Сервор Догъисту Сергей Меликов гировунди гуьрдлеме э рэхьбергьой органгьой хьуькуьмевоз.

Э суьфдеи нубот рэхьбер регион омбаракбу сохди министр вокурдеи Догъистуре Бахтияр Уллаеве э руз хьэсуьл омореиревоз ве гуфдири согъбоши эри кор эну.

«Эз нуминей эн гьемме гьемкоркигьо омбаракбу сохденим Ишмуре э руз хьэсуьомореиревоз! Хосденуьм эри ишму хуби. Согъбоши эри желдлуье кор, комики кумеки сохдени э кор венгесде э Догъисту вожиблуье проектгьоре эри зигьисдегоргьой иму»,- гуфди рэхьбер регион, вокурденки гуьрдлемере.

Э гэрей пуьрсуьшгьо – веровундеи гъуллугъгьоре, комигьореки дори сервор республике.

Ихдилот сохде омори э товун бегьем сохдеи гъуьчсохире э 27 хунегьо э куче э нум М.Азизов э Махачкале, эже сухде оморебу бун. Те эхир сал э гъуьч сохде оморигьо хуне кучмиш сохде миев ве мундигьо зигьисдегоргьо.

Э товун вэхдлуье зимие коргьо ве гереклуьи гировунде карантийни коргьоре ихдилот сохди Сернуьш Хьуькуьм эн Республикей Догъисту Абдулмуслим Абдулмуслимов. У гуфди, ки э тебиетлуье-гьоволуье овхьолет гуьре гирошденигьо сал эри хоригъуллугъсохгьо четиние сал бири. «Э поизи ворушгьо кем оморебу ве эзу товун тум кошдеи  гирошдебу э четине овхьолет, кейки тумшенигьо э зимисду рафдет гъувотсуьз, э васал э хори омбаре вэгIэдо герми небу, ве э эхир васал кимигьо четинигьо эри иму бири зу беезеренигьо. Гье генешки, омбар э хотур синогъи ве усдоети эн хоригъуллгъсохгьой иму, лап хубе мэхьсуьл бири, уре дануьсдем винире, рафденки э июль э е ченд муниципальни районгьо»,- гуфди премьер.

ЖэгIмие гъэдер эн дигьлуье хозяйственнни молгьой Догъисту э 2024-муьн сал эз 252 млрд омбарте бири. Э и бирмунуши гуьре республике вегуьрди хьэшдимуьн жиге э Уруссиет, варафденки э пенж жиге зеверте той сохденки э 2018-муьн салевоз.

Желдлуь хьозуьр сохде оморени емигьо, эри эхир июль вечире омори эз миллион тонн гиев омбарте, гьемме герек мибу ведешенде экуьнди 1,5 млн тонн емигьо.

Догъисту – бинелуье фурухдегор хьэвуьжгьои э рынок вилеет. Угьо кошде оморет э 8 гьозор гектар, эз комигьоки вечири омори экуьнди ниме ве вегуьрде омори эз 80 гьозор тонн хьэвуьжгьо омбарте.

Республике пушобери э вилеет ве э товун кошде веровундеи мейволуьгьоре – угьо э 2024-муьн сал вечире оморебу 93 гьозор тонн.

Е пуьрсуьшиге – и жэхит лов биреи молихьгьо. Эри нисд сохдеи угьоре бил зере омори эз 33 гьозор гектар омбарте. Овхьолет гьеммише назари сохде оморени.

Абдулмуслим Абдулмуслимов гуфди ки э жигегьой кура биреи хокоругьо гереки гировунде карантийни коргьо, чуьнки хьэсуьл неев гIэзорие зэгIифигьо э молгъэрегьо. Сергей Меликов гъувот дори и хэеле, э и хьисоб э гIэрегьой тозеден сохдеи жигей кура биреи хокоругьоре. Герми э Догъисту эз 12-муьн июлевоз овурди эки омбар хэржи сохдеи электроэнергиере. Э товун овхьолет э ЖКХ ве энергосетевой комплес э вэхд гьеминон ихдилот сохди суьфдеи вице-премьер Манвел Мажонц.

Лап омбар э республике электроэнергие хэржи сохде оморебу эз 15-муьн те 24-муьн июль шеш гиле. Эзу товун омбар куьшде оморембу товуш, гъэдер комики бири зофруте, эз пушотеине салгьо: э июль эни сал куьшде оморебу 255 гиле, пор – 332, ве э 2023-муьн сал – 439.

Бинелуье вогьнегьой хэребеигьо – кугьне биреи ризгьой электорасундеи, зевер биреи хэржи сохдеи, вес нисдии дешендеигьо э гъуьчсохи ве тозеден сохдеи сетевой инфраструктурере, гъэтмегъэрише ве гъонунсуьзе вокурдеи, э и хьисоб э сэхьиблуье жигегьо э Махачкале. Кугьне биригьо ризгьой электрорасундеи нисе вотовусденуьт зевер биригьо гурундире. Сервор регион гуфди ки гереки системни кор. «Сулагьоре сэхд сохде герек нисди, хэребее десдегьо ние гирору эз фидер эки фидер, оммо гереки э гуьнжо овурде оморигьо кор, системни кор эри хубте сохде энергитически комплексе», — гуфди у ве гъуллугъ дори хьозуьр сохде гуьнжолуье руйбиреире э нум эн федеральни органгьой хьуькуьм ве эн сетевой компание. Э товун овхьолет э пожаргьоревоз э республике ихдилот сохди вице-премьер Рамазан Джафаров. Жейлее гъэршуйпожарни жире дешенде омори э регион эз 1-муьн апрелевоз. Эри эни вэгIэдо, э гофгьой эн вице-премьер гуьре, офде омори лап гъувотсуьзе могьлугълуье жигегьо, гировунде омори фегьмсохигьо ве гуьрдлемегьой комиссиегьо э товун ЧП. Э артгьо гуьре доре омори гъуллугъигьо э товун э гуьнжо овурдеи гъэршуйпожарни коргьоре ве эри нисд сохде очугъ сохде оморигьо пузмишигьоре. Э июль э хьисоб веноре омори 290 тебиетлуье пожаргьо, э 150 гектар. Лап келе пожар бири э Ногайски ве Тарумовски районгьо. Гьемме жигегьой пожаре дануьсдейм нисд сохде, энжэгъ пожар э Унцукульски район э 22 гектар гьеле куьшде не омори.

Рамазан Джафаров гуфди, ки фегьмсохигьо очугъ сохдет неверовундеи гъуллугъгьоре э муниципалитетгьо. Э гIэрей пузмишигьо э и хьисоб нисдии инфраструктуре эри вечиреи гIове, недошдеи талабигьоре э товун э гуьнжо овурдеи гъэршуйпожарни ризгьоре, вес нисе сохденигьо андуьрмишие кор э одомигьоревоз.

Сергей Меликов талаб сохди тижлуь сохде назарире эри веровундеи гъэршуйпожарни чорегьоре: «Хэйф, овхьолет э пожаргьоревоз дегиш нисе бире. И неки зарали зерени, оммо гьемчуьн терси эри экологически секонесуьзи эн республике. Омбаре бэхш четинигьо бири э сереботи неверовундеи гъэрорномегьой комиссиере э товун ЧС э серворгьой муниципалитетгьоревоз. Гъонунепузмишсохдегоргьоре гереки овурде эки жугьобдорлуьи».

Кор эри хубте сохде овхьолете диеш гировунде оморени.