Эз гьемме гIилмгьо, бибоворинисуьз, медицине лап верзуьшлуьни. Э медицине бинелуье дерму гьисди духдир. Ве энжэгъ уре, кире гьисди довом, дануьсденигьо хос сохде нечогъигьоре, гIэмел миев нум доре гьэгъигъэтлуье духдир. Шинох бошит: Елизавете Лазаревне Давыдове, лап хьэеменде одоми ве лап дуьлхошие гофсохдегор.
— Елизавете, меслэхьэте э ишмуревоз мере воисдени сер гуьрде эз гIэдотлуье пуьрсуьш: эже ишму хьэсуьл оморейт, эже хундебирит, эже гирошди жовоне салгьой ишму? Эхи лап очугъэ ве герме еровурдигьо э иму мундени эз гъэйгъусуьзе гIэильети иму.
— Ме хьэсуьл оморем ве хунде варасдем школере э шегьер Кизляр эн Догъисту. Жугьурие дин-догIотие жэгIмиет э унжо бу дусдлуь, еклуьгъие ве шоре зиндегуние: зигьисдембирим е кифлете хуно. Лап хубе ероаурдигьо мунди эз кизлярски вэхд гIэильети ме.
— Эзжеи гъумолет эн деде-бебей ишму? Эже ишму хундебирит? Эже песде зигьисдебирит?
— Бебе, Исаков Лазарь Аронович, — бинелуье одоми Кизляри е сеимуьн эрхэ, хунди варасди Тимирязовски академиере, бу еки эз биненорегор заготконторере. Деде, Анне Калумовне, хьэсуьломорегор эн Махачкале. У духдир-терапевти, ве меш, хунде варасденки школере, дедере хуно, духдир бирем ве дарафдем э Догъистоние медицински универститет. Гье бирден бэгъдовой хунде варасдеи универститете э шуьвер вадарафдем ве кор сохдебируьм духдир-терапевт э Хасавюрт. Бэгъдовой сергуьрдеи довгIо э Чечня гирошдем э кифлетевоз э Пятигорск, эже кор сохдебируьм э ГIэилие лешгерие санаторий духдир эн ультрозвуковой диагностике. Духдер ме вохурди мозоллуье гъисмет хуьшдере э Дербенд, рафди э унжо, зенди кук ве духдер. Ве ме дие не дануьсдем поисде э тэхьнои, гирошдем эки энугьо. Диеш битте кукиш гьемчуьн зигьисдени ве кор сохдени э Дербенд.
— Э Пятигорск ишму мэгIлуьмлуь бирит чуьн духдир Лизе, терапевт э гIэсуьллуье дуьлевоз. Гьейчуь ишму гирошдейт э Дербенд? Чуь сохденит ишму э унжо? Эже кор сохденит? Екем ихдилот сохит э товун сенигIэтлуье корисохи хуьшде.
— Э Дкербенд кор сохденуьм духдир-терапевт ве э кабинет УЗИ. Шегьер мере лап хьэз оморе: герми, овтолуьни, сафарлуьни, жигенлуье молгьой хуреки лап лезетлуьни.
— Ме гьеммише фегьм сохденуьм э песой гъозиегьой эн пятигорски зенлуье жугьурие клуб ве дануьсденуьм, ки ишму зу жугьоб доренит э сер гьемме, гирошденигьо э зиндегуни эн жугьургьой шегьер. Чуь э зиндегуни ишму гьисди дин?
— Хьисоб сохденуьм, ки дин мие бу э мэгIнолуье жиге э варасиреири эн гьер ооми. Гьемме э зиндегуни иму гирошдени э войгей Офирегоревоз. Гье э ижире тегьергьоревоз ме келе сохдебируьм ве гIэилгьой хуьшдере.
— Комини жирегьой хосиете ишму хьуьрмет сохденит э одомигьо?
— Э одомигьо гъимет доренуьм ве хьуьрмет сохденуьм боворинире, дорундуьлире, номуслуьире, рэхьмире, дуьлфирегьунире ве жейле мугьбете эки Худо ве эки куьнде одомигьо.
— Ишму гоф сохденит э жугьури? Чуь гереки сохде эри эну, чуьнки зугьун иму ве базургенди нисд небу?
— Э гIэзизе зугьун хуьшде дануьсденуьм гоф сохде э угьревоз, ки уре варасирени, оммо гьейсэгIэт ижирегьо лап кеми. Гереки э гуьнжо овурде нубогьой хундеи гIэзизе гъусоре чуьнки зугьун фурмуш сохде неев.
— Ковидни вэгIэдо лап четин бу эри гьеммей гIуьлом, эри духдиргьо – жейле. Чуьтам ишму эзи гирошдейт?
— Ковидни вэгIэдо лап четини бу. Герек бу кор сохде омбар. Ме эзи вэхд гирошдем хушхьоллуь э кумеки Худоревоз!
— Чуьтам дин ве гIэдотгьо кумеки сохдени гирошде эз зиндегуние синемишигьо?
— Гирошде эз зиндегуние четинигьо, эз комигьоки екиш гъэлхэнд сохде не омори, кумеки сохденуьт Офирегор ве, гьелбетте, кифлет, гъовумгьо ве куьнде одомигьо.
— Воисдениге ишмуре гьерчуь бисдо дегиш сохде э гьевелие зиндегуни ишму?
— Иму нисе дануьсденим гьичиреш дегиш сохде э зиндегуни хуьшде: гьемме гирошдени э дузгунлуье войгей Офирегоревоз. Оммо э гьер гъозие гьичиреш дегиш нисохдум. Ме разинуьм эз Худо!
— Чуьжире несиет ишму мидорит жовоне одомигьоре?
— Несиет доренуьм гьемме жовоне одомигьре зигьисде э бовориниревоз, мугьбетевоз ве гьеммише имид бире э хубтеи. Егъин кор сохде э пура гъувотевоз эри хушхьоли кифлет хуьшде, э суьфдеи нубот, ве эн жэгIмиет дин-догIоти. Офире, не вачаруьнде, хосде куьнде одомигьой хуьшдере.
Нуьвуьсди Стелла Давыдова.
Тержуьме сохди Ильягуева А.
