Имисал э луьвэхь урусси гуьре мэгIлуьммей мигIид Рош-А-шана офдори э 22-муьн сентябрь. Рузгьой мигIид 23-24-муьн сентябрь.
Э и руз хьэсуьл омори Одом. Ве гье э и руз пузмиш сохди доре гъэдэгъэире, комиреки дори э у Офирегор ве у дивун сохде омори э ведекирдеиревоз эз генгIидим. И бу суьфдеи Рош-А-шана, ве э у вэхд гирошди суьфдеи дивун э сер одоми. Эз умогьоевоз гьер сал э и руз Офирегор гировундени дивун хуьшдере э сер одомигьо, гъэрор сохде, чуь мие бу э одомигьоревоз ве хэлгъгьоревоз э оморенигьо сал.
Сер гуьрдеи тозе сал 22-муьн сентябрь гIэдоти гуфдире дуь эз еки э мердгьо «Лешана това тикатев ветехатем». Э зенгьо гуфдиренуьт «Лешана това тикатви ветехатми». МэгIэной эни гофгьо ижиреи: «Нуьвуьсде биевош туь э шоре сал, ве и нуьвуьсдеи муьхькем сохде биев э муьгьуьр Офирегоревоз!».
Э вэхд суьфдеи шевине мигIидлуье хурекхурдеи э Рош-А-шана дошде оморени е жерге гIэдотгьо, комигьоки нушу доренуьт войгере верзуьшлуь бире э шоре тозе сал. Бэгъдовой гъэдуши э сер нун суьфдеи кесег нуне э муьнуьк нисе дезеренуьт, дезеренуьт э гIэсел. Песде вегуьрденуьт е тике ширине сибе ве дезеренуьт уре э гIэсел ве гуфдиренуьт гофгьой тефилоре.
ГIэзизе хундегоргьойму, эз дуьли омбаракбу сохденим ишмуре э динлуье мигIид имуревоз Рош-а-шана! Эз Рош-А-шана сер гуьрдени тозе чэрх луьвэхь егьуди, нушу доре оморени руз хьэсуьл омореи дуьньегь ве бегьем сохде оморени гирошдение сал. Хьозур биреки эки Тозе сал иму фикир дореним э товун биевгьо, гьеркиму ниет сохдени эри бире шолуми, разименди ве жунсогъи. Имбуруз иму гировунденим артгьой гирошде оморенигьо сале ве гуьнжуьнденим гъэдергьо э биевгьо сал. Иму дореним гъимет эри сохде коргьой хуьшде, вегуьрденим бэхшлемишире. Э и рузгьо иму омбарте эз девэхдиге терсиреним сохде беди енебуге зарали э кесиге ве хьэрэкети дореним дузов сохде, тэхсир хуьшдере э пушой эну одоми, кире иму нехэбереки енебуге бедниет гъэгьр дорейм, бири дуьлмуьнде эз иму. Э рузгьой тозе сал гьеркире эз иму доре оморени минкини дегиш сохде зиндегуни хуьшдере э хубтее тараф ве гъобул сохде хубе нувусдеире э Китоб ГIуьмуьри эри салиге.
ГIэзизе хундегоргьо, иму омбаракбу сохденим ишмуре э Тозе салевоз ве хосденим эри гьеркишму мозоллуье ве ширинлуье сале. Э гьемме шоре салгьо расошит гIэзизе егъудигьо. Метлебгьошмуре Худо веровуно!
