Гуьрдлемей Координационни меслэхьэт э товун пуьрсуьшгьой нисд сохдеи гъэрхунди мегьине муьзд жофоире и пушогьо гировундебу жигегир Сернуьш эн Хьуькуьм Республикей Догъисту Абдурахман Махмудов.
Э гуьрдлеме бэхш вегуьрдебируьт жигегиргьо эн серворгьой шегьергьо Кизилюрт, Кизляр ве эн Махачкале, гьемчуьн эн корсохгьо идорегьо-гъэрхундбирегоргьо.
Э товун чорегьо, комигьореки гъобул сохденуьт рэхьбергьо эн органгьой веровунденигьо хьуькуьм ве эн муниципальни соводигьой республике э товун нисд сохдеи гъэрхунди мегьине муьзд жофоире э вице-премьер ихдилот сохди жигегир эн министр жофо ве социальни параменди Догъисту Зураб Багомедов.
Жигегир министр мэгlлуьм сохди, чуьки те сентябрь эни сал э хьисоб веноре омори гъэрхунди э корхонегьо МУП «Садовник» э шегьер Махачкале – 2649 гьозор монетгьо, ОАО «Горводпровод» э шегьер Кизляр – 240 гьозор монетгьо (мэгlлуьм сохде омори пулсуьз мундеи), МУП «Спецавтохозяйство» э шегьер Кизляр – 2093 гьозор монетгьо (гъэрхунди нисд сохде оморени эз пулгьо, вегуьрде оморенигьо эз гъэрхундбирегоргьо э гъэрорномей дивун гуьре), НАО «Дагфос» э шегьер Кизилюрт – 6622 гьозор монетгьо (мэгlлуьм сохде омори пулсуьз мундеи).
Э овхьолет те 20-муьн сентябрь МУП «Дербентские очистные сооружения» те эхир нисд сохдет гъэрхундире э 2,2 млн монетгьо.
Жигегир рэхьбер эн Хьуькуьметлуье инспекцией жофо э Республикей Догъисту Мудрикат Магомедов э гуьрдлеме ихдилот сохди э товун гъобул сохде оморигьо чорегьо эки рэхьбергьой идорегьо, комигьоки дегьишдет гъэрхунди эн мегьине муьзд жофоире.
Э гlэрей гуьрдлеме гьемчуьн пуьруьш сохде оморебу овхьолет э товун гъэрхунди эн мегьине муьзд жофои эн гьер идоре-гъэрхундбирегор.
Э нубот хуьшде, Абдурахман Махмудов битlэгlрифи дори жугьрбдорлуье одомигьоре э товун МУП «Садовник», ОАО «Горводопровод» ве НАО «Дагфос», комигьоки гъобул не сохдет чорегьо э товун э вэгlэдо ю нисд сохдеи гъэрхунди эн мегьине муьзд жофоире. Вице-премьер гуфди, чуьки гъэрорномей чорегьо э товун э вэгlэдо ю дореи мегьине муьзд жофоире – и пуьрсуьш эн жугьобдорлуье одомигьо эн гьер ризи. Эгенер кор дуз норе омоге — гэрор сохде не оморигьо чорегьо нисе бире.
Э товун артгьой гуьрдлеме Абдурахман Махмудов серворгьой Кизляре ве Кизилюрте дори гъуллугъ бирмунде молгьоре эри песдеине кор сохдеи э назарлуье органгьоревоз гьемчуьн э ихдиергъэлхэндлуье органгьоревоз.
