13-муьн сентябрь э Министерстве культури Догъисту гирошди вохурдеи серворе ведомстве Зарема Бутаевой э мэгlнихуневоз Жасмин – Шор Сара Львовной – Уруссиети мэгlнихуневоз, возирегоревоз, телебердегоревоз, фотомоделевоз ве дизайнеревоз. 14-муьн сентябрь верзуьшлуье возирегор Уруссиети Федерацие, верзуьшлуье возирегор Догъисту дори очугълуье сольни концерт э Дербенд, гъовуме шегьер хуьшде.

Омореи э Догъисту Сара Львовна сергуьрди эз сер кеширеи Гlэили школе мэгlрифет №1 шегьер Махачкале, эже Жасмин гофсохди дуь э екиревоз э тербиедорегоргьоревоз ве несигlэтвегирдегоргьоревоз идоре, гьемиге Миллетлуье музей Догъисту нум А.Тахо-Годи. Мэгlнихун Жасмин хунди популярни мэгlнигьо хуьшдере гьееки э жогьиле несигlэтвегирдегоргьоревоз Гlэили школе мэгlрифет №1 нум П.Чайковски шегьер Махачкале. Бэхшвегири гъобул сохди ве духдер эну Маргарите.

Верзуьшлуье возирегор Уруссиет омори расири э Ватан, э Догъисту э офиренуьше шолиэхьгьовоз. У дори сольни концерт э гъовуме Дербенд ве э пушо нори везифе ведешендеи клип тозе мэгlни э мэгlлуьмлуье жигегьо гъэдимие шегьер. Оммо гьевел мэгlнихун э келе десдей хуьшдеревоз гировунди руз э Махачкале ве сер кешири Министерство культури Республике Догъисту.

Вохурдеи бири рэхьмлуьи. Сара Львовна гоф сохди э товун бебей хуьшде, ёргири э товун коминики зуьндеи э дуьлгьо гьеммейки, ки уре дануьсди. Лев Яковлевич Манахимов бу зиёдгуьгчегие вежегьисдегор, тербиедорегор, верзуьшлуье корсох мэгlрифет Догъисту ве келе сохди омборе эрхэ несигlэтвегирдегоргьоре. Деде, Маргарита Семеновна бири дирижер ве, э хьэйфкеши, зу рафди эз зиндегуни.

Эз кифлет меселен вегуьрди ве духдер Маргарита – хундегор Гнесинке э класс фортепиано.

Раче офиренуьше кифлет, коминики фурмуш не сохде э товун келетегьо хуьшде, э товун гъовуме шегьер хуьшде ве дербендигьо.

Имбуруз э Дербенд, э ёргири э товун бебей мэгlнихун, кор сохдени Клуб гlэили «Жасмин», э коминики кор сохдени вежегьисдение десде «Пируэт». Э клуб эри гlэилгьо гьисди шекуьл усдоети ве гьовой музыкеи, гьемиге кор гилови, алати, заргери, молбофдение мэгlрифет ве английски зугьун.

Мэгlнихун ихдилот сохди э товун офиренуьше плангьо хуьшде, э гъэд комигьоки э гуьнжо овурдеи интержелдуье гьовой музыкеи томоше э корсохи дуь э еки э Тати театревоз.

Э нубот хуьшде, Зарема Бутаева э Маргарите фикир сохди бэхшвегири сохде чуь солистке э гьерсалине Региональни гьовой музыкеи фестиваль жогьиле мэгlни хундегоргьо «Имидгьо эн иму», коминики дорени мэгlрифете гlэилгьоре гlэжоиблуье минкини возире э Камерни оркестровоз нум С.Хржановски.

Гьемиге министр ихдилот сохди, чуьки гьисди план вокурдеи э Махачкалеи музыкальни идоре нум Г.Гасанова жейлее вакал ве фикир сохди э Жасмин бире оголзереи тербиедорегор.

Гьемиге гуфдири, чуьки уре э хуьшде ошугъ сохди рэхьмлуье возирегор ве хьозуьрлугъи э дуь еки гьемкорсохи.

Э эхир вохурдеи Зарема Бутаева бэхш дори Сара Львовне дофусзерее бэхш Расула Гамзатова ве доре э гlуьзет овхьолет хьуькуьмлуье бэхш.

Песде Жасмин венуьшди рафди э гьовуме шегьер, эже уре хосденуьт ве гьеммиши дениширенуьт.

Сольни концерт эну бисдо дуьруьжде арти концертни программе 3-муьн рузе фестивале «Гьоимдошдегоргьо дин-гlэдотгьо». Мэгlнихун Жасмин э ёр овурди эз сегьне, чуьки у гlэсуьли эз Дербенд. Инжо гирошди гlэили эну ве жовони. Ве еки эз мэгlнигьо, хунде оморигьо э и руз, бири гlуьзетсохи гьовуме шегьер.

Эки сегьне кучмиш бири эз гьозор омборте томошесохдегоргьо. Могьлугъ вохурди гьер нумир гьемватани хуьшдере лап гужлуье чеке-чек зереиревоз. Э бохче э зир вокурде асму хунди эз гьемме мэгlлуьмлуье мэгlнигьо ве тозе мэгlнигьо хуьшдере. Не гирошди ве дуьлхошиесуьзе нехэберекигьо. Министр э сафари ве НХП РД Эмин Мерданов э шолум гуфдиреи хуьшде мэгlлуьм сохди, чуьки э Буйругъи Сервор Республике Догъисту Сергея Меликова Жасмин верзунди нум Хэлгълуье возирегор Республике Догъисту!

«Эри эн ме лап дуьруьжде шорини вегуьрдеи ижире гlуьзетлуье нум. Боворини доренуьм э ишму, чуьки хьэзёлуь уре мибошум берде»,- гуфди возирегор.

Э и салгьо офиренуьше корисохи Жасмин ведешенди омборе гъэдер альбомгьо, рафди расири э шегьергьо вилеет ве э де вилеетгьо, бири верзуьнде лап гlуьзетлуье музыкеи бэхшгьоревоз ве премиегьо. Имогьой э нуботноме барасигьой эну и нум эз гьемме гlуьзетлуьи.

«Эн ме хьуьрметлуьегьо, ме Худо разинуьм эз ишму! Гьемме бэхшгьо бугьолуьни, оммо очугъсохи гьемватанигьо эн ме, эн гьовуме республике – бешгъэ бугьолуье ве вожиблуье бэхши. Эри эн ме дуьруьжде шорини вегуьрдеи и гlуьзетлуье нум.

Жейле вожиблуьи эри ме мэгlлуьм сохде э ишму и хэбере гьэгъигъэт имбуруз, 17-муьн сентябрь. Имбуруз бебей эн мере Льву Яковлевичу миё бу бире 74-муьн сал. У не винири и рузе, оммо боворинуьм, у эз гьемме жун текебури мисох э товун эн ме ве эн гьемватанигьо иму. Эн ме гьовумгьо, эн ме Догъисту! Согъ боши ишмуре э муьгьбет! Э очугъсохи ишму!» — эз дуьли согъбоши гуфдиреи гьемватанигьо мэгlнихун.

Корсохгьо дофусхоне гозит «Ватан» омборекбу сохде Саре Львовне э верзуьшлуье нумевоз ве войге сохде барасигьо ве тозе офиренуьше барасигьо!