Э Дербент уруссиетие, азербайджански ве ирански депутатгьо ве сенигIэткоргьо э сетарафлуье гуьрдлеме пуьруьш сохде пуьрсуьшгьо гьемкоркии э гъэд параменди гIэрейхэлгъие транспортни сиро «Софун-Дорум».
Гьемме э гуьрдлеме бэхшвегири сохде 27 сенигIэткоргьо э 9 одоми эз гьер тараф. Уруссиетие одомигьоре сервори сохди рэхьбер Департаменте хьуькуьмлуье политике э коргьо автомобильни ве шегьерие одомилуье транспорте Минтрасе РФ Сергей Семенов. Э делегаци гьемчуьн дарафди нушудорегоргьо Минэкономпараменди РФ, Федеральни гуьмруькхонее гъуллугъсохи РФ, Федеральни гъуллугъсохи э зеверсер э коргьо транспорте. Хьуькуьм РД э гуьрдлеме шинох сохди вице-премьер Ризван Газимагомедов, жигегир министре экономике ве е гъэдер мескение параменди РД Шамиль Аммаев, рэхьбер МИД Уруссиет э шегьер Махачкале Марат Османов, ве гьемчуьн нушудорегоргьо еккейгегьо министерство ве идорегьо республике.
Уруссиетие Хьуькуьм имид сохде э у, чуьки сиро «Софун-Дорум» мибу ухшешие тегьер Суэцки чой ве гьишде доре дузе рэхь веровундеи бердеире чуьтам э Европе, гьечи ве эз Уруссиет э Перситски дерьёгьче. Вожиблуье хуьшгерэхье жиге сироре гирошдени э е гъэдер мескен Уруссиет, Азербайджане ве Иране, гьейсэгIэт бинелуье гъэдер бердеи э жиге овурде э кумеки шелеи автомобильгьо. Э корисохи гуьрдлеме нушудорегоргьо Москове, Тегеране ве Баку игърол бесде э товун э гуьнжо овурде корисохие десде э шеле бердеи.
«Эз ирански тараф игърол бесдеи э товун гировундеи гье у вохурдеире бири рафде расире э февраль 2024-муьн сал э вэхд гировундеи уруссиетие-ирански гIэрейхьуькуьмлуье несиет э фурухде-экономически гьемкоркии э Тегеране э зир сернуьши вице-премьере РФ Александра Новака ве министре нефти Исламски республике Джавада ОУДЖИ. Эз азербайджански лой иму игърол бесде э дуьтарафие гуьнжолуьи»,- мэгIлуьм сохде нушудорегор Хьуькуьм Догъисту э сер фурухдеи РФ э Иране Андрей Танаев, комики гъобул сохде бэхшвегири э вохурдеи э гъэд уруссиетие одомигьо.
Те гировундеи сетарафлуье игърол бесдеи корсохгьо винири серхьэдие ве гуьмруькхонее жиге эри гирошде э уруссиетие-азербайджански ве азербайджано-ирански серхьэд.
«Э жиге гьишдеи гирошде «Яраг-Казмаляр» гьемме бире э жейлее фикир ек пенжере – дори когъозе, э гъэд 30-40 минут угьоре хьозуьр сохди, дори гердундегоре, ве у рафди»,- ихдилот сохди Танаев ве зиёд сохде, чуьки эз бердегоргьо вегуьрде хубе оголномей вогордундеи э жиге дегьишдеи.
Зуте идоре «Уруссконгресс» э сенигIэткоргьорево МГИМО хьозуьр сохде хэберлуье-гешдеи гIилмие ихдилотсохи «Сиро «Софун-Дорум»: тозе минкини эри буруние фурухдеи Уруссиет».Гье у гуфдири, чуьки МТК «Софун-Дорум – келе гIэрейхэлгъие фикир э гуьнжо овурдение мультимодальни транспортни сиро, дешенденигьо рэхьгьовуние, автомобильни, дерьёгьие ве нуькереие рэхьгьо, дурази 7200 км: эз лап келе порте софуне Уруссиет Санкт-Петербурге те келе порте Индии Мумбаи. Имбуруз МТК бесде софун Европе э вилеетгьо Персидски дерьёгьче ве Индийски дерьёгь эз Уруссиет, Кавказ ве Бинелуье Азие ве нушу доре э хуьшде жире-бе жирее торихлуье рэхьгьо, ек бире гъэдер гьисдигьо макрорегионе.
Гуьре Транспортни везифгьо Уруссиетие Федераци те 2030-муьн сал, МТК «Софун-Дорум» гьисди еки эз вожиблуье рэхь параменди ве вожиблуье кор эри буруниефурухдеи везифгьо Уруссиет.
Сиро не дениширеи э гьисдигьо «тенге жигегьо», гьисди жерге зевербиреи. Войге энуре э гуьнжо овурдеи гьисди дуразе торих, оммо зобуне гIэрейхэлгьие-политически бэхьсбердеи ве санкцигьо песини салгьо диеш зуте сохде коргьо э дурази рэхье ве дешенде тозе.
Э биёвгьо вэхд сиро «Софун-Дорум мибу вожиблуье гъэдер транспортни каркасе Евразии.
Ек биреи э омборте евразийски транспортни рэхьгьо Мизрэхь-МэгIэров (Китай – ЕС), э евразийски транзитни рэхь эз Казахстан, Уруссиет ве Белорусси, МТК «Софун-Дорум» белки возире келе гъэдуьр э гуьнжо овурде «тозе бэхшсохдеи» ве тозеден вокурде гIэрейхелгъие транспортни-бэхшсохдеи гьелгъэ бэгъдовой бигIэдоти, огол зереи бурраи динлуье гьелгъэгьо овурдеи э 2022-2023-муьн салгьо. Гье у доре песдеине зевербиреи кори сохдеи дуь э екиревоз э фурухдеи ве муьхькем сохде гъэножогъи э гIэрей Уруссиет, Индие, Иране, вилеетгьо Бинелуье мескен Азии ве Куьнде Мизрэхь»,- гуфдири э когъохоз.
