Овадия Ашуров – одоми э жигей хуьшде, эри комики зиндегуни эн жэгIмиет дин-догIоти вожиблуьни, эн хуьшдере хуно. Бэгъдовой эну, кейки у вихде оморебу сернуьш жэгIмиет дин-догIоти эн жугьургьой Пятигорск, зиндегуни эну хубте бири. Сер гуьрди кор сохде омбаре проектгьо, комигьоки суьфде поюнде оморебу, хьэсуьл омори тозегьош. Гьер бэхшвегир жэгIмиет мидануь оморе эки эну э хогьиши хуьшдеревоз – ве у те эхир гуш миду ве кумеки мисоху, миду несиет енебуге э кор мивенгенуь герекие одомигьоре. Омбаре вэхд жигенлуье жэгIмиет дин-догIотире небу ижире сернуьш.
-Ишму, Ашуров Овадия (Вадим) Юрьевич, гьисдит сернуьш жэгIмиет дин-догIоти эн жугьургьой эн шегьер Пятигорск «Геула». Гьейчуь ме гьечи жугьобдорлуь ишмуре шинох сохденуьм? Эзу товун ки ишму ве э расдеки жугьобдорлуье руи, нушу доренитгьо гьемме дин-догIотие жэгмиет Пятигорске. Ченд салгьо ишму веровунденит гъэрхундигьой сернуьше эн жэгIмиет дин-догIотире? Ки кор сохдембу э и жиге те ишму?
— Ме веровунденуьм гъэрхундигьой эн сернуьш жэгIмиет дин-догIотире шеш сал. Вэхд кор ме мэгIлуьмсуьзи. Те ме бу Дададшев Олег (Яков).
— Гьисдиге юридически руй ве гъонун жэгIмиет дингIоти жугьургьой Пятигорске?
— Гьелебетте, гьисди пура пакет документгьо. ЖэгIмиет дин-догIоти э хьисоб веноре омори э Министерство юстицие. Э гъонун жэгIмиет дин-догIоти э хьисоб вери 70 бэхшвегиргьо. Э жэгIмие гуьрдлемеревоз ме вихде оморем сернуьш.
— Э комини рузгьо ведировунде оморени сефир Туро?
— Дуьшоббот, першоббот, шоббот ве э мигIидгьо.
— Чуьтам ве эз хьисоб ки э гуьнжо овурде оморени бюджет?
— Гьевелимуьнжи, эз хьисоб фурухдеи алийоте (ихдиери хундеи сефир Туроре). Дуьимуьнжи – эз хьисоб вечиреи гъурбунигьоре э мигIидгьо Рош а-Шана ве Йом-Кипур, кумеки сохденуьт мисводорегоргьо, жигенлуье бэхшвегиргьой жэгIмиет дин-догIоти.
— Бюджет дотационнини енебуге профицитнини?
— Бюджет ве дотационини ве профицитнини – межбур бирени эз проект.
— Ки, эз ишму бэгъэй, диеш хундени сефир Туроре?
— Хэйф, ме зугьун ивритире нисе дануьсденуьм ве сефир Туроре нисе хунденуьм. Э дин-догIотие жэгIмиет иму дуь нумази. Э кучей Шоссейни, 27 – чуькле нумази. Э унжо гьисди раби, Рафаэль Алхазов, ве кумекчи эну, Нахум Дагаев. Угьо гировунденуьт тефилоре ве хунденуьт Туроре. Дуьимуьн нумаз дери э куче э нум Пальмиро Тольятти, 85 (жэгIмиетие дин-догIотие меркез). Гьемчуьн э ихдиери эн жэгIмиет дин-догIоти гьисди ешиве (куче Тольятти, 89). Э унжо гировунде оморени тефилегьо ве доре оморени нубогьой Туро. Ешивере сервори сохдени Михаэль Хен. Кумекчигьой эну: рабигьо Элияху Леви, Ицхак Шаяев ве Шимон Ханинаев. Угьо гировунденуьт тефилоре ве хунденуьт Туро.
— Кумеки сохдениге жэгIмиет дин-догIоти эн Пятигорск э чуькле жэгIмиет дин-догIоти эн гъуншигьо?
— Бирени, кумеки сохденим е гиле. Иму куьнд кор сохеним э кисловодски нумазевоз. Иму хьисоб сохденим Пятигорск ве Кисловодске еклуье жэгIмиет дин-догIоти. Гьемчуьн имуре ологълуь сохдени дусдлуье гъэножогъигьо э жэгIмиет диг-догIоти эн Ставрополь, Нальчик ве эн Дербенд. Иму бежид руй биреним эки дуь еки. Гьемме дин-догIотие жэгIмиетгьо эн жугьургьой Кавказ лап дусди ве хуби.
— Мере воисдембу э ишму доре пуьрсуьшгьой хуьшдере, оммо имогьой варасиренуьм, ки зиндегуни ишму бенди э зиндегуни дин-догIотие жэгIмиетевоз. Гоф сохденитге ишму э зугьун жугьури? Чуьтам гереки дошде базургендире ве зугьун эн хэлгъ хуьшдере, чуь гереки эри эни сохде?
