Э рэхьберсохи жигегир Сервор Хьуькуьм Республике Догъисту Ризване Газимагомедове э мейдон Миллетлуье библиотеке нум Р.Гамзатове гирошди гуьрдлеме э бэхшвегири рэхьбергьо молведешендеи корхоне республике.

Э гъэд у гьемиге гъобул сохди бэхшвегири министр молведешендеи ве алвари регионе Низам Халилов ве сернуьш Фонде параменди молведешендеи Догъисту Магомед Исуев.

Э вэхд пуьруьшсохи бири е гъэдер расире пуьрсуьшгьо э товун кор венгесдеи хьуькуьмлуье хогьиши, мошинвокурдеи жерге жиге, гьемиге дануьсде расунде хубе сэнигIэткорсохе одомигьо корхоне. Вокурдеи гуьрдлеме, вице-премьер Ризван Газимагомедов гIуьзет сохди гьеммишелуьг параменди молведешендеи чуь е тек эз бердегор отрасльгьо экономике Догъисту.

«Молведешендеи – гье у е тек эз бердегор отрасльгьо экономике Догъисту, комики гьисди буьлуьнде минкин. Не денишире э герексуьзе гъозие-гъэдер иловлеи, межбур биреи э тесдигъ политике эз лой жерге европеи ве мегIэровие вилеетгьо, молведешендеи корхоне республике зиёд дуразкеши веди сохде гьеммишелуьг кор ве хубе зевер биреи нубот молведешендеи корхоне. Гьечуь, эз артгьо суьфдеи чоримуьн бэхш нубот корхоне э проценти гъэножэгъи гуьнжуьнди зиёдте 164,9% э тойлуье ухшеши вэхд гирошдигьо сал, чуь гьисди е тек эз хубтее бирмунуши э гъэд гьемме вилеет. Дошдеи ижире зевербиреи э арти 2024-муьн сале – жэгIмлуье везифе иму»,- гIуьзет сохди вице-премьер.

Э у гуьре, диеш зиёд гуфдири у, еки эз четине пуьрсуьшгьо мунди гъэгьтии хубе сенигIэткор, межбур биреи э у хьисоб зире муьзд жофои.

«Эри гъэрорноме гье у пуьрсуьш, э доре гъуллугъ Сервор республике Сергее Меликове, Хьуькуьмевоз Догъисту дуь эекиревоз э сенигIэткорлуье федеральни органгьо хьуькуьмлуье хьуькуьм рэхьберсохгьо хундение идорегьо гировунде оморе кор, э товун э хуьшде вогосунде жогьиле сенигIэткор э гереклуье рэхькор, зевербиреи риз гъэдерлуьи миглее муьзд жофои ве верзуши коре э гьисдигьо рэхькор. Гье у ве екиге пуьрсуьшгьо гьемиге бири э нуботлуье гуьрдлеме Совете э товун вожиблуье рэхькори гIилми-технологие параменди республике»,- гIуьзет сохди вице- премьер.

Еки эз бинелуье десде гъиребирсохе корхоне молведешендеи жиге Догъисту Ризван Газимагомедов нум гуьрди мошинвокурдеи еклуье согъ. Гьонине вэхд у нушу доре корхоне эри авиа- ве судовокурдеи, радиоэлектрони ве электротехники молведешендеи, энергетике мошинвокурдеи.

Э везифе хьэвес венгесдеи параменди мошинвокурдеи отрасль корхоне молведешендеи э ихдиёри доре жерге кор хьуькуьмлуье кумекии э жире пул дореи э хэржилугъи э восдореи оборудовани, гьемиге э ихдиёри доре хэйрлуье займгьо. Эзуш бэгъэй, молведешендеи минкин мошинвокурдеи еклуье согъ республике э кор венгесде эри молведешендеи гереклуье эри михьтожи миллетлуье гъэлхэнди хьуькуьм мол.

Эз гофгьой жигегир сернуьш вожиблуье жиге э у кор гьисди Догъистуние союз мошинвокурдегор. Корисохи эну миё бу э товун гуьрдноме зиёдгъувотлуьи мошинвокурдеи жэмигIэт регионе э кор тозе жире параменди ватани мошинвокурдеи еклуье согъ ве екиге ухшешие э угьо буьлуьндетехнологи отрасльгьо.

«Хьэсуьл омори гереки доре тозе себеб э хьэвес венгесдеи э кор союз, дешенде э эну десде нушудорегоргьо IT-отрасле, химикие ве жуьр-бе-жуьрелуье молведешендеи. Ижире жерге кор зу фегьмгери э омборгьо екигегьо регионгьо Уруссиет, э у хьисоб э Москов ве Москови область. Гьисдигьо гъэножогъи гереки ве э Догъисту. Чуь тегьеревоз у мибу сохде,- рэхь дегишбиреи ве э гуьнжо овурде тозе союзе енебуге дошдеи корсохдеи идорегьо,- гъэрор норе мибу дануьсде Союз мошинвокурдегор Уруссиет. Э и товун гуьре гьисди жэгIмие варасиреи э рэхьберисохиревоз Союзе. Везифе э гьеммейки е теклуьи – лап зеверие гъэдер э кор венгесде гьисдигьо молведешендеи минкини корхонегьо имуре ве гъобул сохде жерге кор э товун уре зеверсохи»,- гуфдири Газимагомедов.

Бэхшвегиригьо гуьрдлеме ексеслуье мейле гуьрди фикирнушудии хьэвес э фегьмсохе пуьрсуьшгьо, э у хьисоб, э товун гуьнжо овурде тозе Догъистуни региональни жейлее мескен Союзе мошинвокурдегор Уруссиет. Эзуш бэгъэй, бирмунди хьозуьрлугъи эки дуь эекиревоз гъэрорноме норе э и куьндлуье рэхькор везифе.

Эз артгьо гуьрдлеме доре омори э жиге омореи гъуллугъгьо жугьобдорлуье органгьо веровундеи хьуькуьм республике э товун э кор венгесдеи гъобул сохде гъэрорномегьо.