17-муьн сентябрь э Дербенд гировунде оморебу еровурдие шев, гIузет сохде оморигьо э 75-сали эз руз хьэсуьл омореи Лев Яковлевич Манахимовэн – зигьимлуье вежегьисдегор, тербиедорегор, рэхьбер ве биненорегор эн ансабль «Пируэт». Эри эну сегьне ве вежегь-вежегь бу неки сенигIэт, оммо хуьшдени зиндегуни. У эз гIэрей зиндегуни лап зу рафди, э четине салгьой пандемие, гьишденки э дуьлгьой куьнде одомигьо ве эн хундегоргьо очугъэ нишоне, ве э базурге зиндегуни шегьер – гIошире мироси.
Шеве гировундебу сервор эн идорей базургенди, эн жовоне политике ве идмон эн администрцие эн шегьер Дербенд Самиля Наджафове. Гофгьой эну гуфдире оморебу лап герм, эхи у лап хуб дануьсдембу Лев Яковлевиче ве бугъолуье гъимет дорембу мэгIрифет энуре. У бу бигIэдотлуье одоми, тербиедорегор, дануьсдембу дегесуьнде дуьлгьой хундегоргьоре, ве возирегор, комики дануьсдембу расунде те томошесохдегор лап бинелуьире – рачи ве жуьн эн хэлгъие мэгIрифете»,- гуфди у.
Мероприятие кура сохди гьемкоркигьоре, хундегоргьоре, хьовиргьоре ве одомигьой шегьере, оморетгьо гIуьзет сохде еровурди усдоре. Одомигьо ихдилот сохдебируьт э товун Лев Яковлевич чуьн э товун дуьлфирегьуне одоми, комики гьеммише хьозуьри кумеки сохде. Хундегор эну, гьеймогьине художественни рэхьбер эн ансабль «Пируэт» Нариман Джабаров, гуфди: «Э гьер жуьмуьсдеи эн вежегьисдегоргьой иму зигьисдени школей эну. Нубогьой эну – и неки техникеи, и варасиреи, ки вежегь-вежегь мие из дуьли бу».
Десдей «Пируэт» эн Хуней творчество «Жасмин» э гъуногъгьо бирмунди миллетлуье вежегь-вежегьо, гьерки эз комики томошесохдегоре гуйге вогордундембу э у вэхдгьо, кейки десдере рэхьбери сохдебу биненорегор эну.
Возирегоргьой эн муниципальни татски (догълуье-жугуьрие) театр, комиреки доре омори нум эн мэгIлуьмлуье вежегьисдегор, бирмундет е кесег томошере «Песшмуни нехундеи» э зугьун тати., э унжоЛев Яковлевич кеиге возиребу бинелуье рол. Беврлуье вози эну ве сегьнее мерэгълуьи те имогьоиш мунди э ер эн гьемкоркигьо ве эн хьэзоморегоргьой мэгIрифет. Жирелуье жиге э программе вегуьрди музыкальни блок, бенд гьисдигьо э кифлет Лев Яковлевичевоз. Духдер эну, мэгIлуьмлуье уруссиетлуье мэгIнихундегор Жасмин, не дануьсди оморе э шев э сереботи омбаре кор, оммо у фуьрсори герме руйбиреи эки гьемватанигьо.
У гуфди, ки еровурди э товун бебей эну зиндеи э дуьлгьой омбаргьо, ве диеш гуфди, ки эри эну жейле бугъолуьни гьис сохде и ологъгьо эз дури. Шиновуьсде оморебу еки эз тозе мэгIнигьой эну, ве зол вохурди уре э жирелуье хьэвеслуьиревоз.
Возирегоргьой театр Лауре Изгияеве ве Христине Абдуллаеве хундет мэгIнигьо э зугьун тати, пур гьисдигьо э гермиревоз ве мугьбетевоз. Дуьлшоре музык эн нагар э сер комики зеребу тербиедорегор эн ГIэилие музыклуье школе №2 Нариман Заманов ве хундегоргьой эну бири гьэгъигъэтлуье рачи шев. Эз гьовол хьэз оморембу ве Лев Яковлевиче – у неки бежид э кор венгесдембу гьовой энуре э томошегьой хуьшде, оммо ве хуьшдени ю возирембу э сер нагаре. Эзу товун нушудии шиновуьсде омори чуьн гIузет сохдеи еровурди усдоре.
Оммо мэгIнихундегоргьой эн муниципальни ансабль «Дербент» Наиля ве Наиде Шихмурадовгьо ве Ислам Велиханов – хундет мэгIнигьо э товун Дербенд ве Догъисту, гуйге бирмундебируьт, ки мугьбеет эки гIэзизе улке бу еки эз бинелуье хосиетгьо эн Лев Яковлевич, ве у дануьсди доре уре э несигIэтвегирдегоргьой хуьшде.
Шев еровурди бири неки юбилей, оммо гъобулсохи гьеммере, чуь сохди Лев Яковлевич эри базургенди эн гIэзизе шегьер. Мироси эну зиндеи – э гофгьой эн рази гьисдуьтгьо хундегоргьо, э вежегь-вежегьгьо, э музык ве э дуьлгьой эн одомигьой шегьер. Гьечи еровурди э товун усдо мундени э имуревоз, гъэриш биренки э торих ве руьхь Дербендевоз.
Нуьвуьсди Джамиля Ибрагимова
Тержуьме сохди Ильягуева А.
