7-муьн октябрь сервор Догъисту Сергей Меликов бэхш вегуьрди э вожиблуье сессие э товун параменд сохдеи сафарире э зир рэхьберьети эн Сернуьш хьуькуьм РФ эн Михаил Мишустин.
Гьонине вэхд э Уруссиет ведини хубе дегишигьо неки э доруние, оммо э оморенигьо гъэдер сафарчигьо. Э 2024-муьн сал оморебу 90 млн.сафарчигьо, оммо эри 8 мегьгьо эни сал зевер бири экуьнди 5,5%.
Бинелуье везифе – сохде сафарире э вилеет секонесуьзи, хуьшлуь ве расирени, э хьисоб вегуьрденки гереклуьигьо эн келете эрхэгьоре ве эн кифлетгьоре э гIэилгьоревоз.
Эри эни вокурде оморени гьеймогьине аэропортгьо, фирегь сохде оморени рэхьгьой мошингьо, хубте сохде оморени гъуллугъсохи одомигьоре э рэхь гьовунигьо, зиед бирени гъэдер рэхьгьо эн нуькерее сафари, оводу сохде оморени жэгIметлуье жигегьо, омбар бирени гъуногъхонегьо ве гъуьч сохде оморени коммунальни инфраструктуре.
Эри параменд сохдеи сафарире э план гуьре денишире оморени ки э песини пенж салгьо фуьрсоре миев экуьнди 400 лрд монетгьо. Чорегьой гъувотдореи дешенде омори э миллетлуье проект, э гIэрей энугьо: кумеки сохдеи э регионгьо эри э гуьнжо овурдеи егъинлуье жигегьоре, эри э гьнжо овурде инфраструктурере эри дуьруьжде сафарлуье жигегьо, вокурде модульни гъуногъхонегьоре.
Э кор венгесдеи проектгьой согъсалине курортгьоре э мескенгьой эн Черни, Азовски, Каспийски ве эн Балтийски дерьегьгьо, э Приморье, гьемчуьн э ен дерьегьче Байкал. Э песдеине гьер сал э унжо мидануьт форигъэти вегуьрде те 10 млн. одомигьо.
Кредитгьо доре миев эри вокурдеи гъуногъхонегьоре, богъчегьой кефи-хьэзигьо, эри горнолыжни курортгьо ве аквапаркгьо. Гъэдер мерэгълуь сохде оморигьо пулгьо эри шеш сал белки гуьнжуьнде миев экуьнди 2 трлн. монетгьо.
Э 2024-муьн сал жэгIмие гъэдер пулдешендеигьо э сафарлуье отрасль расири э 1,1 трлн монетгьо, и меселен э се гиле омбартеи, эз чор сал пушоте дешенде оморебугьо. Э хотур эни э кор венгесде омори экуьнди 55 гьозор тозе нумиргьо эри сафарчигьо эз гьеммей Уруссиет.
«Диреморенигьо параменд сохдеи отрасле гереки мерэгълуь сохде гьемме тарафгьой экономикере – эз транспорт ве корхонегьо те базургенди, дигьлуье хозяйство ве соводи. Э инжо гереки еклуье кор эн ведомствогьо», — гуфди Сернуьш Хьуькуьм. Очугъэ нишоне эн хэйрлуь э кор венгесдеи хьуькуьметлуье плане э сферей сафари гьисди Догъисту.
Э регион гьер сал оморени диеш омбарте сафарчигьо. Энжэгъ пор э республике оморебу 1,8 млн. одомигьо. Омбар бирени гъэдер гъуногъхонегьо, тозеден сохде оморени рэхьгьо эки сафарлуье объектгьо, омбар бирени сафарлуье идорегьо.
Сергей Меликов сер гуьрди лап келе проект э сферей сафари э гьеммей торих Догъисту – Каспийски гъирогъ дерьегь, комиреки гъувот дори президент Уруссиет ве э кор венгесде оморени э гIэрей дуьруьжде проект «Пеж дерьегьгьо ве дерьегьче Байкал». Гьеммесоюзие сафарие-жунсогъи венгесденигьо курорт вокурде миев э гъирогъ дерьегь. Э унжо мидебу гъуногъхонегьо, богъчегьо, ресторангьо, аквапарк, аттракционгьо ве тропически аквариум. Имисал сер гуьрде омори вокурдеи суьфдеи объектгьоре.
Эри расундеи эн биевгьо инфраструктурей кластере гировунде оморени желдлуье кор эри э гуьнжо овурдеи инженерни каркасе. Гъул кешире омори 16 разимендигьо э инвесторгьоревоз, комигьореки воисдени вокурде э гъирогъ дерьегь гъуногъхоне, спа-комплексгьо, хунегьо ве жигегьой форигъэти. ЖэгIмие гъэдер эн пуллуье сафарлуье гъуллугъигьо зиед бири эз 4 млрд э 2020-муьн сал те 22,3 млрд э 2024-муьн сал. Э сферей сафари кор сохденуьт эз 11 гьозор одомигьо омбарте. Имбуруз гъэдер эн сенигIэтлуье гидгьо — 265 сенигIэткоргьои. Гъэдер эн туроператоргьо зевер зиед бири те 71, эн турагенствогьо – те 120.
Э пенж сал инфраструктуре тозеден ве фиергь сохде оморебу. Жигегьо эри поисдеи зиед бири э шеш гиле – эз 252 объектгьо э 2020-муьн сал те 830 эри 1-муьн сентябрь эни сал.
Вожиблуье тараф параменд сохдеи сафарире бири э кор венгесдеи проект эн жигенлуье хьэвесгьо, э кор венгесде оморигьо э фикир эн Сергей Меликов гуьре э 2022-муьн сал. Э хотур доре оморигьо субсидиегьо муниципалитетгьоре э шегьергьо ве дигьгьой республикере оводу сохде омори жигегьой форигъэти ве тозе жэгIметлуье жигегьо.
