьэнукои гIуьзет сохде омори э муьгIужуьзи, комики бири борухо сохденки дуьимуьн Иерусалимки битемигъдоше бэгъдовой бесгъуни эн серворлуье лешгерчи эн жугьргьо Ииду Маккавей э сер лешгергьой парчогь эн эллинистически Сирие Антиох Эпифан э 164-муьн сал те деврон иму. Руьгъэне, герек гьисдигьо эри дегесунде лампей битемигъдоше, дуьшменгьо муьрдал сохдет. Жугьургьо офдет энжэгъ е кузей «темизе» руьгъэне. У миест вес сохде гьемме эри е шеви-рузи, оммо э мугIуьжуьзе тегьеревоз вес бири эри хьэшд рузгьой сухундеи минорере: гьэгъигъэт эри эни вэхд, комики герек бу эри хьозуьр сохдеи тозе, темизе руьгъэне.
Вегуьрде омори эз РИА Новости
Тержуьме сохди Ягудаева О.
