Жигегир серворе Догъисту Фёдор Щукин гировунди дуь эекиревоз гуьрдлеме Республикански оголзереие комиссие ве Зурие бинере. Пуьруьш сохде омори пуьрсуьшгьо гировундеи васалие оглзереире э муниципалитетгьо республике, коре э сер вихдеи одомигьоре эри контрактни гъуллугъсохи ве дарафдеи э лешгерие вузгьо.

Вокурде гуьрдлемере, жигегир серворе Догъистуре омборекбу сохди гьемме корсохгьоре э Рузевоз серхьэдчире. СенигIэткорлуье мигIид лешгерие гъуллугъсохгьо бирмунди 28-муьн май. Фёдор Щукин войге сохди угьоре сэхде жунсогъи, хушхьоли ве барасигьо э гъуллугъсохи.

Э товун гьелелуьгее барасигьо коре оголзереие комиссие э регионе гуфдири лешгерие сервор Догъистуре Абдурахман Мурадханов.

Э ёр овурденим, эсер буйругъ серворе э гьеммей вилеет оголзереие компание берде оморе эз 1-муьн январь ве те 31-муьн декабрь. У гъобул сохде жовоне одомигьоре э гIуьмуьрлугъи эз 18 те 30 салгьо, комикигьо нисди э резерве.

Фуьрсореи тозегьоре эки жигегьо гъуллугъсохи гировунде оморе эз апрель те июль, гьемчуьн эз октябрь те декабрь.

Э гьонине вэхд э Ерэгъленмишие Гъувотгьо РФ, э у гъэдер серхьэдие лешгеригьо, э Лешгеригьо миллетлуье гвардие огол зере оморе догъистунигьо 1996-2008-муьн салгьо хьэсуьл омореи, комикигьо поисде э лешгерие хьисобсохи.

Э гъэд угьо, ки веровунде гъэрхундире зуте эз вэхд – Махачкале, Каспийск, Хасавюрт, Кизилюрт, Избербаш, Буйнакск, Кизляр, Южно-Сухокумск, Хасавюртовски, Новолакски, Кизилюртовски, Кумторкалински, Каякентски, Карабудахкентски, Буйнакски, Кизлярски районгьо.

Бэшгъэ лешгерие сервор республике поисди э барасигьо вихдеи одомигьоре эри дарафдеи э вузгьо Минобороне. ГьейсэгIэт войге вегуьрде лешгерие сенигIэткорире войге сохди 493 одоми. Гьемме угьо гирошди вихдеи, хуьшдение коргьо эн угьо фуьрсоре омори э хундение идорегьо.

Эри хубе э гуьнжо овурдеи лешгеригьоре коре эсер хэбере дореи оголзерегоргьоре, э у гъэдер э кор венгесдеиревоз еклуье реестре лешгерие хьисобсохире ве э хуьшде вогосундеи СМИ, мибу зиёд сохде.

Гьемчуьн мибу гъувоте зиёд сохде коре э жовонгьоревоз.

«Барасигьоре гIэмел миёв те эхир бегьем сохде энжжэгъ хубе дуь эекиревоз коревоз. Веровундеи протокольни гъэдэгъэгьоре мибу фегьм сохде»,- овурди артире Ф.Щукин.