Ватанлуье системе хьозуьр сохдеи лешгерие духдиргьоре фуьрсоре омори неки э вегуьрдеи сенигIэтлуье хутеигьоре, оммо ве эри э гуьнжо овурдеи буьлуьнденесигIэтлуье одомигьоре ве ватанхогьоре. Э товун игидгьо эз хьисоб лешгерие духдиргьо гуьнжуьнденуьт мэгIэсигьо, ведешенденуьт фильмгьо ве нуьвуьсденуьт книггьо. Э хьисоб эн ижире игидгьо дери ве полковник эн медицински гъуллугъсохи Борис Нувахович Дадашев.
Борис Нувахович хьэсуьл омори э 1938-муьн сал э гъэдиме Дербенд э кифлет эн Нувах Рувинович ве Истир Эммануиловне. Кифлет келе бу, омбаре гIилгьо бу: хьэшд гIэилгьо, се кук ве пенж духдер. Борис дуьимуьн гIэил бу. Хундебу э школе №1 э нум Сталин, песде дарафди э Догъистонлуье медицински зеверие соводие идоре э Махачкале. У гьеммише мэхьшово сохдебу бире духдир ве хилос сохде зиндегуни одомигьоре, эзу товун ве вихди лап рэхьме сенигIэт. Бэгъдовой хунде варасдеи зеверие соводие идорере у гъэрор сохди гъэрорноме рафде гъуллугъ сохде э Лешгер Совети лешгерие духдир. Гъуллугъсохире сер гуьрди э Хабаровск э нум лейтенант э ВДВ.
Э вэхд гъуллугъсохи у дарафди ве барасилуь хунде варасди еки эз гъэдимие зеверие соводие идорей вилеете: Ленинградски лешгерие-медицински академиере. Гьечи Борис Нуваховиче бири дуь буьлуьнде медицински соводи.
Бэгъдовой хунде варасдеи академиере гъуллугъ сохдебу э Орджиникидзе, э шогьнишон Осетие, ве э Ростов на-Дону, ве кор сохдембу э лешгерие госпиталгьо. Гъуллугъсохире бегьем сохди э лешгерие госпиталь эн Ростов э нум полковник медицински гъуллугъи.
Борис Нувахович э гуьнжо овурди лап хубе кифлет. Кук Олег гьемчуьн бири лешгерчи ве 39 сале биренки уре доре оморебу нум полковник эн жэгIмиелешгерие гъуллугъсохи. Олег Борисович хунди варасди буьлуьнде серворлуье догълье-стрелкови училищере, песде Академие эн Генеральни штабе, бу э гъовхогьо, бэхш вегуьрдебу э дуь довгIогьо э Чечня. Песини жиге гъуллугъсохи – Штаб эн Софун-МэгIэрове лешгерие иловле.
Борис Нувахович бу хэнделове ве мигьровуне одоми, гьеммише бирембу жуьн компание, э иловлей эну кура бирмбируьт гъовумгьо ве ховиргьо. Борис Нувахович бу лап гъэйгъукеше кук: э вэхд гъуллуъ сохдеи э Хабаровск эри деде-бебе фуьрсорембу пул, хьэрекети сохдембу кумеки сохде э гъовумгьо кире омбаре гIэилгьои чуьн гъэйгъукеше кук. Езугъбери ве рэхьмедуьли э хун эну дебу, эзу товун у ве бири духдир.
Лешгерие духдир – и сенигIэткорини, бикевуне дуьли ве, гье у вэхд, дуьлтижи ве низом – ве гьеммей энугьо бу Борис Нуваховиче.
Се сал пушоте Борис Нувахович Дадашев рафди эз гIэрей зиндегуни, оммо очугъэ еровурди э товун эну зигьисдени э дуьлгьой эн лап омбаре одомигьо.
Эри доре оморигьо мэгIлуьмети ве сиротгьо согъбоши гуфдиренуьм эз Алле Нуваховне Гилядове.
Нуьвуьсди Стела Давыдова
Тержуьме сохди Ильягуева А.
