Гьово музыке – гье и еки эз гуьнжуьнденигьо культури код гьер хэлгъэ. Музыке бирмундени гье уре, чуь гlэмел нисе оморе э гофевоз, гье уре, э товун чуь гlэмел нисе оморе сессуьзлуь бире. Динлуье жугьури музыке бигlэдотлуь буьзуьрглуьи. Ве Москови мердине жугьури капелла неки е гиле гье и субут сохди э гуш венорегоргьой хуьшде. Омборте произведенигьо, веровунде оморигьо капеллой, сес доре э гъиребирсохи Михаила Ашурова.
— Сер мигуьруьм эз динлуье пуьрсуьш: чуьни эри ишму варасиреи «чуькле гъовуме ватан»?
— Неки энжэгъ нуьгде э карт, оммо жиге, эже эз хьэсуьл омореи хуте бирейм э гlэдотгьо гьемшегьери культуре. Гье и гьемиге ве ергири гlэильети: Суьфдеи хуне, хьэёт, школе, хьэрмэхьгьой гlэильети. Гьемме гье и, гьелбетте, чуьтам ве гьер одомире, ме фикир сохденуьм, огол зере войге вогошде э у вэхд.
— Эзжеи гъумолет келетегьой ишму, деде-бебе, чуь кор сохдет, комини верзуьшигьо ишму хуте бирейт эз угьо?
— Бебе хьэсуьл омори э Нальчик, деде-бебе ю гьемиге бинелуье нальчанигьо. Деде хьэсуьл омори э Москов, бебе ю эз Дербенди, деде – эз Бердичев. Деде-бебей ме сохдет кор тербиедорегори. Лап муьгьбетлуь бирет эки музыке, оммо угьоре нисди музыкеи соводи. Унегуьре имуре, се гlэиле, дорет э тербиевегуьри э музыке эз суьфдеи класс школе. Ме рафдем э музыкальни школе №2 э Нальчик. Гьечуьни хьозуьрлугъи эки музыке э хун иму дери.
— Москови мердине жугьури капелларе 35-муьн сали. Чуьтам ишму оморейт э и коллектив? Ихдилот сохит э товун эну.
— Эри, десдей мэгlнихун имуре омборе сали, оммо э тойсохи э гъэдимие ижире коллективгьоревоз у жогьили, пурлуье гъувотевоз ве хьозуьри эки муьгlуьжуьзлуье барасигьо. Э коллектив ме оморем э хогьиши бебей хуьшдеревоз ве те имбурузине руз божеренлуь рэхьберденуьм коргьой хуьшдере ве жейле – э десдей мэгlнихуни зиндегунире. Бинелуье кор ме э музыкеревоз бесде нисди ве гьелелуьге гьисди мэгlдон бинелуье гьэзенж. Белкине, э вэхдевоз гьемме дегиш мибу.
— Гlэмел миёв ми гуьфдире, Чуьки гьэгъигъэтие рачи музыке гуьнжуьнде оморени эз у, чуь гуьрд сохде одомигьоре? Эз чуь дечире оморе репертуар капелла ишму, гьисди ми э гъэд угьо мэгlнигьо э жугьури?
— Ме хьисоб сохденуьм, чуьки гьэгъигъэтлуье рачи музыке гьисди э божеренемэгlрифет эну бирмунде уре, чуь минкинсуьзи гировунде гофевоз, эз сер гьис. Э репертуар десдей мэгlнихун иму гьисди лап омборе произведенигьо, э у хьисоб дин-догlоти ве хэлгъи, гьеймогьоине гъиребирсохи ве э оригинал. Э вэхд гирошдеи песини се сал репертуар иму пурлуь бисдо мэгlнигьоревоз э жугьури. Гье и эри иму э тенсохи тозе кори, оммо иму параменди биреним ве кор сохденим эри хубте сохдеи гье и музыкеи стиле ве рэхькори. Везифе асант нисди, чуьнки нуьвуьсдеигьо ижире музыке лап кеми эз себеб эну, чуьки десдей мэгlнихун гьевел нисе веровундет произведениегьоре э жугьури. Иму веровунденим, гlэмел миёв гуфдире, гlэжоиблуье кор тозеденсохи ве нуьвуьсдеи ижире музыке.
— Э комини данани вегуьрдеи идоре ишму хуте бирейт музыке, вокальни мэгlрифет? Ки эз классически мэгlнихунгьо муьгьбетлуьи эри ишму?
— Музыкеи данани ме вегуьрдем э дирижерско-хоровой факультет Академие нум Гнесиныгьо. Э вокальни карьера ме кор не сохдем, гъэрезки э гъиметдии кимигьо, негьогъи.
— Комини жиге э зиндегуни ишму гуьрде дин-догlоти?
— Асанте пуьрсуьш нисди, жугьоб доре э комини гье бирден, минкинсуьзи. Ме келе бирем э светски кифлет, оммо зиёдгуьзели э ёр ме гьисди куьндлуь келете эрхэ эки дин-догlоти. Иму гьеммише нушу дореи бинелуье мигlидгьоре э кифлетевоз ве эри ме гье у бу себеб э хьэвес венгесдеи диеш дуразкеши гье у э кифлет ме. Иму э хоширевоз гировунденим мигlидлуье суьфре веровундеигьо, э коминигьо гlэилгьо шинох биренуьт э товун мигlидгьой иму ве гlэдотгьо. Ве мере лап воисдени, эри чуьки э биёвгьо вэхд э кифлетгьой гlэилгьой иму гье и гlэдотгьо диеш дуразкеши бу.
— Ишмуре мундени вэхд э комининиге эн хуьшдени мерэгълуьигьо енебуге музыке вегуьрдени гьемме вэхд ишмуре?
— Э суьфдеи нубот ме э бинелуье кор мерэгълуьнуьм. Оммо э музыке хьэрекети веноре бегьеми вэхд доре, эри чуьки веровунде везифегьоре э десдей мэгlнихун корисохи, гьемиге нуьвуьсдеи тозе аранжировкегьо эри коллектив иму.
— Чуь несиет ишму мидорит э жогьиле одомигьо, коминигьоре воисдени гlуьзетлуь бире э хотур гьисдигьо музыкальни ве вокальни даннигьой хуьшде?
— Ме несиет мидоруьм сергуьрденигьо гьово музыкеи веровундегоре кор сохде э сер жирелуьи хуьшде. Э гьонине вэхд, э ме гуьро, асанти вогосунде тигъэти эки гуьнжуьнде оморе чи хуьшде э соцсетигьо ве гьонине оборудованиегьо эри гуьнжолуьи теке жейлее гуьнжо овурдеи.
— Согъ боши ишму, Михаил, эри менфигlэтлуье меслэхьэт.
Нуьвуьсди Стелла Давыдова
Тержуьмесох Ильканаева И.
Сирот STMEGI
