Сернуьш Хьуькуьм Догъисту Абдулмуслим Абдулмуслимов бэхш вегуьрди э гуьрдлемей эн гIэрейведомственни зутее штаб э товун ниссохи эзуновлейге бире гъозиегьой ЧС э мескен эн Республике Догъисту ве эн Чеченски Республике. Гуьрдлеме гировунде оморебу э ГУ МЧС Уруссиет эн Республикей Догъисту. Гуьрдлемере гировундебу сервор Департамент эн граждански гъэлхэнди одомигьо эн МЧС Уруссиет Олег Мануйло.
Э кор гуьрдлеме гьемчуьн бэхш вегуьрдебируьт жигегир эн пуреихдиерлуье нушудорегор эн Президент РФ э СКФО Магомед Рамазанов ве вице-премьер Рамазан Джафаров. Э жирей ВКС – нушудорегоргьой эн Уруссиетлуье потребительски назари эн Уруссиет, эн Росгидромет, эн федеральни министерствой вокурдеи, эн министерство жунсогъире дошдеи, эн министерствой соводи, эн Минтранс, Минэнерго, Минцифры, Росводресурсгьо, Ростехнадзор ве эн министерство дигьлуье хозяйство.
Экуьнди 19 гьозор хунегьо фегьм сохде омори э Догъисту бэгъдовой сайловгьо
Э имбурузине руз э зир гIов демундигьо хунегьо ве муьлкгьо нисди.
Э Хасавюртовски район темиз сохде оморени эз муьрдалигьо.
«ГьейсэгIэт назари сохде оморени догълуье жигегьо, эже хори лов бире фураморени. Э вечире оморигьо даннигьо гуьре, зарали зере омори э 7 гьозор хунегьо омбарте, комигьореки гереки гъуьч сохде», — ихдилот смохди Р.Джафаров.
Э имбурузине руз э 13 ПВР жиге доре омори 546 одомигьоре. Уруссиетлуье потребительски назари РД, МЧС Уруссиет, э и хьисоб Донской ве Тульски хилоссохие меркезгьо, МЧС Догъисту ве волонтергьо темиз сохденуьт мескенгьоре.
Э зараливегуьрдегоргьо э Догъисту расунде омори 345 млн монетгьо
Сервор эн министерствой жофо эн РД Магомедзагид Кихасуров мэгIлуьм сохди, ки жэгIмие гъэдер пулгьо эри 27-муьн апрель гуьнжуьнде омори 345 млн монетгьо. Пулгьо доре омори э 8 190 эрзогьо гуьре.
Эз угьо евэхдине – 5662 муьзде дореигьо э 88 млн монетгьо. Эри зарали зере оморигьо девлет – 2525 муьзде дореигьо э 256 млн монетгьо.
Э Москов оморигьо верфгьо-ворушгьо кори нисе сохденуьт э сер Догъисту ве Чечня
Жигегир сервор эн идорей хьуькуьметлуье фегьмсохие сеть ве эн гIилмие гешдеи эн Росгидромет Федор Козлов мэгIлуьм сохди, туфтуфон, комики гьейсэгIэт кори сохдени э европейски жигегьой Уруссиет, э сер Чеченски Республике ве эн Республикей Догъисту кори нисе сохде.
Объектгьой гIоврасундеи гъуьч сохде оморени э Догъисту э гIэрегьой ниссохдеи эзуновлейге бире гъозиегьой эн сайловгьоре
Системегьой гIоврасундеи кор сохдени гьеммишеинере хуно э МО; шегьергьо Махачкале, Каспийск, Избербаш, Буйнакск, Догъистоние Огни, Дербенд, Кизляр, Дорум-Сухокумск ве Хасавюрт, — мэгIлуьм сохди суьфдеи жигегир эн министр вокурдеи, архитектуре ве ЖКХ РД Салам Гасайниев.
Э товун шегьер Хасавюрт: э товгьой гIови «Акташ» гIов оморенигьо жиге вачаруьсде оморебу гьееки э валевоз эри вечиреи гIове. Гьонине вэхд вал гъуьч сохде оморени ве дегиш сохде оморени ерх те товгьой гIови «Акташ».
