Э гIэрей мэгIлуьмлуь биретгьо ватанлуье шекуьлкешгьо ве скульпторгьо дери ве нушудорегоргьой эн хэлгъ жугьургьой догъи. Уруссиетлуье музейгьоре рач сохденуьт кор эн мэгIрифетлуье шекуьлкеш эн Тамаре Мусаханове. Гьемчуьн мэгIлуьмлуь бу ве Александр (Шулет) Давыдов, профессор эн Кррасноярски хьуькуьметлуье шекуьлкеше институт (гьеймогьой архитектурни-вокурденигьо академие).
Александр Давидович хьэсуьл омори 7-муьн июль 1942-муьн сал э дигьбон Гъирмизине Слободке. Хунде варасденки миенее школере дарафди э шекуьлкеше училище э Ташкент. Бьулуьнде соводире вегуьрди э факультет эн монументальни-декоративни пластике эн Лениградски шекуьлкеше-промышленни училище э нум В.И.Мухина (гьеймогьой Санкт-Петербургски хьуькуьметлуье шекуьлкеше-промышленни академие э нум барон А.Л.Штиглиц). Факультет эн монументальни-декоративни пластике хьозуьр сохдембу сенигIэткоргьоре эри кор сохде э тараф монументальни мэгIрифет ве эри гъэорор сохдеи везифегьой декоративно э гуьнжо овурдеи доруние бинушире ве буруние бинуши беногьоре.
25 сале биренки А.Давыдов гирошди э Красноярск, эже сохди хубе сенигъэтлуье рэхь, биренки духдир эн искусствоведение, профессор, рэхьбер эн кафедре скульптуре эн Краноярски хьуькуьметлуье шекуьлкеше институт. У верзуьшлуье шекуьлкеш Уруссиети ве гIуьзетлуье бэхшвегир эн Гьеммеуруссиетие жэгIмет гъэлхэнд сохдеи сенгъгьой еровурди торихе ве эн базургендире, бу гьеммишеине бэхшвегир эн улкее ве региональни бирмундеигьо ве хуьшдени ю нуьвуьсди монументальни-декоративни шекуьлгьоре: «Хакасия», «Лучники», «Пусть всегда будет мир», «Молодость Сибири». Диеш у мерэгълуь бирембу э шекуьльоревоз э станкови скульптуре – лап мэгIлуьмлуье коргьой эну э и тараф: «Летчик герой Советского Союза В.Олейников», «Герой Советского Союза Андрей Губин» ве диеш. «Шекуьл эн духдер жугьургьой догъи» рач сохдени гъолуб книге «Краткая энциклопедие горских евреев» эн Х.Абрамове. Шекуьлгьой хуьшдере скульптор пур сохдембу э чигьрет фирегьмендиревоз ве мердьетиревоз э вэхд гуьре.
Э пушони эн красноярски кинотеатр «Октябрь» (гьеймогьой Хуней кино) э 1977-муьн сал норе оморебу шекуьл «Свобода». Скульптурни шекуьл эн азадлуье зен, эн гъолхмишчи бири арт эн офирее еклуье кор сохдеи эн се мэгIрифетлуье скульпторгьо эн Александр Давидович Давыдов ве эн Юрий Павлович Ишханов ве эн архитектор Эдуард Михайлович Панов.
Э Кросноярски шекуьллуье-вокурденигьо нститут Александр Давыдович кор сохдебу эз 1982-муьн салевоз. У гьисди еки эз мэгIлуьмлуье ватанлуье усдогьо, кор сохденигьо э тараф монументальни-декоративни скульптуре ве шекуьл. Уре омбаре коргьои, комигьоки гьеймогьой дошде оморени э Красноярски шекуьлкеше музей э нум В.И.Суриков ве э краеведчески музей.
Александр Давыдович эз гэрей зиндегуни рафди э 2018-муьн сал. Гьемме гъувотгьоре ве офирее мэгIрифет хуьшдере у дори э гъуллугъсохи базургенди ве мэгIрифет. Келе офирее минкин эн мэгIрифетлуье скульптор ве тербиедоренигьо божеренлуьи эну минкин дори Александр Давыдовиче келе сохде омбаре верзуьшлуье хундегоргьоре. Нум эну эри гьеммишелуьги мидемуну э торих мэгIрифет эн Краснодарски улке чуьн эн мэгIрифетлуье скульптор ве тербиедорегор, гьемчуьн чуьн верзуьшлуье кук эн хэлгъ жугьргьой догъи.
Нуьвуьсди Хана Рафаэль
Тержуьме сохди Ильягуева А.
