Сеимуьн гуьрдлеме эн гIэрейвемтвенни комиссие эри ихдиер доре э кор венгесде жирелуье нишоне «Бренд Дагестан» гировунде оморебу э зир рэхьбеьети эн Сернуьш Хьуькуьм эн Республикей Догъисту Абдулмуслим Абдулмуслимов.
Э гуьрдлеме гьово гуьрде оморебу пуьрсуьш эри ихдиер доре э кор венгесде нишоне «Бренд Дагестан» корхонегьой ООО «БОФФ» ве ООО «Армада Плюс» э ведешенде оморенигьо пойвокугьой энугьо.
А.Абдулмуслимов э ер овурди, ки имбарузине руз ихдиери эри э кор венгесдеи нишоне э республике гьисди 3 корхонегьоре ве 28 муниципальни соводигьоре.
«Доре жирелуье нишоне «Бред Дагестан» пойвокуе корхонегьоре зевер мисоху чигьрет ве шинохдеи молгьой энугьоре. Чуь, э нубот хуьшде кумеки мисоху э песдеине параменд биреи регион. И нишон гъоимлуьи моли», — гуфди Сернуьш Хьукуьм эн Республикей Догъисту.
Догъисту дарафдени э пенж регионгьо-пушобергьо э товун гъэдер ведешендеи пойвокугьо.
Чуьтам гуфдири министр корхонегьо ве эн алвер Догъисту Низам Халилов, фабрикгьо ООО «БОФФ» ве «Армада Плюс» дарафденуьт э хьисоб дуьруьжде ведешендегоргьой пойвокугьо э республике. МэгIнолуье бэхш ведешенде оморенигьо мол – жирелуье пойвоку ве пойвоку эри фэхьлегьо. Корхонегьо омбаре юкгьо фуьрсоренуьт эри лешгерчигьой эн СВО.
Доре ихдиери э кор венгесде жирелуье нишоне «Бренд Дагестан» фабрикгьоре минкин дорени веноре нишоне э молгьо ве э бигlигьой хуьшде, э гъутигьо, гьемчуьн э тэгIрифлуье верзушдореи молгьоре, э и хьисоб бирмунденки э бирмундеигьо, э ярмаркегьо, фурухденки, э гуьнжо овурденки фурухденигьо жигегьоре ве жигегьой бирмундеире.
«Гьееки э уревоз, омбаре гъэдер китайски пойвокугьо э вилеет овурде оморени э «мол эз де вилеетиге овурдеи гъонунсуьз» ве дореи жирелуье нишоне «Бренд Дагестан» пойвокуе корхонегьоре мибу зиедие гъэлхэнд сохдеи догъистонлуье молгьоре эз ухшешигьо. Гьемчуьн зиед мисоху мэгIлуьмлуьи пойвокуе молгьой Догъистуре ве зиед мисоху мескенгьой шинохдеи догъистонлуье молгьоре», — гуфдири сервор эн Минитерство корхонегьо ве алвер.
Сервор эн буйнакски пойвокуе фабрике ООО «БОФФ» Мурад Джалаев фегьм сохденки пуьрсуьш дореи жирелуье нишоне э премьер-министр ихдилот сохди, ки э корхоне, э гуьнжо овурде оморигьо э 2010-муьн сал, гьонине вэхд кор сохдени 50 одоми, жэгIмие гъэзенж эри 2024-муьн сал 90 млн. монетгьои. Мегьине муьзд жофои эн корсохгьо эз 35 гьозор омбартеи. Гьемчуьн э корхоне ведешенде оморени берцы, мердине ве зенуне чекмегьо ве мэхьсгьо.
Э имбурузине руз фабрике «БОФФ» ведешендени 50 гьзор жуьфд пойвоку э е сал. Жирелуьи корхоне и ведешендеи кунпойгьо ве пресс-формегьо эри хьозуьр сохде угьоре. Э инжо ведешенде оморени хубтее пресс-формегьоре э Уруссиет, риз кеши сервор.
Сервор эн фабрике «Армада Плюс» Курбан-Магомед Абакаров ихдилот сохди э товун кор ве эн торих компание, э гуьнжо овурде оморигьо э 2001-муьн сал. Корхоне рэхь хуьшдере сер гуьрди эз ведешендеи гIэдотлуье пойвокугьоре, э 2016-муьн сал корхоне сер гуьрди ведешенде жирелуье пойвокугьо. Имбуруз ведешндени 100 жирегьой пойвокугьоре.
«Иму сер гуьрдейм эз е чуькле цех эз 5 корсохгьо. Э хотур гъоимлуьи мол пойвокугьо восдоре оморембу омбар, чуь кумеки сохди муьхькемлуь сохде жигей хуьшдере э рынок. Бурраи ве духдеи пойвокугьо веровунде оморени э песини технологиегьо гуьре»,- гуфди Мурад Джалаев.
Компание гьемчуьн желдлуь гъувот дорени бэхшвегиргьой эн жирелуье гъовхолуье операциере. Э фикир эн Министерство корхонегьо ве алвер эн Республикей Догъисту гуьре эри лешгерчигьо э СВО фуьрсоре оморебу 700 жуьфд пойвоку. Пойвокугьо фуьрсоре оморени э гьеммей мескен вилеет, э и хьисб эз маркетплейсгьо WiIberries, Ozon, Яндекс Маркет.
А.Абдулмуслимов гуфди, ки рэхьбергьой регион эз тараф хуьшде, ве песдеш гъувот мидуьт жигенлуье сэхьибкоргьоре.
Э товун артгьой эн гуьрдлемей гIэрейведомственни комиссие Сернуьш Хьуькуьм Догъисту Абдулмуслим Абдулмуслимов Минпромторг РД дори гъуллугъ доре ихдиери эри э кор венгесде жирелуье нишоне «Бренд Дагестан» мэгIлуьм сохде оморигьо фабрикгьоре э кор венгесдеи тегьер гуьре.
