Вихденигьо компании э вихдеи сервор Уруссиет куьнд омореи э эхир эн хуьшде. Бэгъдовой е ченд рузгьо, э экуьнди гьисдигьо рузорине сер гуьрде серузине сесдореи. Иму, одомигьо Уруссиет, бире вихде сервор хьуькуьм э пушо дерие шеш сал.

Э вихденигьо бюллетени дарафди: Даванков Владислав Андреевич «Новые люди», Путин Владимир Владимирович (самовыдвиженец), Слуцкий Леонид Эдуардович (КПРФ). Гьерки хьову э буьлуьнде кор э хьуькуьм гьисди бовориние руй э Догъисту ве э гьемме регионгьо вилеет. «Догъистуе дузи» э пушо норе э угьо э гозит ихдилот сохде э комини программе хьовугьо рафде э вихдеи. НэгI сохде, чуьки гье у сохде федеральни бине. Оммо э пушой сесдореи гереки ихдилот сохде э товун программе хьовугьо, эри хундегоргьо дануьсде сохде вихдеи.

Э вэхьзилуье гофгьо эн Владислав Даванков гьисди е ченд гоф эеки «нумир еки э вихденигьо бюллетени». Э пушовихдение программе эн хуьшде у сохде гъэйгъу э бинелуье зиндегуни вилеет – вогордунде дузе вихдеи рэхьбергьо, доре уруссиетгьоре ихдиёри сер гуьрде оголномей вогордундеи хьовургьоре, рэхьбергьо, губернаторгьо. Рэхьбергьо жигее органгьо МВД, прокуратуре ве дивунчигьо хьову э пушо норе вихдеи одомигьо.

Даванков гуфдири э товун бэхш сохдеи пулдореире э бюджетни овгъотгьо, э пушо норе доре э дес сэхьиблугъ ве параменди сохде сафари, чуькле ве миглее бизнесе.

Э пушовихдение программе Владимира Путин, комики гьисди сервор хьуькуьм вокурде оморе э бине Фуьрсореи эну Федеральни Гуьрдлеме. Пресс-секретарь сервор вилеет Дмитрий Песков гуфдири, чуьки гъусо Путина 29-муьн февраль э Гъуногълуье хьэет бире пушовихдение программе эн хьову э сервори.

Э Фуьрсореи Федеральни Гуьрдлеме Владимир Путин э пушо норе рэхьо доре тозе миллетлуье проектгьо ве кумеки дореи кифлетгьоре, экономикере, соводие, социальни коргьо гене доре кумеки эри одомигьо Софун, Дуре Мизрэхь ве тозе жигегьо. У гуфдире, чуьки биёвгьо вихде оморе одомигьо эн вилеет – гье у жовонгьо ве бэхшвегиргьо СВО.

Рэхьбер ЛДПР Леонид Слуцкий гуфдири, чуьки дануьсде зиёд сохде коре Владимира Жириновского. Пушовихдение компании вокурде э гъэйгъуи эки регионгьо, ве социально гъувотсуьзе одомигьо. Бинелуье гофгьо эну гьисди: «гьемме эри хэлгъ». Слуцкий э пушо норе бэхш сохдеи э гIэрей Федеральни бине ве региональни, векенде гьемме гъэрдгьоре эн субъекторе. У бирмунде э песой дешендеи тозе пулвегирдеи эз хэлгъ э пушо норе хилос сохдеи эз пулвечиреи одомигьоре, комики муьзд жофои гьисди те 30 гьозор монет, сохде и пулгьоре чуьтам гереки сохде гье уре лап зофруе гъэдер муьзд жофои.

У э пушо норе гъэлхэнди сохди уруссиетигьоре эз гъононсуьзе пуллуье идорегьо, зофру сохди пуле э кредитгьо ве микрозаймгьо ве дешенде гъонун гъэлхэнди эз коллекторгьо.

«Вози сохдейм э капитализм ве веси» – ижире бинелуье гофгьо эн пушовихдение компание Николая Харитонова. Пушовихдение программе эну – гье у «программе бараси КПРФ ве совети хэлгъие-ватанхогьи гъувот». У э пушо норе Уруссиет шолумие ве демократически гирошдеи эки социализм. Э гофгьо Харитонове, гереки вегуьрде минерально-сырьевую бине эн вилеете, зевер сохде МРОТ те 35 гьозор монет, зевер сохде пенсиоре, стипендигьоре ве муьзд жофоире, доре процентсуьзе гъэрдигьо жовоние кифлетгьоре.

Ини бинелуье программе эн хьовугьо. ГьейсэгIэт е ченд гофгьо э товун хьозуьрлугъи Догъисту эки сесдореи. Э Догъисту э вихдеи сервор Уруссиет мибу э кор венгесде 137 комплексгьо эри винире бюллетенгьо эри сесдореи. Вихденигьо комиссие РД гировунди хундеи корисохгьо мескенлуье комиссие э кор э и комплексгьо.

Э вэхд хундеи э сенигIэткор ихдилот сохде э товун норе комплексе, фегьмсохи корсохи эну, дешенде эз бине вегуьрде оморе гьисдигьо, вегуьрдеи распечатокгьо эн протоколгьо э товун эхир сесдореи. Э хундеи дери лекцигьо ве корсохи.

Чуьтам э иму мэгIлуьм сохде э Избирком РД и пушогьо гирошде гуьрдлеме э сернуьш е гъэдер мескен вихденигьо комиссии (ТИК). Э унжо сернуьш Вихденигьо комиссие РД Магомед Дибиров, жигегир эну Багавудин Гусаев, кумекчи комиссие Саида Халидова гуфдири э товун веровунде федеральни проекте «Информ-Уик» э е гъэдер мескен республике, хьозуьрлугъи вихденигьо жиге ве вихденигьо комиссие эки гировунде сесдореи. Жейлее гъэйгъу бире дореи жигегьо эри сесдореи технологически оборудование, телефонгьо, транспортгьо ве пурсуьшгьо коре сохдеи дуь э екиревоз мескене вихденигьо комиссие э дивуни ихдиёрлуьи органгьо э кумеки дореи гуьнжолуьи ве жэгIмиет секонеисуьзи э рузгьо сесдореи. Екиш эз сернуьшгьо ТИК не гуфдире, чуьки гьисди четинигьо э хьозуьрлуги эри гировунде вихдеире.

Дузе бэхшвегири э вихдеи серворе гьисди э гьерки вихдегор. Унегуьре гереки сохде дузе вихдеи, э гьерки вихдегор гереки хунде пушовихдение программе эн хьовуре, офде э угьо гофгьо, комики куьнде эри эну ве доре сес эн хуьшдере э хьову, комики сохде хубе коргьо эри параменди вилеет.