16-муьн октябрь э торихлуье богъче “Уруссиет — торих мени” бирмунде оморебу план эе Динлуье меркез, комики вокурде миев э гъэдимие Дербенд.
Э унжо бэхш вегуьрдебируьт сервор регион Сергей Меликов, рэхьбергьой эн гьемме дингьой Догъисту, гъовумгьо эн бэхшвегиргьой СВО, журналистгьо ве пушебергьо эн жэгIмиетлуье фикиргьо.
Э и хьисоб э гIэрей гъуногъгьо дебу: депутат эн Хьуькуьметлуье Думе Хизри Абакаров; дедей Игид Уруссиет эн Нурмагомед Гаджимагомедов Сапижат Мазаева.
Келе проект — и хуней дин-догIоти мусурмуи, килисе ве нумаз, комигьоки вокурде миев э е богъче. Гьуьндуьри минорей мусурмуи мибу 88 м., и мибу лап гьуьндуьре хуней дин-догIоти мусурмуи э вилеет. Пуле эри вокурдеи миду сенатор эз Догъисту Сулейман Керимов.
Суфьде Сергей Меликов гуфдиребу, ки “ижире меркез бирмундени чуьки дингьо ве базургени мидануьт зигьисде гьееки неки э гъэдимие Дербенд, э Догъисту, оммо гьемчуьн э гьемме келе вилеет иму”. “бине эн гьеммей проект параменд сохдеи Дербенде — и Динлуье меркези”, -Сергей Меликов буьлуьнде гъимет дори дуьруьжде вокурдеире, комики вокурде миев э биевгьо. Сервор Догъисту эз сенатор Сулейман Керимов гуфди согьбоши эри э кор венгесдеи ижире келе проеекте э гIэзизе республике.
“Лап вожиблуьни, чуьки иму э инжо виниреним неки килисе, нумаз ве хуней дин-догIщти мусурмуи, оммо гьемчуьн виниреним у коргьоре, комигьоки ологълуь сохдени и объектгьоре э торих Догъистуревоз ве гъэдимие шегьер Дербендевоз.
Сулейман Абусаидович — одоми, комики фикир сохдени э товун динлуье объектгьо. Гьеммейки дануьсдени, ки у кумеки сохдебу э вокурдеи хуней дин-догIоти мусурмуире э Москов — эн меркезлуье хуней эн дин-догIоти мусурмуи. Сулейман Абусаидович желдлуь дешендени пулгьой хуьшдере э вокурдеи Динлуье меркезе э Махачкале. Бэхшвегири эну гьееки э угьонигее меценатгьоревоз эз республикей иму ве э гьемме одомигьой Догъистуревоз и лап вожиблуьни эри вокурдеи Динлуье меркезе э шогьнишон иму. Мере воисдени гуфдире согьбоши эри эну, чуьки у гьеммише веровундени э сер хуьшде вегуьрдигьо гъэрхундигьоре э пушой Догъисту ве одомигьой Догъисту”,- гуфди сервор региона.
