Э зир сернуьширевоз Серворе Дербендски районе Эльмане Аллахвердиеве бири аппаратни гуьрдлеме, комики гIуьзет сохде бинелуье пуьрсуьшгьоре социально-экономически параменди муниципалитете ве фегьмсохдеи э песой веровундеи зуте доригьо гъэдэгъэгьоре.
Э кор гуьрдлеме гъобул сохди бэхшвегири сернуьш Гуьрдлемере депутатгьо, жигегиргьо серворе, рэхьбергьо ЖэгIметие ве фегьмсохие-хьисоблуье палате, серворие духдир районе, рэхьбер ТКЦСОН «шегьере Дербенд ве Дербендски районе», гьемчуьн рэхьбергьо структурни беделгьо.
Э.Аллахвердиев бирмундеи тигъэте э артигьо корисохие рафдеи Серворе Республике Догъисту Сергее Меликове э Дербендски район, комики бири 16-муьн январь. Сервор районе риз кешири вожиблуьи гьисдигьоре э гъэд и рафдеи гъэдэгъэгьо, бирмунде, чуьки веровунпушотеине деи угьоре гьисди вожиблуье везиферевоз эри гьемме гъуллугъсохигьо ве идорегьо.
Песде Сервор районе гирошди эки гуш дошдеи мэгIлуьметигьоре э товун веровундеи гъэдэгъэгьоре, комикигьо доре омори э пушотеине гуьрдлеме. Жирелуье тигъэти доре омори рэхьберисохи хориие ве девлетлуье гъэножогъигьоре, беделе архитектуре ве хорииепромышленни десде районе.
Омбортее бедел гуьрдлемере бири гIуьзет сохде барасигьоре дуьруьжде акцие э нисд сохдеи гъонунсуьзлуье норе оморе объектгьоре э дурази федеральни рэхье э е гъэдер мескен Дербендски районе.
Э Аллахвердиев гъэдэгъэ зери рэхьберие экономике дуь эекиревоз э серворгьоревоз дигьбоние ве шегьерие жигегьо зиёд сохде коре э и рэхьгьо.
«Дошдеи гъонунгьоре ве гуьнжолуьигьоре э кор венгесдеи хориие овгъотгьоре – гъувот доре гъоимгъувотлуье параменди е гъэдер мескене»,- риз кешири Сервор муниципалитете, бирмунде, чуь гьисдигьо корисохи кумекии доре э гуьнжо овурде омборте хубе, секонесуьзе ве раче э хуьшде вогосундеи иловлере эри зигьисдегоргьо ве гъуногъо районе.
Э корисохи гуьрдлемере бири гуш дошде ве вожиблуье пуьрсуьшгьо эз иловле дошдеи жунсогъире.
Серворие духдир Фуад Самедов хэбер дори э товун везифегьо э 2026-муьн сал, комики дешенде вокурдеи зурие вокурдеие поликлинике э дигь Геджух ве софхоне э дигь Джемикент. Гье у объектгьо мибу вожиблуье дешендеиревоз э хубте биреи медицинеи гъуллугъигьоре эри зигьисдегоргьо дуре могьлугълуье жигегьо.
Гьемчуь бири фегьм сохде пуьрсуьшгьо, комики бесде омори э контрактни гъуллугъсохиревоз э Ерэгъмишие гъувотгьо Уруссиетие Федерацие.
Э бегьем биреи гуьрдлемере Эльман Аллахвердиев дори жергей ёгъинлуье гъэдэгъгьо, ёгъин норе вэхде веровундеи угьоре.
