Сервор Догъисту Сергей Меликов гировунди дуь эекиревоз гуьрдлеме Республикански оголзереие комиссие ве Бежидлуье бинере Республике Догъисту.
Бинелуье пуьрсуьш везифере – корисохи васалие оголзереие кампании. Э гьеммей вилеет у сер гуьрди э апрель ве бегьем сохде 15-муьн июль.
Э товун коре оголзереие комиссие шегьергьо ве районгьо республике ве барасигьо фуьрсореи одомигьоре э ёгъинлуье лешгерие гуъллусохи хэбер дори лешгерие сервор регионе Абдурахман Мурадханов.
Э гофгьой энуревоз, э имбуруз гъуллугъ сохде рафди омборте дуь гьозор догъистунигьо. Омборте тозе лешгерчигьо фуьрсоре омори э Ерэгъленмиш бирее Гъувотгьо РФ. Гьемчуьн оголзерегоргьой эз Догъисту пур мисоху хубтее десдегьоре: Эвирлуье-десантни лешгеригьо, Лешгерие-космически гъувотгьо, лешгергьо Миллетлуье гъэреули ве серхьэдие лешгеригьо ФСБ.
Э мэг1луьмети военкоме, э май оголзерегоргьо фуьрсоре омори э лешгеригьо э гуьре э везиферевоз. Нуботлуье фуьрсореи мибу э 17-муьн июнь.
Омборте э гуьнжо овурде гировунде оморе корисохигьо оголзереире Э Хунзахски, Сулейман-Стальски, Курахски, Каякентски, Карабудахкентски, Дербендски, Магарамкентски, Кизилюртовски, Кумторкалински, Сергоколински, Акушински, Кизлярски, Чародински, Тарумовски, Ногайски, Ахтынски, Рутульски, Докузпарински, Казбековски, Гумбетовски, Лакски, Кулински, Табасарански ве Цунтински районгьо, гьемчуьн э Махачкале, Избербаше, Дербенде, э Догъистуние Огни, Кизилюрте, Кизляре ве Южно-Сухокумске.
Гьееки э уревоз у гфдири э товун четиние пуьрсуьшгьо ве рэхьгьо гъэрорноме угьоре. Угьо, э гофгьой Мурадханове, бесде омори э вес нисдие коргьой э мэг1луьмети оголзерегоргьоре.
Э гъэд шегьергьо, комики вохурди э четинигьоревоз: шегьер Буйнакск, Буйнакски, Ботлихски, Ахвахски, Шамильски, Тляратински, Хивски, Агульски, Цумадински, Кайтагски, Дахадаевски, Левашински ве Гергебельски районгьо.
Абдурахман Мурадханов эрзо нуьвуьсди, чуьки военкоматгьо зиёд сохдеи коре э оголзереи ревоз, э у гъэдер ве андуьрмиш сохдеи э хуьшде вогосундеиревоз СМИ.
Сервор Догъисту хубе гофгьо гуфдиреи рэхьбергьой шегьергьоре, комикигьо веровунди норе везифегьоре, э песой жугьобдорлуье гъэножогъи эки э гуьнжо овурдеи оголзереие кампании.
Сергей Меликов э ёр овурди, чуьки поизие оголзереие кампании э 2025-муьн сал мигирору э хьисобевоз дегиши э жергей гъонунгьо, э у гъэдер г1уьмуьрлугъи оголзерегоргьоре ве вэг1эдо гъуллугъсохи.
Э гуьрдлеме гуфдири ве э товун угьо, чуьтам мерегълуь сохде тербиевегуьрдегоргьой Догъистуре лешгерие соводие хундение жигегьо. Гьемчуьн бири винире пуьрсуьш вихдеи э лешгерие гъуллугъсохи э контрактевоз.
