23-муьн июнь э Дербенд гирошди ёргирие корисохигьо, комики гуьнжолуье эки серсали одомисуьзе зулумкори, э барасии комики телеф бири гъуллугъчи дин-дог1от хочперези жигее килисе Николай Котельников, гьемчуьн гьемкоркигьо човуче, комикигьо вэхуьшде э гъэлхэнди шолумие зигьисдегоргьо.
Эз зуине себэхь э килисе Дербенде гирошди ёргирие гъуллугъсохи э сер бебе Николае. Гъуллугъсохире сервори сохди архиепископ Махачкалински ве Дербентски Варлаам. Э гъуллугъсохи омори омборе одомигьо – нушудорегоргьой гъуллуггъчигьо дин-дог1от хочперези,хьуькуьме ве зигьисдегоргьо шегьере.
Архиепископ Варлаам сргъбоши гуфдиреи э гьемме, ки омори эри ёргири протоиерее Николае, хьисоб сохде уре чуьтам одоми бофо ве гъуллугъсохи. У э ёр овурди, чуьки бебе Николай телеф бири, нисе ведарафде эз килисе эн хуьшде, ве чуьки э гъуллугъсохи неки э песой эну, оммо ве э песой гьеммееки, ки дори зиндегунире э песой шолуми ве гуьнжолуьи.
Гъуллугъсохи бегьемини бири э венореи гуьлгьоре э гъовре бебе Николае. Гьееки э серворевоз шегьере гуьлгоьре венореи нушудорегоргьо хьуькуьме ве дингьо, куьндлуьегьо ве оморегоргьо.
Э песой гъурбуние гъуллугъсохи килисере ве Ватане бебе Николай эз уьлуьм эулое верзуьнде оморе бэхше Уруссиетие православни килисе благоверни князе Александре Невски I гъэдере. Бэхше дори зен энуре Валентине Котельникове.
«Э ёргири э товун телефбирегоргьо э зулумкорлуье гъонуне 23-муьн июнь 2024-муьн сале» гирошди вохурдеи э е гъэдер мескен ОМВД Уруссиете э шегьер Дербенд э бэхшвегириревоз нушудорегоргьой идорегьой хьуькуьмлуье хьуькуьме, ихдиёригъэреулие идорегьо, серворгьо жэг1метие фикиргьоре, Махачкалински епархие РПЦ, Муфтияте РД, жуьгьурие жэг1миет дин-дог1оти РД ве кифлетгьой телефбирегоргьой э зулумкорлуье гъонуне 23-муьн 2024-ммуьн сале.
Пушойгофие бирмундеи сер гуьрди Врио жигегире Министре доруние коргьо, полковник доруние гъуллугъсохи Сефедин Эмирбекович эз гофгьо: «Одоми нисе муьрде, тейте зуьнде ёргири э товун эну».
Кифлетгьоре телефбирегоргьоре э зулумкорлуье гъонун 23-муьн 2024-муьн бири дореи ёргирие бэхшгьо эз Министерстве доруние коргьо ве Министерстве э коргьо дин-дог1оти.
Э е гъэдер мескен ОМВД Уруссиете э шегьер Дербенд гирошди венореи гуьлгьоре эки сенгъ ёровурди телефбирегоргьо гьемкоркигьо э сер веровундеи гъуллугъсохие гъэрхундигьоре.
Ёргирие руз бегьем бири э венореи гуьлгьоре эки сенгъ ёровурди «Сесеи дингьоре» э мэхьэле Казем-беке. Бэгъдовой зулумкори гье у сенгъ ёровурди бири жигеревоз хэлгъие ёргири ве нишоне венореиревоз дегиш нисе бирение беинлуье еклуьги Дербенде.
