Сервор Догъисту, рафденки э е жерге социальни-мэгIнолуье объектгьо, э Дербенд гировунди гуьрдлеме э товун э кор венгесдеи хьуькуьметлуье программере еклуье параменд сохдеи гъэдиме Дербенде.

Министр эн экономикей регион Гаджи Султанов э пура тегьеревоз ихдилот сохди чуьтам веровунде оморени план коргьо.

Эри вэхд э кор венгесдеи программере – эз 2019-муьн салевоз – доре омори эз 23 млрд монетгьо омбарте. Эри эни вэгIэдо э Дербенд вокурде омори богъчей гIэили эри 140 жигегьо, школе эри 804 жигегьо, шегьерлуье бине эн зутее жугьобдореи, мультимедийни хьэвуьз ве жигей зигьисдеи эри сеггьо эри 180 жигегьо. Гъуьч сохде омори 6 школегьо ве 9 богъчегьой гIэили, оводу сохде омори 10 мейдунгьой возисохдеи э соводие идорегьо. Оводу сохде омори богъчегьо эн Гъовхолуье ве Гъолхмишие гIуьзетлуьи, э гуьнжо овурде омори муниципальни хунелуье фонд (2347,5 м2). Эзуш бэгъэй гъуьч сохде омори 55 кучегьо, тозеден сохде омори 7,28 км. рэхьгьо ве 9 богъчегьо.

Э плангьой эни сал: вокурде 5 богъчегьой гIэилире, 2 школегьо (эри 1224 ве 1200 жигегьо), дервозей идмоне, гъирогъ дерьегъе.

Имисал оводу сохде миев богъче «Патриот» ве мескен э иловлей дерьегьче э куче э нум Х.Тагиев. Э план гуьре денишире оморени ки те эхир сал бегьем сохде миев вокурдеи товгьой гIови «Кайтаг-Дебенд», канализационни-насосни станцие «Мамедбековская», богъчей гIэилире №23 эри 120 жигегьо, гьемчуьн гъуьчсохи школе-интернате №2 ве Азербайджански драматически томошере.

Чуьтам гуфди Гаджи Султанов, эри вэхд э кор венгесдеи программере зевер бири гъимет эри жейлее коргьо, эзу товун герек бу дешенде дузетмишигьо. Э ологъи э уревоз гьевел сервор Догъисту руй бири эки Президент эн Уруссиетлуье Федерацие э фикиревоз дураз сохде программере те 2030-муьн сал. Гьунжолуье гъуллугъе доребу призедент вилеет. Имбуруз тозеден сохде оморигьо проект эн еклуье план дери э фегьмсохи э Хьуькуьм РФ. Э 2025-муьн сал доре омори эрзогьо эри 11 объектгьо э жэгIмие гъэдер пулдореиревоз 35,77млрд монетгьо.

Бинелуье проектгьо: вокурдеи гъирогъ дерьегье, параменд сохдеи рэхьлуье сете э микрарайонгьо «Южный» ве «Аваин», канатни рэхьэ ве рэхьлуье телгьоре, меркезлуье шегьерлуье больницере, богъче э мкр. «Аваин» ве оводу сохдеи торихлуье жигей шегьере.

Хьуькуьметлуье фегьмсохи бегенмиш сохди 7 эз 11 проектгьоре.

Э товун э кор венгесдеи коргьоре эри еклуье параменд сохдеи Дербенде эз хьисоб бюджетсуьзе пуьлгьо ихдилот сохди сервор шегьер Ханлар Пашабеков. Угьо, э гофгьой эн сервор шегьер гуьре, сохде миев 27 э жэгIмие гъиметевоз 119 млрд монетгьо.

Хэел сохде оморени ки эз хьисоб бюджетсуьзе пулгьо вокурде миев хунегьо, административни-корлуье ве коммерчески беногьо, институтгьо, хурекхонегьо ве диеш.

Эри 1-муьн август мерэгълуь сохде омори 43,7 млрд монетгьо бюджетсуьзе дешендеигьо, комигьоки фуьрсоре оморебу э и хьисоб эри вокурдеи мультимедийни хьэвуьзе, гъуногъхонегьоре, алварие меркезгьоре, хунегьоре ве хубте сохдеи промышленни корхонегьоре.

Сервор Догъисту согъбоши гуфдири эз рэхьбергьой Дербенд эри хэйрлуье кор э гIэрегьой гировунде миевгьо коргьо.

«Сервор шегьере доре оморебу лап кеме вэгIэдо эри эну, чуьнки у гъэрор соху четиние пуьрсуьшгьоре, комигьоки гъэрор сохде оморенуьт э Дербенд. Гереки гуфдире, ки э товун гьемме объектгьо, э комигьоки иму имбуруз рафдейм, ведини хубте биреи. Омбаре дегишигьо гирошди э вэхд эн пушотеине омореи иму э богъче «Патриот». Имогьой гIэмел миев гуфдире, ки суьфдеи бэхш вокурдеи гирошдени лап хуб», — гуфди Сергей Меликов. Гьемчуьн у гуфди ки гереки э вэхд ю хэржи сохде пулгьой эн федеральни бюджете ве расире э бирмунушигьой эн технически гъозуьрлуьги объектгьо.

«Чендгъэдер имуре омбар бисдоге ижире хьуькуьметлуье программегьо, унгъэдер хуби эри гьеммей Догъисту. Программе э товун Дербенд гьисди пойнореи эки параменди. Ве иму э ишмуревоз эз и мие гирорим. Президент оморенки э гъэдиме Дербенд, гъувот дори фикире дураз сохдеи программере те 2030-муьн сал. Эзу товун рэхьбергьой эн органгьой хьуькуьме гереки тигът доре гьер объекте – социальнире енебуге инфраструктурнире, комики э эхире хьисоб кумеки мисоху э кор венгесде келе проекте»,- гуфди Сергей меликов.

Сервор регион дори жейлее гъуллугъ э товун бегьем сохдеи коргьоре ве э кор венгесдеи э нуботлуье сал темиз сохденигьо дуьруьжде вокурдеигьоре э Дербенд. Гьемчуьн фегьм сохде оморебу пуьрсуьшгьой гIоврасундеи ве гIовгировундеи шегьере.

Гьемме гуфдире оморебу, ки не денишире э дузетмиш сохдеи вэхдгьоре, кор э товун еклуье параменд сохдеи Дербенде гировунде оморени желдлуь, оммо дешендеи тозе объектгьой инфраструктурере минкин миду э гуьнжо овурде гьеймогьине хушлуье ве сафарлуье мерэгълуьи шегьере.