Артгьо гьевелие хундение сале, бинелуье везифегьо ве вожиблуьигьо э пушо дерие вэхд, тозе гъэнжогъи э гуьнжо овурдеи соводие жирей корисохире… Гьерсалине Августовски гуьрдлеме, гирошдигьо ди э Хуней Дусди, бири жиге эри пуьруьшсохи бинелуье пуьрсуьшгьоре параменди корисохире. Э гъэд корисохигьо, комикигьо гуьрд омборте 1000 тербиедорегоргьоре, сенигIэткоргьоре ве рэхьбергьоре соводие идорегьоре, бири гьемчуьн межлуьс бэхширеи хубе тербиедорегоргьоре.
Вокурденге гуьрдлеме тербиедорегоргьой, Сервор Догъисту Сергей Меликов бирмунди, чуьки э песой песини салгьо э республике вокурде омори 111 школгьо э омборте 40,7 гьозор хундегоре жиге ве 94 бохчей гIэили э 13,4 гьозор жиге. Гировунде омори дуьруьжде гъуьчсохи 374 соводие объектгьоре. Жирелуье тигъэти, эз гофгьой эну, доре оморе гуьрдномере соводире, гIилме ве корхонегьоре.
«Э сер федеральни проекте «Профессионалитет» э Догъисту э гуьнжо овурде омори 2 соводие-корхонее десде «Хозяйствой дигьбони» ве «Сафари». Э угьо дарафди гьеммей идорегьо, комикигьо веровунде хьозуьрлугъи сэнигIэткоргьоре герекие корисохигьоре»,- риз кешири рэхьбер регионе.
У гьемчуьн бирмунди, чуьки э 2026-муьн сал э республике мибу э гуьнжо овурде гене е ченд бинегьо э сер корисохигьо «IТ-технологие»ве «Машиностроение».
«Вожиблуье гьеммеймиллетлуье везифе, комикире иму имбуруз биё веровуним,-гье у ватанхогьие несигIэтдореи жовонгьоре»,- зиёд сохди С.Меликов ве э пушо нори зиёд сохде бэхшвегири нушудорегоргьой идорегьой хьуькуьме э хундеигьо эз е гъэдер «Гофсохдеи э товун вожиблуьи».
«Бирмундеи тигъэти э вожиблуьи гофсохи дуь э екиревоз хундегоргьоре э бэхшвегиргьоревоз лешгерие гъозиегьо. Иму биё ихдилот сохим э гIэилгьо э товун игидие гьемватанигьо эн иму. Эз сергуьрдеи СВО гIуьзетлуье нум Игиде Уруссиети Федерацие доре омори 15 догъистунигьоре»,- э ёр овурд Сервор РД.
Э войгей С.Меликове омборте 60 догъистуние хундегоргьо вегуьрди бэхше 100 гъозор монет.
Э гуьрдлеме рэхьбергьоре регионе бири меслэхьэти дорие ве песдеине зиёдте фирегь сохдеи десдей одомигьоре, комикигьоре гьисди ихдиёри э вегуьрдеи бэхше.
«Эри хьуькуьм вожиблуьи гьер одоми, э жейлеи эз жовоне салгьо мерэгълуьи э хубе хундеи ве параменди. Эз 2021-муьн сале иму муьзде дореним пуллуье бэхше 100 гьозор монет хундегоргьоре э мэгIлуьмлуье соводие барасигьоревоз. Эз гьевелие сал ижире муьзде дореи везифе нори ве эри хундегоргьо, комикигьо вегуьрди э дуь ве омборте экзаменгьо эз 95 гъиметдии»,- гуфдири у.
Гьемме э Догъисту э гирошденигьо сал гъиметдии э 80 баллгьо ве зеверте 1964 коргьо хундегоргьоре 11 классгьоре, эз угьо 34 – э 100 баллгьо. Э федеральни хьуькуьмлуье хэберлуье овгъот э товун Худо доре хьосиетлуьие гIэилгьо деберди гьисдигьоре эки 3,5 гьозор хундегоргьо республике.
Э корисохигьо бири бирмунде, чуьки дегь тербиедорегоргьоре мифуьрсу э 2025-муьн сал э дигьгьо Догъистуре э программе «Земский тербиедорегор «. Угьоре миду евэхдлуье муьзде дореи э 1млн монет. С.Меликов жейле риз кешири, чуьки зевер сохдеи вожиблуьи сэнигIэткори тербиедорегоре – э гъэд вожиблуье везифегьо э корисохигьо соводи.
