Чуь бешгъэини э гIэрей муд ве чигьрет? Э сер эни ве эн угьонигее пуьрсуьшгьо жугьоб миду Фаине Зарбаилове – дизайнер эн партал  ве биненорегор компание.

— Фаине, ихдилот сохит екем э товун хуьшде ве э товун эну э чуьревоз ишму имбуруз муьхшуьл биренит?

— Ме дизайнер эн партал зенини ве имбуруз диеш хунденуьм э магистратуре РГУ э нум А.Н.Косыгин э программе «АРТ проектирование кастюме. Fashion-стартап». Гье евэхди э хундеиревоз параменд сохденуьм кор хуьшдере – э пушо берденуьм компанией хуьшдере, бине дешенде оморигьо эз се сал пушоте ве, комики офирени брендированни молгьо э хогьиши гуьре.

— Ини э инжо э пура тегьеревоз.

— Э софоревоз. Иму хьозуьр сохденим жирелуье молгьоре эри компаниегьо ве эри гьемкоркигьо, эри сэхьибкоргьо, гьемчуьн эри одолмигьо, комигьореки воисдени шор сохде хуьшдере ве куьнде одомигьой хуьшдере э дизайнерски бэхшгьоревоз. Имисал имуре бири корхоней хуьшде, иму э хогьиши гуьре ведешенденим партал, аксессуаргьо, концеляриере, гьемчуьн угьонигее брендированни молгьо э хогьиши эн муьшдеригьо гуьре.

— Кини муьшдеригьой ишму?

— Эки иму бежид руй биренуьт сэхьибгьой ресторангьо, эн доллокхонегьо, эн фитнес-клубгьо ве эн де идорегьо эри хьозуьр сохдеи жирелуье партале эри десдей энугьо. Гьемчуьн омбаре муьшдеригьо руй биренуьт эки иму, эри хогьиши доре жирелуье бэхшгьо сохде оморигьо э десевоз.

— Э и план, чуьтам ме варасиренуьм, ишмуре нисди гъэдерлуье терггьо?

— Гьемме дузи, иму миданим хьозуьр сохде егъин гьеммере, гьер моле гIэмел миев сохде э жирелуье дизайневоз. Ведешенденим жире-бе-жирее элементгьоре, эз гъэлем ве блокнот те палту ве куртке. Миданим веноре нишоне неки э сер гъэлемгьо, блокнотгьо ве брелокгьо, оммо ве ведешенде коминиге дизайнерски молгьо: футболкегьо, худигьо, свитшотгьо, пушосинегьо ве кастумгьо.

— Чуьтам ишму сер гуьрдебирит бизнес хуьшдере?

— Ме гьич фикир не сохдебируьм, ки э гуьнжо миоруьм молгьо эри жире-бе-жирее компаниегьо э хогьиши гуьре. Э 2022-муьн сал эки ме руй биребируьт гъовумгьо, комигьоки вокурди ресторан, ве угьоре герек бу жирелуье партал эри серпоигьо ве барменгьо. Угьо гузет сохдебируьт эз ме офирее эгъуьле дореи эри э гуьнжо овурдеи дизайн футболкегьоре ве худигьоре. Ме, гьелбетте, жугьоб дорем, ве э бараси угьоре лап хьэз омори гъэножогъи ме эки кор, эзуш бегъэй угьо разилуь мундет э гъоимлуьи вихде оморигьо молгьоревоз, гьемчуьн э дофусиревоз ве нэхчвечиреиревоз э сер молгьо. Бэгъдовой эни хогьиши угьо дорет адрис мере э шинохгьой хуьшде, комигьореки гьемчуьн бу ухшешие хогьиши, ве ме сер гуьрдуьм э угьоревоз кор сохде гьеммишелуьг. Ве кейки ме э кор венгесдебируьм эз бисд ухшешие хогьишигьо омбарте, омори фикир э гуьнжо овурде эз и бизнес. Эхи омбардекигьоре эри десде гереки брендированни молгьо, эзу товун ме гъэрор сохдем гьемме тигъэт хуьшдере доре э лап вожиблуьи – э гуьнжо овурде гъувотлуье десдей гьемфикирсохгьоре, комигьоки мере гъувот мидуьт ве миворовунуьт гьер хогьишигьой эн муьшдеригьой имуре.

— Э чуь дери бинелуье зевербиреи нум FAVA MERCH той сохде омоге э рэгъибгьой ишмуревоз?

