17-муьн сентябрь, э биней ДГТУ вокурде омори лешгери хунденигьо меркез. Э вокурдеи бэхш вегуьрдебу сервор Догъисту Сергей Меликов. Э унжо мидануьт хунде студентгьо-очникгьо э программей лешгерие хьозуьрлуьгъи сержантгьоре ве рядовойгьоре (матросгьоре) гуьре.
Жейлее бено, доре оморигьо эри лешгерие меркез, гъуьч сохде омори лап хуб э хунденигьо классгьо норе омори гьемме гереклуье мебель, оборудование, технически молгьо эри хундеи, хьисоб сохденигьо ве мультимедийни технике. Э и хьисоб э дуь классгьо норе омори интерактивни информационни сенсорни панелгьо ве кор сохдени хунденигьо стрелкови тренажер.
Э инжо гировунде миев строевой, жэгlмилешгерие ве гlэтошлуье хьозуьрлуьгъи. Гьемчуьн гьисди жейлее классгьой хьозуьрлуьгъи э товун ологъи, лешгерие топографие ве лешгерие-инженерни хьозуьрлуьгъи. Гьонине вэгlэдо э барасигьой конкурсни вихдеи гуьре вегуьрде омори 33 тербиедорегьоргьо э сенигlэт «рэхьбер отделение». Нуботлуье конкурсни вихдеи гировунде миев эз октябрь те декабрь 2024-муьн сал. Хундеи сер гуьрде миев 1-муьн февраль 2025-муьн сал.
Сервор Догъисту гуфди, чуьки гереки э ер овурде пуч биригьо лешгерчигьо, веровунденки лешгерие гъэрхундире, э минут сессуьзиревоз.
У гуфди, чуьки хундеи э лешгерие хунденигьо меркез э студентгьо кумеки мисоху э гуьнжо овурде желдлуье зиндегуние гъэножогъи хуьшдере ве хьозуьрлуьгъи хуьшдере верзуьшлуь гъуллугъ сохде эри Ватан. Гьемчуьн вегуьрде тозе ихдиеригьоре ве вегуьрде гьеймогьине лешгери-хьисобсохие сенигlэте. Сергей Меликов согьбоши гуфди эз Министерствой гъэлхэнди гьемчуьн эз Министерствой гlилми ве эн буьлуьнде соводи Уруссиет эри гъобул сохде оморигьо гъэрорноме э товун вокурдеи лешгери-хунденигьо меркезе э ДГТУ. Гьемчуьн у согьбоши гуфди эз рэхьбергьой университет – эри э гуьнжо овурдеи гуьнжолуье коре.
Барасигьоре э кор хьозуьр сохдеи корсохгьоре эри ерэгъленмише гъувотгьой вилеет хосди сернуьш эн Догъистулуье региональни отделение эн Гьеммеуруссиетие жэгlмиетлуье идорей всетерангьой довгlо ве жофо, эн Ерэгъленмише гъувотгьо ве ихдиергъэлхэнлуье органгьо Магарам Алиджанов.
Бэгъдовой вокурдеи Сергей Меликов фегьм сохди меркезе, гоф сохди э студентгьоревоз ве э книг гуьзетлуье гъуногъгьо гьишди суьфдеи нуьвуьсдеире.