Гьееки э уревоз вегири неки зевер сохде тигъэти эки гье у сэнигIэткори, оммо ве гъувоте зиёд сохде мерэгъе жовонгьоре эки тербиедореи, мерэгълуь бире э тербиедореие вузгьо э гуьнжо овурдеие, желдие абитуриентгьоре, комикигьо бэгъдовой варасундеи хундеире мирав кор сохде э корисохи соводигьо. Ве гье у кор биё бу сергуьрдеи эз школгьо, хьисоб сохде Сервор республике. У меслэхьэти дори серворгьоре муниципалитетгьоре желди э кор венгесде бесдеи э вузгьоревоз игъролгьоре э товун фуьрсоре оморе хундегоргьоре.
Бирмунде омори гьемчуьн, чуьки э Догъисту зиёд сохдеи везифелуье коре э сер кумекии дореи тербиедорегоргьоре.
Гьечи, эз 2021-муьн сале гирошде бэхьс э дореи бэхшгьоре хубтее тербиедорегоргьоре республикере э песой барасигьо э тербиедореие корисохигьоэ. Эзуш бэгъэй, зевер бири бэхшгьо э песой барасигьо ве суьфдеие жигегьо тербиедорегоргьоре э дуьруьжде сенигIэткорие бэхьсгьо: «Тербиедорегор сали», «НесигIэтдорегор сали», «Хубтее тербиедорегор гъовумлуье зугьуне ве литературере» ве екейгегьо.
Сервор профильни министерстви бири гуфдире э товун эну, чуьки э 2025-муьн сале э республике желди веровунде миллетлуье проектгьо «Жовонгьо ве гIэилгьо» ве «Кифлет». Э гъэд эн угьо берде оморе дуьруьжде вокурдеигьо ве тозеден вокурдеи соводие объектгьоре.
Гьечи, уже сер гуьрде омори вокурдеи дуь тозе школгьо: э 1200 жиге э микрорайоне Дорумие шегьере Дербенде ве э 800 жиге э дигьбон Шамилькала Унцукульски районе. Гене вокурде оморе 6 бохчей гIэили э 1070 жиге, э нуьгьи школгьо жире-бе жирее районгьо ве шегьергьо берде оморе дуьруьжде гъуьчсохи.
Эзуш бэгъэй вокурдеигьо, тозе сохдеи материально-технически бинегьоре: гировунде оморе дуьруьжде гъуьчсохи бохчей гIэилгьоре э Дагъестански Огни ве Избербаше, овурде оморе оборудовани э 1134 школгьо эри пур сохде хундение жигегьоре «Основы безопасности и защиты Родины» ве «Технологие».
«Иму варасиреним, чуьки гьеймогьоине соводи чоресуьзи гьеймогьоинесузе овхьоле. Унегуьре коргьо рафде э е ченд рэхьгьо: эз вокурдеи дуьруьжде объектгьоре те пур сохдеи школеие кабинетгьоре герекие оборудовниревоз. Э 2026-муьн сале везифе нори гене пур сохдеи 1242 школгьоре гьеймогьоине оборудованиревоз эри кабинетгьо эсер физике, мэгIрифете ве музыке»,- хэбер дореи министр.
Э гъэд Августовски гуьрдлеме э Хуней Дусди бири э гуьнжо овурдеи бирмундеи соводие проекте «Догъисту эн ме – улкеи, э комики ме зигьисденум».
Гье у проект гуьрд сохде хубтее коргьой школгьой республикере, комикигьо фуьрсоре оморие э несигIэтдореи э гIэилгьо гьис сикеи э песой чуькле ватан эн хуьшде, мугъоет дошдеи культуре эн уре, дингьоре ве торихе.
Э бирмундеи бири шинох сохде гуьнжуьнде оморе чигьо хундегоргьоре, гешдеи гIилмие проектгьо, соводие войгегьо, комики веди сохде, чуьтам гIэилгьо ве тербиедорегоргьо эз дуь эекиревоз корисохигьо шинохде гIоширигьо ве жирелуье гъовумлуье улкере.
Сервор Догъисту гьемчуьн винири бирмундеире. Хундегоргьо шинох сохди нишонеревоз догъие хунеревоз, динлуье овхьолет иловлеиревоз холинчегьоревоз, гиёвевоз, гуфереревоз. Бири ве коргьо, гIуьзетсохигьо 80-сали Бараси.