— Бинелуье сечбиреи эз унигее компаниегьо э уни, ки муьшдери иму гье бирден мидануь винире, чуьтам веди мибу партал эну. Дизайнер иму э е ченд минуьт хьозуьр мисоху нишоней моле э дизайневоз э технически тапшуьрмиши эн хогьишидорегор гуьре. Оммо менеджер э гьер гуьнжолуь гьисдигьо эри муьшдери вэгIэдо миев э нишонегьоревоз ве молгьоревоз, чуьнки ишму шинох бошит э гъоимлуьи молевоз, вокурде фегьм сохде партале герек бисдоге ве вихде эри хуьшде хубе молгьоре. Имуре миенее гъимети э рынок, иму гъиметгьоре зевер нисе сохденим, эри тозе муьшдеригьо сохденим скидкегьо эри суьфдеи хогьиши ве гьовои овурде расундеи э гъэд Москов, гьемчуьн иму фуьрсореним хогьишигьоре э гьеммей Уруссиет. Е бойгеш мигуьюм, эгенер ишму э Москови, умогьой менеджер иму гьовои миев эки ишму ве кумеки мисоху вихде дизайне эри биевгьо молгьой ишму.

— Э коми гъосуьт гIуьзет сохде омори магистерски диссертацией ишму?

— Диссертацие эн ме расирени э офиреи эн Александр Маккуин, эн британски модельер, мэгIлуьмлуь гьисдигьо э коллекциегьой хуьшдеревоз. Э диссертацие ме нуьвуьсденуьм э товун эну, чуьтам сенигIэтлуье корисохи эну кори сохди э сер гьеймогьине муд. Ме духдем парталгьой зенуне ве э кумеки энуревоз воисдени бирмунде э комиссией иму ве угьонигее томошесохдегоргьо, чуьтам э 2025-муьн сал гIэмел миев дешенде чигьрет  маэстроре э гьеймогьине дизайнерски коллекциегьо. Э пушо дарафденки, мигуьюм: э плангьой ме бегьем сохде магистратурере, ве песде  дарафде э аспирантур РГУ э нум А.Н.Косыгин.

— ТэгIрифини. Гюит, муд ве чигьрет, э фем ишму гуьре, жире-бе-жирее чигьои?

— Чуьн дизайнер эн партал ме хьисоб сохденуьм, ки муд ве чигьрет гьэгъигъэтиш нушу доренуьт жире-бе-жирее мэхьшовогьоре. Муд – и гьелелуьгее гъозиеи, у гьеммише дегиш бирени. У бирмундени гьеймогьинегьоре, комигьоки вихде оморени э вэхдгьоревоз, э базургенде гъозиегьоревоз ве э жэгIмиетие дегишигьоревоз. Муд бежид бирени, кутэхьэвэхдлуьи ве э сер эну мидануь кори сохде буруние гъозиегьо, и ве бирмундеи тозе коллекциегьоре, гъэножогъи эн мэгIлуьмлуье одомигьо ве эн социальни сетьгьо эки эну. Чигьрет, эз е тарафиге, — и эн хуьшдеи ве бирмундеи теке жейлеире. У э гуьнжо овурде оморени э биней  сечбиреигьо, эн дэгIэмгьо ве эн синогъи одоми.

— Ишму жугьур догъини, оммо нум Фаине э жугьургьой догъи э ме гьеле не вохурдебу. Эзжеи биней ишму?

— Гьечи мере нум доре омори э гIуьзет эн келедедей ме Фаине, дедей эну, енебуге келеи келедедей ме, э риз бебе эшкенези бу. Ве угьонигейге келетегьой ме – жугьургьой догъини, комигьоки хьэсуьл оморет ве келе бирет э Азербайджан.

— ГIэмел миевге ишмуре гуфдире диндошдегере одоми?

— Эри, ме лап диндошдегоре одомини, эрклуь биренуьм э уревоз, ки ме жугьуруьм. Ме бежид рафденуьм э нубогьой Туро, мере хьэз оморе рафде э мигIидгьо э жэгIмиет дин-догIоти эн жугьургьой догъи, э МЕОЦ, э нумаз э Бронни ве э Хоральни нумаз, хьэрекети сохденуьм дошде гьемме мигIидгьой жугьургьоре, тэгIэнит гуьрде, гьемчуьн мере хьэз оморени буьржуьнде хале э пушой шоббот ве хьисоб сохденуьм гъэрхунди хуьшдере дегесуьнде шэгIмгьой шобботире. Гьеммей энугьо мере дорени ве гъувот, ве хьэвес.

— Чуь гьишдени ишмуре мунде э ижире хубе хьол, не фушенде десгьоре, расиренки э четинигьоревоз?

— Гъувоте офире мере дорени разилуье муьшдеригьо, комигьоки гьишденуьт хубе фикиргьо. Хубе гофгьой разилуьи эн эки ме руй биретгьо одомигьо хьэвеслуь сохденуьт, кумеки сохдени параменд бире ве зевер бире. Кейки ме виниренуьм, ки кинигере хьэз оморени у, чуь ме сохденуьм, мере бирени омбаре гъувот ве омбаре вэхд ве воисдени сохде эри муьшдеригьой хуьшде диеш омбарте! Гьеммей эну хьэвеслуь сохдени мере офире ве шори доре.

— Бараси эри ишму э гьемме хубе сергуьрдеигьой ишму!

Нуьвуьсди Яна Любарская

Тержуьме сохди Ильягуева А.