Жигегьой дошдеи дигьлуье хозяйственни молгьоре э Догъисту э 2026-муьн сал зиед сохде миев те 60 гьозор тонн.
Эри песини 2 салгьо э республике э кор венгесде омори мейво-хьэвуьжлуье гьомборгьо эже дошде миев 30 гьозор тонн. Э хьисоб эн дуьруьжде инвеспроектгьо – КФХ «Сад», «Полоса», «Анжелина» ве «Дагагро». Э 226-муьн сал корхонере воисдени зиед сохде жигегьой дошдеи мейво-хьэвуьжлуье молгьоре те 60 гьозор тонн.
Зиед сохдеи гъэдергьой дошдеи дигьлуье хозяйственни молгьоре – еки эз вожиблуье везифегьои эн Хьуькуьм РД э гIэрегьой параменд сохдеи дигьлуье хозяйственни комплексе. И и хьисоб вокурдеи ве хубте сохдеи жигегьой дошдеире, э гуьнжо овурдеи овхьолете эри омбаре вэхд дошдеи мэхьсуьле, э кор венгесдеи гьеймогьине технологиегьой темиз сохдеи ве депучундеи молгьой хурекире. Ижире чорегьо кумеки сохдени гуьрде гъиметгьоре эри молгьой хуреки, расунде э одомигьо хубе молгьой хурекире эн жигенлуье корхонегьоре ве параменд сохде АПК.
Э ер биорим, комини объектгьо вокурде оморебу э песини 4 салгьо э Догъисту:
— Мейво-хьэвуьжлуье гьомборгьо эже дошде оморени 3 гьозор тонн э дигь Речное эн Кизлярски район. Инвестпроет эри 1,4 гьозор тонн емишгьо ве 1,6 гьозор тонн хьэвуьжгьо э кор венгесди СПоК «Стимул».
— Э дигь Тинит эн Табасарански район кор сохдени онгур-мейво-хьэвуьжлуье гьоборгьо эже дошде оморени 1 гьозор тонн.
— Гьеймогьине мейво-хьэвуьжлуье гьомборгьо ООО «Полоса» эри 12,5 гьозор тонн э Сулейман-Стальски район. Компание вокурдени мейво-хьэвуьжлуье гьомборгьо эже дошде миев 50 гьозор тонн. Проект э кор венгесде оморени э е ченд бэхшгьо, 2 бэхш бегьем сохде миев э 2026-муьн сал.
— Промышленни мейво-хьэвуьжлуье гьомборгьо э гереклуье гермиревоз эри 1,5 гьозор тонн э кор венгесде омори э дигь Урма эн Левашински район. Сергуьрдегор эн проект – СПоК «Махи».
— 5 гьозор тонн емишгьоре дошденигьо гьомборгьо вокурде омори э дигь Джепель эн Магарамкентски район. Сергуьрдегор – КФХ «Сад». Э апрель 2025-муьн сал э кор венгесде омори дуйимуьн нубот, зиед сохде омори жигегьой дошдеи мейвогьоре те 10 гьозор тонн.
— Гьеймогьине буьлуьндетехнологически мейво-хьэвуьжлуье гьомборгьо эже гье евэхди гIэмел миев дошде 1500 тонн мол, кор сохдени э Хасавюртовски район. Гьонине вэхд барасилуь э кор венгесде омори 1-муьн бэхш.
— Э Дербентски район ООО «Анжелина» э кор венгесди омори гьомбор эже дошде миев 2 гьозор тонн.
— Хьэвуьждошдехоне эже дошде миев 2 гьозор тонн вокурде омори э Кизилюртовски район. Сергуьрдегор – СПоК «Биополис».
Гереки э ер овурде, суьфде э сугьбет РИА Хэбергьо Сернуьш эн Хьуькуьм РД Абдулмуслим Абдулмуслимов мэгIлуьм сохди, э 2026-муьн сал жигегьой дошдеи э республике зиед сохде омори эз се гиле омбарте – эз 17 те 56,4 гьозор тонн. Эз хьисоб э кор венгесдеи тозе инвестиционни проектгьоре э артгьой эн 2027-муьн сал гуьре жигегьой дошдеи зиед сохде миев те 70 гьозор тонн, ве э артгьой эн 2030-муьн сал – те 100 гьозор тонн.
