Рэхьбер эн Федеральни агенство эн дерьегьлуье ве нуькерее транспорт (эн Росморречфлот) Андрей Тарасенко омори э Махачкалински дерьегьлуье алверие порт.

Рэхьбер эн Росморречфлот А.Тарасенко, сервор эн порт Махачкале Джамал Алиев ве жигегир эн министр транспорт РД Саид Рамазанов вохурдет э бэхшвегиргьой эн бурунеэкономически корисохиревоз.

Андрей Тарасенко гуфди э товун хубе кор эн корхоне, меселен, бердеи молгьо зевер бири, комики э артгьой эн гирошдигьо сал гуьре зевер бири эз 3 млн 200 гьозор тонн. Э товун параменд сохдеи гIэрейхэлгъие рэхьгьой мошингьоре гуфдире оморебу, ки эри э гуьнжо овурдеи контейнерни бердеигьоре ФГУП «Росморпорт» э киро вегуьрди жигегьо э ирански портгьо Амирабад ве Чабахар.

Э план гуьре денишире оморени ки э гIэрей эни жигегьо э гуьнжо овурде миев бежиде ологъигьо, чуь минкин миду э кор венгесде параменд биренигьо рэхьэ Индия–Иран–Уруссиет э гIэрей МТК «Софун–Дорум».

Гьемкоркигьо эн махачкалински порт э нубот хуьшде мэгIлуьм сохдет ки угьо хьозуьруьт фегьм сохде тозе рэхьгьоре ве юкгьоре.

Бэгъдовой вохурдеи э порт Андрей Тарасенко ве Джамал Алиев бэхш вегуьрдет э гуьрдлеме э Сервор эн Республикей Догъисту Сергей Меликовевоз.