— ГьейсэгIэт гьемме кор ме гIузет сохде омори э жэгIмиет дин-догIоти. ЖэгIмиет дин-догIоти келеи, ве гъэйгъугьо омбари. Э зугьун жугьури ме гоф сохденуьм зобу, оммо варасиренуьм. Э хотур келедеде ве келебебе, хуб. ГIэмел миев гуфдире, ки эгенер э кифлет гоф нисе сохденуьт э зугьун дедеи, умогьой е гIэилиш нидануь и зугьуне. Эзу товун гереки хунде дануьсде уре, ве имуре воисдени э кумеки фонд СТМЭГИревоз вокурде нубогьой жугьури.
— Чуьтами дегишигьоре ишмуре воисдембу винире э жэгIмиет дин-догIоти иму э биевгьо?
— Чуьнки омбаре одомигьо доруьт гъонунгьой шобботе ве хьэлолире. И лап вожиблуьни.
— Чуьтам ишму хьисоб сохденит, чуь жейле сеч сохдени хэлгъ жугьурире эз унигегьо?
— Боворини э Еклуье Офирегор ве гъобул сохдеи Гъонунгьой Туроре э догъ Синай.
— Ихдилот сохит э товун гьэгъигъэтлуье ве биевгьо проектгьо эн жэгIмиет дин-догIоти Пятигорске.
— Имбуруз иму э кор венгесденим жир-бе-жирее проектгьоре: богъчей гIэили, жовоне клуб, себэхьмундеине нубогьой Туро э пушой тефило хундеи ве бэгъдовой эну, шевине колель эри гIэилгьо э стипендиеревоз, нубогьо эри зенгьо э афрашат халеревоз, волонтерски программе, проект «хевра-кадиш» (э гуьнжо овурдеи битехьэим сохдеире). Иму гьемчуьн кор сохденим гьееки э мисволуье фондевоз «Свои». ЖэгIмиет дин-догIотире гьисди банкетни зол, эже иму гировунденим гьемме мероприятиегьоре. Куьшденим хьэлолие молгъэрегьоре ве ведешенденим полуфабрикатгьо. Э жэгIмиет дин-догIоти гьер рузорине буьржуьнденим хале, экуьнди 400 тек, комиреки гьовои дореним бэхшвегиргьой жэгIмиете. Бинелуье везифей иму – э гуьнжо овурде динлуье школе-ешивере. У кор сохдебу, оммо э сереботи пандемие сэхд сохде оморебу. Гьемчуьн э и куьнде вэгIэдо имуре воисдени вокурде екшобботие школе эри чуькле гIэилгьо. Гьемчуьн имуре воисдени бегьем сохде вокурдеи жэгIмиет дин-доготие меркезе ве тефило хунденигьо золе.
— Гьеммей иму эз гъумолет гIэильетиним. Ихдилот сохит, эже ишму хьэсуьл оморейт ве эже келе бирейт? Эзжеи гъумолет деде-бебей туь? Чуьни эри ишму варасиреи «чуькле ватан»?
— Ме хьэсуьл оморем э Пятигорск. 13 сале биренки э деде-беберевоз рафдейм э Москов. Э 2003-муьн сал хунде варасдем школей жугьурире «Эц Хаим» э Гъирмизине Гъопугьо. Бежид рафдембируьм э Хоральни нумаз ве ешиве «Огалей Яаков». Мере хундембируьт ижире рабигьо, чуьн Давид Вайс, Арье Аминов ве Анар Самойлов. Зен хосденки гьемватини хуьшдере, гьемчуьн хьэсуьломорегор эн Пятигорск, гъэрор сохдем вогошде э гIэзизе улкей хуьшде э уревоз. Деде-бебей ме эз Дербенди. Угьо гирошдет э Пятигорск э 1978-муьн сал.
— Ки э сер ишму кори сохди эз гьемме омбарте э зиндегуни?
— Ме хьисоб сохденуьм, ки э сер ме кори сохди омбаре одомигьо ве гъозиегьо, ве гьерки угьоре бу вожиблуье жиге э зиндегуни ме. Э суьфдеи нубот деде-бебе, зен ве гIэилгьо. Оммо э сенигIэтлуье план келе корисохи сохди несигIэтдорегор ме, серворлуье раби эн Пятигорск Михаэль Хен. Э хотур эну ме дануьсдем параменд сохде вердушигьой мере, бире боворини ве варасире вожиблуьи динлуье верзуьшигьоре э кор ве э зиндегуни.
— Чуьжире несиет мидорит ишму жовоне эрхэгьоре?
— Хьуьрмет сохде келетегьоре ве дуь екире. Эрклуь бире э хьэсуьл омореи хуьшдеревоз. Дануьсде гъэдуьре ве согъбоши гуфдире эз Офирегор эри эну, чуь туьре гьисди имбуруз.
Нуьвуьсди Стелла Давыдова.
Тержуьме сохди Ильягуева А.
