«Догъисту – и еки эз лап вожиблуье регионгьои эн омбаремиллионни, омбаремиллетлуье ве омбарединлуье вилеет иму»,- гуфди сервор эн Московски килисе Кирилл э вохурдеи э С.Меликовевоз.
Руй биренки эки сервор республике сервор Московски килисе Кирилл гуфди:
«Иму хьуьрмет сохденим келе жофой Ишмуре, Сергей Алимович. Имидлуь биренуьм, ки э кумеки Офирегоревоз Ишму миданить, э кор венгесденки э и хьисоб синогъиреш, комиреки ишму вегуьрдейт э вэхд гъуллугъсохи гъэлхэнд сохденки Ватан имуре, дошде шолумире э Догъисту, эз комики межбуьр бирени сокити э гьеммей Уруссиет. Эришму эз зевер хосденуьм кумеки, мердьети ве хьохоми э жугьобдорлуье жигей Ишму».
У гьемчуьн гуфди э товун вожиблуье мэг1энолуьи э зиндегуни регион эн дин-дог1отие жэг1миет мусурмуи комиреки сервори сохдени Ахмад Афанди.
Гьемчуьн у руй бисдо эки архиепископ Махачкалински ве Грозненски Варлаам: «Жиге, эже ишму гъуллугъ сохденит, лап вожиблуьни эри гъисметгьой Уруссиет. И келе гофгьо нисди, эзу товун ки, эгенер э Догъисту э г1эрей дингьо шолуми дери, и нишонеи эри угьонигейгегьо. Эзу товун эри ишму хосденуьм г1эсуьлменди, хьохоми, сабуьри, ве гьемме у, чуь гереки жугьобдорлуье рэхьбере, комики кор сохдени э ижире торихлуье ве динлуье вожиблуье жиге, чуьн Догъисту».
Сервор республике эз патриарх гуфди согьбоши эри буьлуьнде гъимет дореи жофогьой хьуькуьм республикере. Сергей Меликов гьемчуьн гуфди, ки имбурузине Догъисту чуькле нишон Уруссиети – чуьтам э мескен гуьре, гьечуь г1эреймиллетлуье г1ошире базургенди. «И андуьрмиш сохде оморени, гьейчуь имбуруз Догъисту бирени жиге эри синемиши э муьхькеми: эгенер иму миданим офде четинигьоре, э гьеммей Уруссиет г1эмел миев жегьисде гемире дур эзи четинигьо. Эзу товун имбуруз иму хьэрекети сохденим бире еклуьг, бире гьееки, чуьтам Ишму гуфдиренит. Хьуьрметлуье Сервор эн Московски Килисе ве эн гьеммей Уруссиет, иму гъэгъигъэт хуьшдере гьис сохденим нишон эн буьлуьнде вилеет иму ве гъэлхэнд мисохим и чуькле нишоне э Кавказ гье гьечуь, чуьтам хьозуьрим гъэлхэнд сохде буьзуьрге Ватан имуре – Уруссиете»,- гуфди сервор Догъисту.
