Сернуьш Хьуькуьме Республике Догъисту Абдулмуслим Абдулмуслимов гировунди гуьрдлемере э бэхшвегириревоз рэхьбергьой овгъотедореие компаний ве жергей идорегьо хьуькуьме.
Премьер-министр э битIэгIрифиревоз сер гуьрди гуьрдлемере э биригьо гъозиеревоз э гуьнжо овурдеирквоз могьлугъе комунальни гъуллугъигьоревоз. Э гирошдигьо руз форигъэтии бири омборегъэдерлуье бире гъозиегьо кемчуьки э дореи газе, электричестве ве гIове э жергей районгьо республике.
«Э куче хиникини. Программе гъуьчсохире, э комики доре омори дуьруьжде овгъотгьо, биё гировуну не э декабрь, э июнь, июль енебуге э август. ГIэмел нисе оморе гьечи бире эки зигьисдегоргьо»,- гуфдири Сернуьш Хьуькуьме.
Мибу доре гъиметдии коре жугъобдорлуье гъуллугъсохигьо ве гъобул сохдеи гъэдергьоре эсер тозеден э хуьшде дировундеи овурде расундеи хэржисохдегоргьоре.
Э гуьрдлеме огол зере омори вице-премьер Манвел Мажонц, сервор Махачкале Джамбулат Салавов, жигегир серворе беделе ПАО «Уруссиетие тургьо Софуне Кавказ» — «Дагэнерго» Магомед Шапиев, сервор ООО «Газпром гIэрейрегионгазе Махачкале Ризван Мурадов, сервор ООО «Газпром трансгаз Махачкале» Александр Астанин, рэхьбер Госжилинспекцие РД Арсен Гаджиев, нушудорегор АО «Еклуье оператор э коргьой гIоведореигьо ве гIовеведебердеигьо».
Абдумуслимов Абдулмуслимов бирмунди э пушой серворгьо РСО бинелуье везифегьоре
Гирошдигьо руз форигъэтии бирмунди «буше жигегьо»э коргьой хунеие-коммунальни сэхьиблугъигьо республике. Дуьруьжде коре эсер овурдеи гуьнжолуьире э иловле, эже куьгъне инфраструктуре гуьнжуьнде эки 70%, гировунде э песини салгьо э сер кумекии федеральни рэхьберисохи ве э хуьшдени ю войге Серворе Догъисту Сергее Меликове.
Гьееки э уревоз, жирей корисохи э гуьнжо овурдеи коре овгъотгьодореие компании талаб сохде дегишире, риз кешири э корисохи гуьрдлемере Сернуьш Хьуькуьме республике.
Суьфденуботлуье талаби э товун вэхде ве гуьнжо овурдеи гировундеи гъуьчсохие корисохигьо, э комики компани вегуьрди дуьруьжде пуледореи. Эзуш бэгъэй веди биреи жирей корисохигьоре ве дореи хубе коре э омборевэхдие имиди, гIэмел нисе оморе фурмуш сохде э товун э вэхд ю хэбер дореи могьлугъе, неки эз СМИ.
Фурмуш не сохид, чуьки бинелуье везифе – э гуьнжо овурдеи хубе иловлегьо эри зигьисдегоргьо республике. Ижире везифегьо норе омори Серворевоз. Эри чуь гереки бирмундеигьо эн ишму? Э куче зимисдуни. Ишмуре дори пулгьо. Эри чуь ишму угьоре хэржи не сохдейт ве не гировундейт коре э июнь, июль, август, сентябрь оммо гировунденит э декабрь?- гуфдири премьер.
А.Абдулмуслимов гуш венори мэгIлуьметигьоре рэхьбергьой гьер компани, гъэдэгъэ зери шинох сохде нуботноме муьлкгьоре э омборте гьуьндуьре не дебиреи э дореи гъуллугъоре э гирошденигьо вэхд эри гъобул сохдеи суьфдеие гъэдергьоре.
Абдулмуслим Абдулмуслимов гъэдэгъэ зери рэхьбергьоре компани-овурдегоргьо овгъотгьоре э сер гереклуьи э хуьшде вогосунде гъувотгьоре хьуькуьме муниципальни соводигьо ве э вэхд ю мэгIлуьм сохде э товун гировунде оморе коргьо.
Э гуьрдлеме гьемчуьн бирмунди нушудорегоргьо газедореигьо идорегьо.
Эсер арти гуьрдлеме доре омори жергей гъэдэгъэгьо эсер гъэрорноме четиниепуьрсуьшгьоре э коргьой ЖКХ ве энергодореи могьлугъе республике.
