Эсер гъэдэгъэи Серворе Догъисту Сергее Меликове Сернуьше Хьуькуьме Республике Догъисту Абдулмуслиме Абдулмуслимове гировунди гуьрдлеме эсер пуьрсуьше э гуьнжо овурдеи рекламни корисохире э регион.

Э пуьруьшсохи гъобул сохди бэхшвегири вице-премьер, серворгьо гьеммей 10 шегьергьо республике, рэхьбергьо идорегьо веровундеие хьуькуьме.

А.Абдулмуслимов риз кешири, чуьки фегьмсохи э и коргьо мунди вес нисди, ве чуьтам арти – веди сохде бире гъозие бидузе рекламе, дошде «бисэхьибе» ве гъонунсуьзлуье рекламни системегьо.

Премьер-министр э ёр овурди, чуьки э эхир 2023-имуьн-сергуьрдеи 2024-муьн сале Э Махачкале, э рэхь э гiэрей Махачкале ве Каспийск бири гировунде вожиблуье кор, оммо имбуруз гъозие гене талаб сохде гъэриши эз лой муниципальни ве веровундение идорегьо хьуькуьме.

Эзуш бэгъэй бире гъозие гъонунепузмиши федеральни жергей гъонунгьо, эзуш бэгъэй рекламе, эз комикигьо бире гiэйб оморе, э рэхьгьо мунде рекламни бирмундеигьо, комикигьо нисе дешенде э тогiин сохдеие э муниципальни улкегьо ве шегьерие э гуьнжо овурдеи офдеи жиге дореи рекламни системегьоре»,- гуфдири премьер-министр.

Фикиргьой эн хуьшдере э гуьрдлеме гуфдири суьфдеи вице-премьер Руслан Алиев, вице-премьергьо Заур Эминов ве Рамазан Джафаров, сервор Махачкале Джамбулат Салавов, рэхьбер Идоре эсер корсохгьо ве пуледореигьо РД Хаджимураде Исрапилове, серворгьо шегьергьо.

А.Абдулмуслимов мэгiэнолуь бире гъэдэгъэре – эз себэхьине руз сер гуьрде эки келе хьисобсохи офдеи жиге дореи рекламни системегьоре, вечаруьндеи гъонунсуьзлуье системегьоре.

Бэшгъэ гъэдэгъэ зери тозе сохде герекие гъэдерлуье-ихдиёрие гъонунгьо э муниципальни соводигьо, э у гъэдер гуьнжолуьи офдеи жиге дореигьо.

Пуьрсуьш мибу э хуьшдение фегьмсохи Сернуьше Хьуькуьме РД.