Веровундегор гъэрхундигьой эн сервор Догъистуре Федор Щукин вохурди э бизнес-жэгIмет регионевоз гировунде оморигьо эки Руз эн уруссиетлуье сэхьибкори. Э вохурдеи бэхш вегуьрдебируьт премьер-министр Магомед Рамазанов, нушудорегоргьой эн чуькле ве миенее бизнес эн республике.
Ф.Щукин сэхьибкоргьоре омбаракбу сохди э оморенигьо мигIидевоз. Жейлее гофгьо худоразии гуфдире оморебу эз сэхьибкоргьо, комигьоки э сер хуьшде вегуьрдет социальни гъэрхундигьоре. Нушудорегоргьой бизнес кумеки сохденуьт нисд сохде эзуновлейге бире гъозиегьо эн сайловгьоре, кумеки сохденуьт э бэхшвегиргьой СВО ве э кифлетгьой энугьо.
«Хьуькуьм ире винирени ве гъобул сохдени. Кумеки дореи ишму э хьисоб вегуьрде миев кейки иму сер мигирим гьееки кор сохде»,- диеш гуфди веровундегор гъэрхундигьой эн сервор Догъистуре.
Веровундегор гъэрхундигьой эн сервор регионе ве премьер-министр Догъисту жугьоб дорет э сер пуьрсуьшгьой эн нушудорегоргьой бизнес.
«Вохурдеи гIуьзет сохде омори э четинигьо, комигьоки гьисди э кор ишму, ве э везифегьо, комигьореки иму чуьн хьуькуьм мие гъэрор сохим эри э гуьнжо овурде хуьшлуье овхьолете, чуьнки иму даним хэйр овурде эри республике»,- гуфди веровундегор гъэрхундигьой эн сервор Догъистуре.
Ф.Щукин хубе жугьоб дори э оголзереи эн шушудорегор завуд эн полимерни товгьо «Эксонор» эн Низами Балакеримов оморе ве фегьм сохде корхонере.
«Шор мибисдорим винире завуд ишмуре ве шинох бире э кор энуревоз. Э мейдун иму мигировуним гуьнжолуье вохурдеи. Хьозуьр сохит егъинлуье фикиргьо, чуьтами кумеки иму миданим доре э ишму»,- гуфди Ф.Щукин.
Гереки гуфдире, дуьруьжде э СКФО корхоне кор сохдени эз 2024-муьн салевоз, э унжо ведешенде оморени товгьо эри дигьлуье хозяйство, эри объектгьой газерасундеи, гIоверасундеи, электрорасундеи. Э проект дешенде омори эз 3 млрд монетгьо омбарте.
Нушудорегор эн «Опоры России» эз Ф.Щукин пуьрси, чуьтам вокурде миев кор э товун гъонунлуь сохдеи бизнесе э регион. Ф.Щукин гуфди, ки рэхьбергьой республике, егъин, мерэгълуьни э у, чуьнки бизнес ведиров эз «сое».
У диеш гуфди, ки везифей эн имбурузине вохурдеи – шиновусде очугъ-ошкоре пуьрсьшгьой бизнесе ве гъэрор сохде угьоре.
Э вохурдеи сернуьш эн жигенлуье отделение «Деловая Россия» Русланбек Каджимагомаев эз веровундегор гъэрхундигьой эн сервор Догъистуре пуьрси э товун гъисмет эн бизнес-институтгьо, гьемчуьн э товун ексохдеи Агенстворе э товун сэхьибкори ве инвестициегьо э Министерство экономически парамендиревоз.
«Э муниципалитетгьо гьисди жигегиргьо, жугьоб доренуьтгьо эри сэхьибкори, оммо егъинлуье кумеки э и тараф нисди. Иму дануьсденим э товун четини ве везифей иму – дегиш сохде овхьолете. Чуь расирениге э гировундеи кор эн агенствой министерстворе, иму фикир сохденим, гереки сук сохде»,- гуфди Ф.Щукин.
Премьер министр эн Догъисту М.Рамазанов эз тараф хуьшде гуфди, ки гереки э гуьнжо овурде хуьшлуье овхьолет эри параменд сохдеи бизнесе.
«Иму э суьфдеи нубот мие хэйрлуь бошим эри бизнес»,- гуфди у. Гьемчуьн у гуфди, ки органгьой хьуькуме воисдени гъувот доре сэхьибкоргьоре, кор сохденуьтгьо ошкорлуь ве номуслуь.
Гьемчуьн пуьруьш сохде оморебу пуьрсуьш кор сохдеи бизнесе э сетевой алверлуье компанигьоревоз. Веровундегор гъэрхундигьой эн сервор республикере риз кеши, ки гъувотдореи жигенлуье молведешендегоргьоре ве фурухдеи молгьоре — еки эз суьфденуботлуье коргьой Догъистуни.
Э товун четинигьой фурухдеи ведешенде оморенигьо молгьоре ихдилот сохди Павел Тарасов, еки эз сэхьибгьо эн консервни завуд ООО «ПОШ» — эн дуьруьжде ведешендегор хуьшге хьэвуьжгьоре э Догъисту. Идорере воисдени кошде зейтуне богъче. Премьер-министр М.Рамазанов молведешендегоргьоре боворини дори э гъувотдореи: «Иму мивохурим э корлуье овхьолет ве пуьруьш мисохим проект ишмуре. Иму хьозуьрим кумеки сохде э вожиблуье хьэвесгьо.
Э вохурдеи сэхьибкоргьо ихдилот сохдебируьт э товун барасигьой хуьшде, гуфдиребируьт э товун четинигьо, ихдилот сохдебируьт э товун хэелгьо ве фикиргьо – э гьеммей энугьо рэхьбергьой республике тигът мидуьт.
Э эхир вохурдеи сеч биригьо сэхьибкоргьоре доре оморебу хьуькьметлуье бэхшгьо. Ф.Щукин эри гьеммейки хосди жунсогъи, хушхьоли ве гуьлишолуьи корхонегьоре, ве имид бири э песдеине хэйрлуье еклуье корсохдеи.
