4-муьн август шегьер Дербенд, комики мэгlлуьмлуни э гъошире торих ве базургенде миросиревоз, бири шогьод эн вожиблуье гъозие э сферей соводи – вокурдеи суьфдеи сэхьиблуье школере «Happy Land». И проект лап вожиблуьни эри регион, комики хэрекети сохдени хубте сохде системей соводире ве деде-бебегьоре ве гlэилгьоре минкин дорени вихде э сферей соводие гъуллугъгьо.
«Школе «Happy Land» э гуьнжо овурде омори э везифей дореи буьлуьнде риз соводире. Иму тигъэт имуре фурсореним э параменд сохдеи неки гlилмие дананигьоре, оммо гьемчуьн божеренемэгlрифетгьой гlэилгьоре. Везифей «Happy Land» – э гуьнжо овурде хунденигьо гьоворе, кумеки сохденигьо э гуьнжо овурде мэгlрифетлуье фикирсохире, бигlэдотлуье ве социальни жугьобдорлуьире»- гуфди э гуьнжоовурдегор школе Суварова Камила Зауровне. Уре гьисди синогъи э кор венгесдеи соводие проектгьоре, биренки э гуьнжоовурдегор сэхьиблуье богъчей гlэилире.
Э школе, комики хьозуьри гъобул сохде 100 гlэилгьоре, кор мисоху жире-бе жирее программегьо э комигьоки дешенде омори хунденигьо дерсгьо, шекуьлуье ве идмонлуье желдлуьи. Гьемчуьн жирелуье тигъэт доре оморени параменд сохдеи английски ве арабски зугьунгьоре, эзу товун ки дедегьо-бебегьо варасиренуьт вожиблуьи энугьоре эри биевгьой гlэилгьой хуьшде.
Э школе «Happy Land» дери гьеймогьине хунденигьо классгьо, жирелуье кабинетгьо ве жигегьо эри мэгlрифетлуье дерсгьо. Э школе э гlэилгьоревоз кор мисохут логопедгьо ве психологгьо, гьемчуьн э программе дешенде омори шахматгьо.
Соводие кор вокурде омори э биней гьеймогьине тегьергьо, комигьоки э хуьшде дешенденуьт жире-бе-жирее интерактивни тегьергьой хундеи. Тербиедорегоргьой школе – и синогълуье сенигlэткоргьои. Везифей энугьо – хуте сохде гlэилгьоре хосде дананире ве параменд сохде хуьшдере.
Вокурдеи «Happy Land» э гуьнжо овурдени тозе минкингьо неки эри хундегоргьо, оммо гьемчуьн эри гьеммей регион. Гьемчуьн э биевгьо э школе гировунде миев жире-бе-жирее усдое-классгьо, семинаргьо ве базургенде мероприятиегьо, комигьоки гlэилгьоре ве дедегьо-бебегьоре минкин миду шинох бире э гъосуьтгьоревоз вожиблуь гьисдигьо гьонине вэгlэдо ве офде тозе мерэгъгьо.
Эзуш бэгъэй, сэхьиблуье школе мибу жигей омореи эри сенигlэткоргьо э сферей соводи, чуь э нубот хуьшде хуб кори мисоху э риз сенигlэтлуьи эн тербиедорегьо э Дербенд.
Вокурдеи суьфдеи сэхьиблуье школере «Happy Land» – и лап вожиблуье пойнореини эки гьеймогьине соводи, комики бирмундени хэрекети шегьере параменд бире ве хуте бире эки тозе овхьолет. И хьэвес деде-бебегьоре дорени минкин вихде хубтеире эри гlэилгьой хуьшде ве э гуьнжо овурдени овхьолет эри гьемметарафлуье параменд биреи гlэилгьо. «Happy Land» – и неки школеи, у гьемчуьн жигеи эри зевер биреи, хундеи ве мэгlрифет, комики, егъин, кумеки мисоху хубте сохде соводире э Дербенд.
