Сервор Догъисту Сергей Меликов ве суьфдеи жигегир Министр вокурдеи ве ЖКХ РФ Александр Ломакин гировундет корисохие гуьрдлеме.
Пуьруьш сохде омори дуьруьжде проектгьо э сфере гlоврасундеи, гlовведебердеи ве хунеи вокурдеи. Кор венгесдеи угьоре – вожиблуье пойнореи эки дануьсде расундеи гьозор догъистуни кифлетгьо темизе гьенжирение гlов, гьеймогьоине канализацие ве дуьлхошие хуне. Гоф гуфдире омори э товун вокурдеи серворлуье жигег1ов Чиркей – Махачкала – Каспийск, тозеден гъуьчсохи темиз сохдение дуьруьжде вокурдеигьо Махачкалеи-Каспийски гуьрдноме.
Пул расундеи э гье и объектгьо э жиге овурдени эз е ченд жигегьо: бюджетни кредитгьо, программа тозе сохдеи, хубте сохдеи коммунальни инфраструктуре, овгъотгьо Фонд миллетлуье ники ве хуши ве екигегьо.
Э пуьруьшсохи бу овхьол э кор венгесдеи проект омборетарафлуье параменди мескен «Лазурный гъирогъ». Эзуш бэгъэй, пуьруьш сохди хьозуьрлугъи тозе инфраструктури проект э сфере ЖКХ, бегельмиши сохде оморигьо э рамке гъэдерлуье терг э жерге кор хунеи-коммунальни хозяйство.
Докладгьо нушу дори рэхьбергьо молведешендеи органгьо хьуькуьм республике, сенигlэткоргьо ППК «Фонд параменди мескенгьоре» ве Серворгьо хьуькуьм фегьмсохи Уруссиет.
Вожиби эз фегьм сохде оморигьо
Проект «Лазурный гъирогъ»: Пуьруьш сохде омори хьозуьрлугъи эки кор венгесдеи гье и дуьруьжде проект омборетарафлуье параменди мескен. Сервор регион риз кешири бэхшнебирение еклуьги э екиге инфраструктурнигьо объектгьоревоз.
«Проект «Лазурный гъирогъ» э иму бесде омори э парамендиревоз инженерни инфраструктуре, э товун коминики иму имбуруз гуфдиреним. Веровундеи гье и проект ми бисдо минкинсуьз, эгенер иму не винирим биёвгьо минкин дореи гlов эз тозе жигегlов ве э кор венгесде темиз сохдение дуьруьжде вокурдеигьо», — гуфдири сервор Догъисту.
Гьемиге Сергей Меликов бирмунди пурлуье хьозуьри зиреклуье когъозгьоре эри пуьруьшсохи э хьуькуьмлуье фегьмсохи. Е гъэдер вэхд дешендеи хуне миё бу э 2029-муьн сал. Суьфдеи жигегир министр Александр Ломакин мэгlлуьм сохди, чуьки зиреклуье когъозгьо эри нуботлуье е гъэдер вэгlэдо разилуьире вегуьрде доре омори э пуьруьшсохи, гьемиге хьозуьр сохди дебердеи дегишигьоре э федеральни жергей гъонунгьо э товун КРТ.
Жигегlов Чиркей-Махачкала—Каспийск: Гье и вожиблуье объект, э комини миё бу доре гъэдуьрлуье овгъотгьо, мидануь расунде имидлуье гlоврасундеи э Махачкала, Каспийск, э песдеине ве Избербаш.
Веровундегор и коргьоре боворини дори, чуьки объект мибу бегьем те эхир варасде оморе э вэхд ю, технически кор венгесдеи мибу э эхир гьеминон 2026-муьн сал. Гьемме коргьо гирошдени гьич гофсуьз э график гуьро.
Темиз сохдение дуьруьжде вокурдеигьо Махачкалеи гуьрдноме: Бэхшвегиргьо гуьрдлеме пуьруьш сохди жерге кор э товун диеш зуте сохде пректгьоре ве вокурдеи гьеймогьоине темиз сохдение дуьруьжде вокурдеигьоре. Гье и гъэрор норе э зутеине тебиетилуье везифе ве гъэдерлуь зевер мисоху риз гъэдерлуьи гlовгировундеире э шогьнишон регион ве экуьнди гьисдигьо мескенгьо. Доре омори гъуллугъ э зуте гирошдеи фегьмсохи ве восдореи оборудованиегьо.
Тозеден гъуьчсохи канализационни тургьо э Каспийск: Пуьруьш сохде омори ёгъинлуье пой нореи э гьеймогьоине ве зеверсохи мощностьгьо канализационни инфраструктуре шегьере.
Гуьрдлеме бири э рэхь гъэрорнореи корисохи везифегьо э гьеймогьоине тегьер ве хубтее веровундеи вожиблуье эри Догъисту вокурдеигьо.
