Сергей Меликов гъобул сохди бэхшвегири э гуьрдлеме правкомиссие эсер нисдсохи эзуновлейге бире гъозиере батмиш биреигьоре э Догъисту ве Чечне. Уре гировунди сервор МЧС Уруссиете Александр Куренков.

Э ёр овурденим, гьевел Александр Куренков э вэхд рафдеие коре э Догъисту ве Чечне гъиметдии корисохи нисдсохдеи эзуновлейге бире гъозиегьо, гъэрор норе везифегьоре эсер зурие тозеден э хуьшде дировундеи буланмиши кеширеи е гъэдер мескене ве гъэдергьоре кумекии дореи зигьисдегоргьоре.

«Гъувоте зиёд сохде омори коре комиссие э гъиметдии бедхэржире, гьемчуьн зевер бире кучмиш сохдеие десдесохи гъувотгьоре ве овгъотгьоре э песой хьисоб гешдеи эз инжо э унжо беделгьоре МЧС Уруссиете эз екейгегьо регионгьо.

Эзуш бэгъэй, МЧС зиёд сохде кумекии дореи региональни хьуькуьмгьоре э гуьнжо овурдеи зурие пуллуье муьзде дореигьоре.Зигьисдегоргьо буланмиши кеширеигьо районгьоре уже угьоре вегуьрди»,- мэгIлуьм сохди Александр Куренков.

Еклуье везифе песдеине корисохигьо эсер тозеден э хуьшде дировундеи зиндегунире э буланмиши кеширеигьо районгьо мибу э гуьнжо овурде э куьнде вэхд. Когъозе пуьруьш мисоху ве тогIин мисоху э нуботлуье гуьрдлеме правокомиссие.

Жирелуье тигъэти мибу доре тозеден э хуьшде дировундеи зигьисдение хунегьоре, транспортни инфраструктурере, социально вожиблуье объектгьоре ве системе ЖКХ.

Гьемчуьн э гуьрдлеме бири бирмунде, чуьки Минсельхоз гъиметдии дуьруьжди бедхэржире хоригъуллугъсохдегоргьоре ве шинох сохде фикиргьоре эсер муьзде дореигьо. Минфине э пушо поисди э кор венгесдеи очугъэтеггьер везифе дегирдеи хэржигьоре. Александр Куренков руй бире эки Роспотребнадзоре э дилегевоз вегуьрде э жирелуье фегьмсохи санитарно-эпидемиологически овхьолет иловлеире э буланмиши кеширеигьо районгьо.

Сервор МЧС Уруссиете везифе нори тозе корие рафдеире э буланмиши кеширеие е гъэдер мескене, эри хуьшдени ю фегьм сохде ве дуз сохде корисохигьоре гьеммей зурие гъуллугъсохигьоре, гьемчуьн гъимете вес биреи гъобул сохдеие гъэдергьо кумекии могьлугъе.