Жигегир эн Сернуьш Хьуькуьм Догъисту Ризван Газимагомедов вохурди э Гlуьзетлуье консул Уруссиетевоз э Тривандрум Республике Индие э Ратиш Наиревоз, комики э регион омори э гирошдигьо орине.
Э Хуней Дусди угьо пуьруьш сохдебируьт минкингьой песдеине еклуье корисохире. Вице-премьер Ризван Газимагомедов эз нуминей сервор республике эз гъуногъгьо гуфди шолум э хори Догъисту.
Гирошденки эки пуьруьшсохи дуьтарафие еклуье корисохире, жигегир сернуьш гуфди, ки алверсохи э гlэрей Догъисту ве Индие э 2023-муьн сал зевер бири э се гиле, и бирмундени ки бизнес эн гьердуь тарафгьо желдлуь кор сохденуьт ве еклуье корисохи параменд бирени.
Гереки гуфдире, ки э суьфдеи квартал эн 2024-муьн сал алверсохи зиед бирени. Денишире э 2023-муьн сал алверсохи зиед бири э 88%. Гереки э ер овурде, ки э 2024-муьн сал тараф Догъисту гьемчуьн вохурдебу э десдеревоз эз Индие, гьэгъигъэт э вице-президент Фондевоз Индие-Уруссиет – э президент холдингевоз Pacific Global Exports э Судхир Пал Сабхарваловоз. Э гlэрей вохурдеи Избербашски коньячни завуд гъуьл кешири Меморандум э индийски тарафевоз э товун фуьрсореи молгьой Догъистуре э Индие. Гьемчуьн гуфдире оморебу, ки еки эз суьфде нуботлуье тарафгьо эн дуьтарафие еклуье корисохи мидануь бире сафари. Эз тараф хуьшде регион хьозуьри э пушо норе жир-бе-жире сафарлуье программегьо: рафдеи э торихлуье жигегьо, шинох биреи э базургенди ве гlэдотгьой хэлгъгьой Догъистуревоз, гьемчуьн желдлуье форигъэти э тебиет.
Республике еки эз пушебергьо э кошде веровундеи дигьлуье хозяйственни молгьоре, гьемчуьн хьозуьри ихдилот сохде э товун синогъи ве технологиегьо э товун битмишидори, молгъэредори ве тозеден э кор венгесдеи дигьлуье хозяйственни молгьоре.
Ризван Газимагомедов эз Гlуьзетлуье консул Уруссиет э Республике Индие гуфди, ки гереки желдлуь э кор венгесде транспортни-логистически минкингьой эн Республикей Догъистуре эз гlэрей гlэрейхэлгъие рэхь «Софун-Дорум».
Э нушудии хуьшде вице-премьер гьемчуьн гуфди э товун мерэгълуьи регион э параменд сохдеи еклуье корисохире э соводи ве базургенди. Гьечуь, э гlэрей омореи консул э план гуьре денишире оморени ки вохурдеигьо гировунде миев э нушудорегоргьой эн зеверие хунденигьо идорегьой Догъистуревоз ве э рэхьбергьой Дербендевоз.