Э товун Карабудахкентски район: э сереботи э район гирошдигьо черверурие гIэзор Уруссиетлуье потребительски назари гировунди фегьмсохие коргьо, одомигьоре доре оморени шишее гьенжиренигьо гIов. ООО «Дезинфикционист» э гьемме районгьо темиз сохдени гIовдонгьоре. Э дигь Карабудахкент э системегьой гIоврасундеи фегьм сохде оморени качествой гIов. Те эхир апрель бегьем сохде миев эз 80% гъуьчсохие коргьо омбарте.
Э товун Хасавюртовски район: э дигьгьо деригьо артезиански буругъгьо батмиш биребу, э дигь Аксай насосни станцие ве 1 насос хуьрд бири; э дигь Новосельски гIов хэржи сохде оморени эри технически коргьо. Э дигьгьо Кадыротар, Тутлар ве Целитни темиз сохде омори 3 буругъгьо, школегьо, ФАПгьо ве больницегьо.
Э Дахадаевски район хэреб бири бинелуье товгьой гIови э районни меркез эн дигь Уркарах. ГIов доре оморени эз гIовдонгьо.
Э товун Сергокалински район: СП «сельсовет Дегвинский» — товгьой гIови э «Аймази» э дуразовуне 2400 м. гъуьч сохде омори. СП «сельсовет Миглакасимахинский» — товгьой гIовире, рафденигьо эз мэгIидон «КIиярулла» гъуьч сохдет жигенлуье одомигьо. Э дуь объектгьо гировунде оморени гъуьчсохие коргьо.
Гъонунсуьзе вокурдеигьо э ен нуькере Тарнаирке эз бине векенде оморени э Махачкале
Э Махачкале эз бине векенде оморени гъонунсуьзе вокурдеигьо, дегмиш биренигьо э гирошдеи гIовгьоре э ен нуькере Тарнаирке – ихдилот сохди суьфдеи жигегир эн сервор администрацие эн шегьер Махачкале Нариман Батырбиев.
Фегьм сохде оморигьо мескенгьо эз проспект Акушински те битехьэимгьой шегьер.
69 гъонунсуьзе алверсохие объектгьо нисд сохде омори э ен нуькерей Ярык-су э Хасавюрт
Суьфдеи жигегир эн сервор администрацие эн Хасавюрт Арслан Арсланович ихдилот сохди, ки алверие объектгьо э ен нуькере Ярык-су гьер руз эз бине векенде оморени э график гуьре.
Эри гирошдигьо дуь рузгьо эз бине векенде омори 35 алверие жигегьо. Гьемме э дуь руз эз бине векенде оморебу 69 объектгьо.
Серворгьой эн Хасавюртовски ве Дербентски районгьо ихдилот сохдейт э товун гирошденигьо овхьолет э муниципалитетгьо
Сервор эн Дербентски район Эльман Аллахвердиев ихдилот сохди, эри гирошдигьо рузгьой форигъэти э гIэрей э пушо норе оморигьо везифегьо эри Мамедкале омбаре коргьоре гировундет нушудорегоргьой эн Донской хилоссохие десде эн МЧС Уруссиет.
«Ведеберде омори хори, гировунде омори дезинфекцие ве э объектгьо хушд сохде омори гьомборгьо. Гьемчуьн э гIэрей гировунде оморигьо шобботи вечире омори кучегьо. 55 комиссиегьо фегьм сохденуьт хунегьоре ве муьлкгьоре эри гъиметдии заралире»,- гуфди сервор эн Дербентски район.
ВРИП эн сервор Хасавюртовски район Багаудин Мамаев ихдилот сохди, ки гъимет норе омори овхьолет эн 750 хунегьо, эз угьо кимигьоре гереки гъуьч сохде, кимигьо эри зигьисде гIэмели нисди ве кимигьо вачаруьсде омори. Эри кимигьо хунегьо документгьо нисди.
Э товун артгьой пуьруьшсохи доре омори е жерге гъуллугъигьо.
