Сервор Догъисту гировунди гуьрдлемей эн корлуье десдере э товун кумеки сохдеи вихденигьо комиссиере эри э гуьнжо овурдеи хьозуьрлуьгъире ве гировундеи муниципальни вихдеигьоре э регион. Угьо гировунде миев эз 12-муьн те 14-муьн сентябрь эни сал.

«И еки эз лап келе вихденигьо компаниегьои э Догъисту. Бинелуье везифе эн еклуье руз сесдореи – доре минкин гьемме зигьисдегоргьой республике э кор венгесде вихденигьо ихдиери хуьшдере.

Гьемме ведомтвогьо ве органгьой хьуькуьм, комигьоки бэхш вегуьрденуьт э кор, фуьрсоре оморет эри э гуьнжо овурде мероприятиегьоре», — гуфди Сергей Меликов.

Чуьтам гуфди сернуьш эн республикански Вихденигьо комитет Магомед Дибиров, э гIэрей еклуье руз сесдореи гировунде миев 609 муниципальни вихденигьо компаниегьо, э хьисоб дешенденки 588 вихдеигьой депутатгьоре эн хьуькуьметтлуье органгьой хьуькуьм ве 21 вихдеигьо серворгьой дигьбонгьоре.

Вихдеигьо гировунде миев э 6 шегьергьо – Махачкале, Буйнакск, Догъистонлуье Огни, Каспийск ве Южно-Сухокумск, гьемчуьн э 38 районгьой республике. Э гIэрей вихдеигьо бэхш сохде миев 6001 депутатски мандатгьо.

Э нуботномей вихдегоргьо дешенде омори эз 1 миллион 312 гьозор одомигьо омбарте, чуь гуьнжуьндени 76% эз жэгIмие гъэдер эн вихдегоргьой республике.

Эз вэхд зуте гировунде сесдореире э гуьнжо овурде миев эри зигьисдегоргьой остров Чечень эн Кировски район эн Махачкале.

Э гуьнжо овурде вихдеигьо кумеки мисохут: Вихденигьо комиссие эн регион, 14 мескенлуье ве 1414 мейдонлуье комиссиегьо. Э хьисоб эн вихденигьо комиссиегьо – эз 10 гьозор одомигьо омбартеи.

Э гьемме жигегьо норе омори гереклуье технике, овгъотгьой олгъгъи ве зиедие жигегьой электрорасундеи.

Э вихденигьо жигегьо норе миев эз 10 гьозор одомигьо омбарте. Э вихдеигьо бэхш вегуьрденуьт нушудорегоргьой эн 11 политически партиегьо ве хуьшдере э пушо ведешендегоргьо. Гьемчуьн э вихдеигьо бэхш мивегинуьт 205 кандидатгьо – бэхшвегиргьой эн жирелуье гъовхолуье операцие.

Скргей Меликов гуфди э товун бинелуье мэгIэной эн ведомтсвогьо, э комигьоки норе миев вихенигьо жигегьо, э и хьисоб эн Министерство соводи ве гIилми ве эн Министерство базургенди.

Э товун чорегьой гъэлхэнд сохдеи жэгIмиетлуье низоме ве расундеи секонесуьзи одомигьоре э еклуье руз сесдореи ихдилот сохди веровундегор гъэрхундигьой эн сервор МВД Догъисту Леонид Можеровцев.

У мэгIлуьм сохди, ки хьозуьр сохде омори плангьой мероприятиегьо, жирелуье тигъэт – гъэршуйбедкорлуье секонесуьзи. Э гуьнжо овурде омори кори сохдеи дуь э екиревоз э пушойвихденигьо штабгьоревоз эн кандидатгьо эри андуьрмиш сохдеи жугьобдорлуьире эри гъонунепузмишие коргьо э вэхд вихденигьо компаниегьо.

«Э вэхд хьозуьрлуьъи ве гировундеи вихдеигьоре кор мисоху телефон боворини ве гъувот доре миев оперативни органгьоре»,— гуфди веровундегор гъэрхундигьой эн рэхьбер ведомстворе. Сервор эн Бинелуье идорей МЧС эн Уруссиет э Догъисту Муслим Девришбеков ихдилот сохди э товун чорегьой зуте мэгIлуьм сохдеи зобуне овхьолете ве нисд сохдеи эзуновлейге бире гъозиегьоре эгенер угьо мибу э еклуье руз сесдореи.

У мэгIлуьм сохди, ки э вихденигьо комиссиегьоре кумеки доре оморени. Гировунде омори фегьмсохигьо, мэгIлуьмети э товун очугъ сохдеи гъуонунепузмишигьоре фуьрсоре омори э гуьнжолуье органгьо эри гъобул сохде чорегьоре. Э вэхд гировундеи вихдеигьоре сенигIэтгьой МЧС кор мисохуьт омбарте.

Э товун расундеи муьхькемлуь кор сохдеи объектгьой электрорасундеире э еклуье руз сесдореи ихдилот сохди суьфдеи вице-премьер эн республике Манвел Мажонц.

Жугьобдорлуь эри э гуьнжо овурдеи коре э и тараф вихде омори Министерствой энергетике эн Республикей Догъисту. Э пушой ведомство норе омори везифе э гьееки э муниципалитетгьоревоз ве э овгъотгьо расунденигьо идорегьоревоз норе, фегьм сохде, зиедие жигегьой элетрорасундеире ве вес сохдеи гъэдер сухунденигьо молгьо.

Чуьтам мэгIлуьм сохди рэхьбер эн Министерство соводи ве гIилми эн республике Яхья Бучаев, э мескен регион э гировундеи вихдеигьоре э кор венгесде миев эз 800 объектгьой соводи омбарте, эже норе миев 903 жигегьо эн вихденигьо комиссегьо. Э пушой вихдеигьо гъобул сохде миев зиедие чорегьо э товун расундеи секонесуьзи соводие объектгьоре. Э и хьисоб 22-муьн август э гьемме жигегьо мигирору Гьеммеурусиетие хундеигьо э товун эни тараф. Э имбурузине руз мэгIлуьмети э товун хьозуьрлуьги школегьо, э комигьоки гировунде миев вихдеигьо, диреморе омори эз гьемме муниципалитетгьо, риз кеши Бучаев.

Серворгьой муниципальни районгьоре ве эн шегьерлуье иловлегьоре доре омори буйругъ э товун э гуьнжо овурдеи ве гировундеи вихдеигьоре.

Э товун энугьо ихдилот сохди веровундегор гъэрхундигьой Рэхьбере эн Администрацие эн Сервор ве Хьуькуьм  Республикере Али Ибрагимов. Э муниципалитетгьо, гуфди у, гереки э гуьнжо овурде мэгIлуьметие десдегьо, комигьоки желдлуь мэгIлуьм мисохут э товун кор сесдореи. И кор мие сохде биев гьееки э жэгIмиетлуье фегьмсохдегоргьоревоз э жигегьо.

Гереки гуфдире, эз 11-муьн те 15-муьн сентябрь э Хьуькуьм эн Республикей Догъисту э гуьнжо овурде омори зутее штаб эри гъэрор сохдеи э и хьисоб ижире пуьрсуьшгьоре.

Гьееки э уревоз э структуре эн Администрцией Сервор ве Хьуькуьм эн Республикей Догъисту э гуьнжо овурде миев корлуье десде э товун кор сохдеи дуь ээ екиревоз э Вихденигьо комитет эн республике. Ижире гъуллугъ дори э товун артгьой гуьрдлеме сервор регион.