Рамбом Беньягуев хьэсуьл омори 26-муьн январь 1953-муьн сал. Тербиевегуьрди э школе №115 шегьер Дербенд. Бэгъдовой варасдеи школере гъуллугъ сохди э гъушун, э технически гъуллугъсохи ракетни гъушун.
Э 1979-муьн сал, бэгъдовой вогошдеи эз гъушун, рафди э хундеи э Ростовски хьуькуьмлуье университет, э физически факультет. Э 1984-муьн сал варасде омореи университет ве вегуьрди диплом э сенигlэтевоз физик-теоретик.
Хуьшдени тербиедорение корисохире Рамбом Беньягуев сергуьрди э 1984-муьн сал. Э бэхшсохдеи у миё бу дарафде э кор э завод, оммо эз гье у бэхшсохдеи у дебе сохди, ве рафди э корисохи тербиедореи физикере э сенигlэткорлуье-технически идоре №16. У гьеммише хьисоб сохди, чуьки кор э корхоне ежирелуье тегьери ве нисе мерэгълуь. Оммо кор э гlэилгьоревоз лап мерэгълуьи – э училище гереки бире гъэрор норе четинигьо ве везифегьо, чуь э физике. Те 1991-муьн сал жогьиле тербиедорегор тербие дори энжэгъ физикере. Э вэхд корисохи э училище у э кор венгесди программесохи калькулятор ве э гьееки э хьэрмэхьовоз тербиедорегоревоз, Расул Керимове, хьозур сохди уре. Эну хьозур сохдеи бисдо бердегор э боржбери жогьиле сенигlэткорсохгьо э нум гуьрдеи «Молгьо хэлгълуье хэржисохи», зутеине хэёл бу жэгlмитегьерие ведешендеи ижире калькуляторе. Суьфдеи калькулятор, ведешенде оморигьо э училище, э кор венгесде омори э дерсгьой физике, комигьоки гирошди мерэгълуь ве менфигlэтлуь. Эну корисохи э тербиедореи физикере бири омборте 15 сали.
Рамбоме Хагаевиче Беньягуеве э 1977-муьн сал доре омори нум «Верзуьшлуье тербиедорегор Уруссиети Федераци», зиреклуье когъоз э товун доре оморигьо нум коминики гъул кешири Б.Н.Ельцин.
Кейки э училище бири гъэрорноме э гуьнжо овурдеи компьютерни класс, Рамбом Хагаевич э хоширевоз сергуьрди тозе коре. У вохурди э министревоз соводи республике ве эну жигегиревоз ве те эхир бегьем сохди и коре, эри чуьки э училище гlэмел миёв расунде компьютергьо. Тербиедорегор э келе хоширевоз хуьшдени ю сергуьрди э жиге ю норе гье и компьютергьо. Умогьой э училище хьэсуьл омори тозе курсгьо – операторгьо ЭВМ (электронно-хьисоб сохденигьо мошингьо). Э у вэхд э Догъисту компьютерни класс э училище бу эз гьемме хубте технически расунде оморе. Эз 1991-муьн те 2004-муьн салгьо хундегоргьо курсгьой эн уре бири бердегоргьо республикеи боржберигьо э информатике.
Э 2005-муьн сал рафди э тербиедорегори э жэгlмисоводлуье школе №12, эже кор сохди гьевелине корсохгьой эну ве хьэрмэхьгьо. И школе еки эз суьфдеигьо, э хьисоб дешендеи войге тербиедорегоргьоре ве хундегоргьоре ве минкини хуьшдере, вокурди тозе сенигlэтлуье дананидореи – информационни сенигlэт. Э вэхд жофо кеширеи э школе №12 Рамбом Беньягуев ведешенди шеш классгьо, омборе хундегоргьой эну дарафди э университетгьо чуьтам эн вилеет иму (МГУ Москови технически университет нум Баумана, ВШЭ), гьемиге э де вилеетигегьо. Омборте зуте варасди буьлуьнде хундение идоре ве кор сохденуьт э сэнигlэткори программистигьо.
Э 2009-муьн сал э республике гировунде омори боржбери «Э кор венгесдеи мэгlлуьметилуье технологигьо э данани». Рамбом Хагаевич Беньягуев вегуьрди суьфдеи жиге э нум «Э кор венгесдеи эн ю хуьшдени программегьо э тербие доре информатике». У э гуьнжо овурди интержелдлуье книг информатике (еклуье программе эри кор сохде э тестгьоревоз э коминики дорушде омори экуьнди 2000 тестгьо ве везифегьо).
Омборте э шегьер иму хуте бири кор сохде э компьютер э хотур чуьки Рамбоме Хагаевиче. Э хотур чуьки тербиедорение мэгlрифет ве тигъэтлуье гъэножогъи эки гьерки хундегоргьо гlэилгьо вегуьрди муьхькемлуье данани э физике, математике ве информатике. Дануьсди вокурде очугъ сохде эн хуьшдени божеренемэгlрифетгьо ве мэгlрифетгьо. Омборте гердо ижире сечсохдение тербиедорегоргьо, чуь Рамбом Хагаевич Беньягуев!
