Иму меслэхьэт сохденим э очугълуье нушудорегор эрхэ жогьиле духдергьо, нум эну – Михаль Пейсахова. Рэхь эну пурлуьи очугъэ гъозиегьоревоз ве кондуьллуье войгегьоревоз дегиш сохде гlуьлом эки хуби.
Михаль гурунд гирошди рэхь, э зиндегуни венгесдеи войге гlэилире э товней рафдеи эз дуьлхошие Пятигорск э дилбоше желдлуье Москов, барасилуь варасунде бегьем сохди хундеире э сфере сафари, бисдо мэгlлуьмлуь SMM-сенигlэткор ве гьисди уре сэхьиблуье барасилуье блог, вечири гьозоргьо хундегоргьо.
Э вэхд меслэхьэт сохде иму дануьсденим, эйчуь и гьейвэхдине духдер хьэрекети сохде вокурде сэхьиблуье кор, нуьвуьсде музыке ве мэхьшево сохде гьоволенг шенде э парашютовоз, э рэхь офдоре э сафари э гlуьлом ве бире куьндлуь э ки бинегьо жугьури хуьшде. Вокурдеи э иму, Михаль бэхшбире лугъондлуье жейлее фикиргьоревоз э товун вожиби боворини, ниетдореи ве муьгьбет э ки хэлгъ хуьшде, бирмундеи меселен гъувотлуье зен, пурлуье хэёл ве келегедеи хуьшденхогьи.
— Шалом Михаль. Эже туь хьэсуьл оморей?
— Ме хьэсуьл оморем э Пятигорск, оммо эз жовоне салгьо мэхьшево сохдем э товун зиндегуни э Москов. Эри ме гьечи омори, чуьки чуькле шегьер ни дануь доре у минкин, комини вокурдени шогьнишон. Варасиреи, чуьки эри духдер догъи гирошдеи эз е шегьер э де шегьериге – асант нисди ве кими вэхд гъинемише гърорноме, ме эз гlэили гъирьетлуь кор сохдем, вечирем гьер кепик эз муьзд жофои, эри чуьки ебо ниет хуьшдере веровунде.
— Эже зигьисде гьейсэгlэт? Гьисди ми торих гирошдеи, эгенер у веровунде омори?
— Еки ним сал песево бебейме фикир сохди гирошде гьееки. Э у дэгъдэгъэ ме гьис сохдем нисе бирение мозол: ме у вэгlэдо бегьеми кура сохдем овгъотгьо, мэхьшово э товун, чуьки э ён ме мибу куьнде одоми, сохди у пойнореире лап асантлуье ве динжлуье.
— Эже туь хундеи вегуьрдей?
— Ме хундем э ПГУ (Пятигорски хьуькуьмлуье университет) э колледж э факультет гlэрейхэлгъие сафари ве де вилеетиге зугьунгьо.
— Чуьтами нум сенигlэт туь?
— Сенигlэт ме менеджер э сафари, оммо е рузиш кор не сохдем э сенигlэткори хуьшде. Гьемиге ме гирошдем лап омборе зеверсохи синогъире бэгъдовой тербие вегуьрде э коледж.
— Эже туь гьейсэгlэт кор сохде?
— Э гьонине вэхд ме кор сохденуьм SMM-сенигlэткор э жугьури жовони жэмигlэт OLAMI.
— Комини блог туь бердени? Кей сергуьрдей уре берде? Э комини гъосуьт? Чендгъэдер подписчикгьо гьисди туьре?
— Блог эн ме – гье у очугъэ екбиреи эз зиндегуни эн ме, гьейвэхдине мода ве гьемме, чуь дегесундени. Ме омборе сал берде соцсетьгьоре, оммо зиёди гъувотлуь дарафдем э и рэхь еки ним сал песево, ве гьеймогьой гушдошдегоргьой эн ме гьисди э се тургьо – гье и омборте 210 гьозор одоми. Бэшгъэ текебури сохденуьм «Инстаграмовоз» (Meta, корисохи комини э РФ гlэмел нисе оморе) – унжо мере гьисди 76 гьозор подписчикгьо!
— Чуь мэгlэнолуьи гоф «тренды» э туь варасиреи?
— Ёгъинлуье гъосуьт, лап фирегь мэгlлуьмлуье, коминигьо вечири омборе гъэдер лайкгьо ве гъондуьрмиш сохдеи.
