«МэгIни э иму вокурде ве зигьисде кумеки сохдени…» «Марш веселых ребят», и мэгIнире нуьвуьсди мэгIлуьмлуье шогьир-мэгIнинуьвуьсдегор Василий Лебедев-Кумач ве композитор буьзуьрге Исаак Дунаевский, гьэгъигъэт расирени эки Захар Рафаилов. МэгIнигьо, комигьореки хундени Захар Рафаилов кумеки сохдени э одомигьо э миенее рузгьо ве э мигIидгьо.
9-муьн декабрь э жэгIмиет дин-догIоти э ОГЕ э Сокольники гировунде оморебу концерт эни мэгIнихундегор, ве е ченд сад одомигьо оморет эри гуш дошде мэгIнигьой энуре, ведиреморенигьо эз дуьл. Эхи у эз дорун дуьл хунде, ве и шиновусде оморени э гьер ноте ве гьер риз.
Захар Рафаилов хьэсуьл омори э 1956-муьн сал э келе омбарегIэилие кифлет э гъэдиме шегьер Дербенд. Э е келе хьэет, эзугьо бэгъэй, зигьисдембу, кифлетгьой эн лелегьой эну, э комигьоревоз угьо дусд бируьт ве зигьисдембируьт э е келе кифлетевоз. Келеи келебебей Захар – мэгIлуьмлуье раби Исроиль, ве эзу товун хьуьрмет ве гIуьзет эки Буьзуьрге книг эн хэлгъ жугьури Тиро э хун эну дебу. Бебей Захар – Исраэль, песини салгьо кор сохдембу э коньячни завуд, э цех дор-куле кошдеи. Деде, Зоя, кор нисе сохдембу, келе сохдембу шеш гIэил хуьшдере. Гьемме мигIидгьой жугьурире гировундембируьт э хуней келеи бирор, эн лелей Хануко. Оммо хьуькуьметлуье мигIидгьоре – э хуней эн чуьклеи бирор бебе эн Севи. Гьемме кифлетгьой бироргьоре омбаре гIэилгьо бу. Оммо не денишире э у, ки угьо лов бирет э гьеммей гIуьлом, гьис еклуги ве дусди те имогьоиш дошде омори. Гьемме бэхшвегиргьой кифлет бежид оморенуьт э гъэдиме Дербенд, эри сер кешире гъоврегьой гъовумгьоре ве э ер овурде угьоре.
Захар мерэгълуь бирембу э музыкевоз гьеле э школе хунденки ве э 5-муьн класс у вараси, ки музык э дуьл эну эри гьеммишелуьгъини. Суьфдеи тербиедорегор эну э миенее школе №11 бу Александр Пашаевич Алиев. Гье евэхди Захар хуте бирембу э кружок «Вози э сер гитаре» э Хуней пионергьо ве эн школехундегоргьо. Тербиедорегор эну бу гьэгъигъэтлуье усдо эн вози э сер гитаре Владимир Мироненко. У омбаре кор хуте сохди уре, эри чуь Захар согъбоши гуфдирени эзу. Э 7-муьн класс Захар Рафаилов бэхш вегуьрдембу э школьни ансамбль, ве и бири сергуьрдеи эн музыклуье мэгIрифетие рэхь эну.
15 сале биренки у суьфдеи гиле возиребу э гIэруьси. Бэгъдовой хунде варасдеи школере те рафдеи э лешгер Захар кор сохдембу э консервни завуд э механически цех, ве гьелбетте, бэхш вегуьрдембу э музыклуье десде.
Э лешгериш, хэвлете вэхд эз лешгер, возирембу э гарнизонни ансамбль, ве эз е гъэдер вэхд бири рэхьбер эну. Бэгъдовой эз солдати омореи огол зере оморебу э ансамбль эн дигьлуье хозяйственни техникум э Дербенд, ве э 1978-муьн сал э сенигIэткорлуье десде э шлифовальни завуд эн Дербенд. У салгьо уре рэхьбери сохдембу мэгIлуьмлуье э шегьер музыкончи Шамиль Узилов.
У вэхд барасилуь кор сохдембируьт гьемме корхонегьо, ве э унжо желдлуь кор сохдембируьт клубгьо. Захаре омбаре мерэгълуье фикиргьо бу, оммо у вихди кор рэхьбери сохдеи клуб эн Дербентски коньячни комбинате. Э унжо у кор сохди экуьнди 10 сал, песде Захар э гуьнжо овурди ансамбль хуьшдере «Каспий», комиреки ве сервори сохдебу. Э и десдеревоз угьо гешдет гьеммей Догъистуре, Софун Кавказе ве омбаре шегьергьой эн Союз Советире э мэгIнигьой хуьшдеревоз, эже дебу ве кавказски шансон, эстрадни мэгIлуьмлуье мэгIнигьо ве гьемчуьн мэгIнигьо э жир-бе-жирее зугьунгьой гIуьлом. Угьо хундембируьт уре, чуь хьэз оморембу одомигьоре.
Э 1982-муьн сал Захар зен хосдебу хэйронлуье духдере, угьоре се гIэили. Э 1997-муьн сал кифлет рафдебу э Исроил, зигьисдембируьт э Нетание. Ве э унжо Захар гьемчуьн э гуьнжо овурди ансамбль хуьшдере ве муьхьшуьл бирембу э музыкевоз. Э сереботи эну, ки уре бежид огол зерембируьт э Догъисту, э Москов ве э унигее шегьергьой Уруссиет, Захар э кифлет хуьшдеревоз гирошди э Уруссиет.
Э Москов Захар рэхьбери сохдембу десдере э нумевоз «Мизрэхь», комики гуьнжуьнде оморебу эз мэгIрифетлуье ве божерене музыкончигьо эн жир-бе-жире миллетгьо.
МэгIнигьо эри Захар – и гьеммеи, ве чуьтам буге е ченд салгьо пушоте, мэгIни – зиндегуни ве хьэвес энуни. Гьэгъигъэтлуье рачи мэгIни э уни, ки у гуьрд сохдени одомигьоре.
Захар хундени э омбаре мэгIлуьмлуье уруссиетлуье мэгIнихундегоргьоревоз. МэгIнихуни эну э Любовь Успенскиревоз ошугъ сохди омбаргьоре.
МэгIрифетлуье рэхь эн Захар Рафаилов гурунд бу ве гье евэхди барасилуь бу энжэгъ э хотур мэгIрифет эну ве э хотур келе мугьбет эну эки музык.
Захар Рафаилов гьейсэгIэтиш шор сохдени хэлгъ хуьшдере э сес ве мэгIнигьой хуьшдеревоз. Э мэгIнихундеи эну гьер шиновуьсдегор миофу сим эн жуьн энуре, комиреки у хьэрекети сохдени гировунде э шиновуьсдегоргьой хуьшде.
Нуьвуьсди Стела Давыдова
Тержуьме сохди Ильягуева А.
