Э Догъисту сер гуьрде омори лешгерие-ватанхогье мероприятиегьо эки Руз эн Буьзуьрге Бесгъуни.
Еклуье гуьрдлеме эн Республикански оргкомитет «Бесгъуни» ве эн Республикански оргкомитет э товун хьозуьр сохдеи ве гировундеи э Догъисту мероприятиегьоре, гуьзет сохде оморигьо э Сал еклуьги эн хэлгъгьой Уруссиет, гировунде омори э зир рэхьберьети эн вице-премьер Муслим Телякавов.
М.Телякавов тигъэте чарунд э у, ки гьэгъигъэт еклуьги хэлгъгьо бири вожиблуье гъозие эн Бесгъуни э Буьзуьрге довгIой Ватани. Э гIэрегьой хьозуьрлуьгъи эки мигIид эн 81-сали Бесгъуни ве эки Сал еклуьги эн хэлгъгьой Уруссиет гировунде миев омбаре мероприятиегьо, э и хьисоб гьерсалине акцие «Гъэлем Бесгъуни» ве лешгерие парад э шегьер Каспийск.
«Э салгьой эн гурунде синемишигьо одомигьой эн гьемме республикгьой эн келе вилеет иму вэхуьшдет душ эки душ эри гъэлхэнд сохде Ватане. Э довгIо гъовхо бердебируьт нушудорегоргьой эн жир-бе-жире миллетгьо, э дорун е ченд миллион одомигьо кор сохдембируьт э хотур эн жэгIмие везифе – Бесгъуни. Гъувот Догъисту гьейсэгIэт ве умогьое хуно, — е еклуьги эн хэлгъгьой энуни. Эри Догъисту гъосуьт еклуьгире гьисди жирелуье мэгIэно, регион иму – жирелуье нишоне эн омбаредеврие зиндегуни эн омбаре хэлгъгьо, эн зугьунгьо, базургенди ве эн гIэдотгьо», — гуфди М.Телякавов.
Э гIэрей вожибуьигьо:
— келе акциегьо «Георгиевская лента». «Окна Победы», Парад эн ворисгьой Бесгъуни э апрель-май;
— межлуьслуье вокурдеи Республикански «Вахта памяти» ве акциере «Пост №1». Вахта еровурди ве 55-муьн слет ТОКС гировунде миев 23-муьн апрель э богъче э нум Ленински комсомол;
— 24-муьн апрель гировунде миев гIэрейхэлгъие акцие «Диктант Бесгъуни», бэхш мивегинуьт эз 10 гьозор одомигьо омбарте э 166 жигегьо.
— вокурдеи богъчере «Патриот» э шегьер Дербенд – гьемме вокурденигьо-монтажни коргьо бегьем сохде омори ве гьейсэгIэт норе оморени сиротгьой эн игидгьой СВО;
— эз май-август ве эз июнь-декабрь э мескен МО, гировунде оморени ватанхогье акциегьо «Равнение на флаг» ве «Гим России всем Дагестаном».
Э гIэрегьой эн Сал еклуьги эн хэлгъгьой Уруссиет э Догъисту гировунде миев конференциегьо ве форумгьо, гуьзет сохде оморигьо э пуьрсуьшгьо.
Гировунде миев е жерге мероприятиегьо э 2026-муьн сал:
— э гIэрегьой Руз эн зугьунгьой эн хэлгъгьой РФ гировунде мив гIэрейрегиональни конференцие эн рэхьбергьой ОИВ, эже э пушо норе миев везифегьо э товун э кор венгесдеи Стратегие эн хьуькуьметлуье миллетлуье политике РФ э вэхд те 2036-муьн сал.
— эки Руз эн еклуьги эн хэлгъгьой Догъисту э план гуьре гировунде миев форум «Гъувот Уруссиет э еклуьги эн хэлгъгьои», гьемчуьн Софун-Кавказски книглуье фестиваль «Тарки-Тау» эже бэхш мивегинуьт эз 40 дофусхонегьо омбарте.
— эки Руз эн хэлгъие еклуьги гировунде миев Форум эн гIэреймиллетлуье разименди «Уруссиетлуье Кавказ».