— Эри ме тренд – гье у эз гьемме гьевел зугьун, э коминики гоф сохде гушдошдегоргьой эн ме инжо ве гьейсэгlэт.
— Гье и нисди асант фирегь мэгlлуьмлуье сес енебуге мэхсере, гье зинде гlов, бирмунденигьо жэгlмлуье хьолгьоре. Везифей эн ме – нисди асант гуьрде гье и тулгъуне, гъонмиш биреи дарафде э гофсохи, диеш зиёд сохдеи э у чуьниге эн хуьшде. Меселен, и пушогьо ме ведешендем мэгlни ве желдлуь э пушой ведешенде уре сирот зерем кутэхьэ видео э трендови жире. Гье у дори хубе бараси – э трек эн меревоз сирот зерет дегьигьо одомигьо.
— Ихдилот сохит э товней дин-гlэдотгьо кифлет ишму? Угьо догълуье-жугьури?
— Чуь э товун гъэножогъи эки дин-гlэдотгьо: ме гьеммише дануьсдем ве текебури сохдем, чуьки ме гьисдуьм жугьур. Э хуней иму гьич вэхд не бири гушд хуги, гьемиге иму хьэрекети веноре не хурде гушдини э шириревоз. Э песах иму гьеммише хурдейм гъогьол ве э пушой мигlид гьемме нуне ве хамеце ведебердейм эз хуне. Кифлет бебе бежид гоф сохди э жугьури. Ме рафдем э нумаз э дерсгьо э Пятигорск.
— Эзжеи гъумолет деде-бебей эн туь, келедеде ве келебебе? Туь гоф сохдени э жугьури?
— Бебе хьэсуьл омори э Махачкале, дедей эну (келедедей эн ме) эз Дербенди, бебей эну (келебебей эн ме) – эз Грозный. Деде хьэсуьл омори э Моздок (Северная Осетия), келедеде – эз Нальчик, Келебебе эз Махачкале. Э гlэили ме гоф сохдем э жугьури, оммо гьммере фурмуш сохдем ве э ёр ме гьисди энжэгъ эз гьемме фирегь мэгlлуьмлуье е келме гофгьо.
— Комини гъосут гьисди туьре э имбурузине руз? Ве комини войге?
— Мере гъосутгьо омбори. Бинелуье – гье и вокурде бизнес хуьшдере ве ведарафде э зиёдте гьуьндуьре гъэзенж, параменди бире э блог ве зевер сохде блог хуьшдере. Диеш омборте нуьвуьсде музыке хуьшдере. Гьемиге мере воисдени вереморе несигlэтие. Гьер мегь ме норенуьм эри хуьшде экуьнди 30-40 гъосутгьо ве херекети норе веровунде 70% эз угьо. Метлеб эн ме – гьоволенг шенде э парашютовоз ве рафде э Японие. Гье гене – гирде э хуне морскую свинку.
Ве серворлуье ниет – омборте элчэгъсуьзе кумеки сохдеи э екиге жугьургьо.
— Мидани доре несиет угьоре, эри ки вожиби зевер сохде гъэдер подписчикгьоре э канал хуьшде?
— Эри ме эз гьемме гьевел гье и – боворини э Х-до. Песде э гуьнжо овурдеи: бежид гировунде съемкегьо ве тигъэти бире эки трендгьо. Ве боворини э хуьшде, чуьки гьемме э гуьнжо овурде миёв, не денишире э у, чуьки барасигьо гьеле веди нисди.
— Согъ бошит, Михаль, э дуьлхошие гофсохдеи! Войге сохденим эри ишму песдеине офире барасигьо, веровундеи гьемме везифегьоре ве проектгьоре, веремореи блог ишмуре ве музыкеи карьера. Бигьил гьер тозе руз шори биёру, хьэвес ве бэхд, муьгьбет куьндлуьегьо пурлуьсоху дуьл гермиревоз ве товушевоз. Хубе хьол ве хьэёлуьи эшгъдорегор омбортегьоре, ве иму боворинлуьим, чуьки э пушо ишмуре гузет сохде тозе барасигьо ве очугъэ гъозиегьо!
Нуьвуьсди Лея Гаврилова
Тержуьмесох Ильканаева И.
