2-муьн март жэгlмиет дин-догlоти жугьургьой догъи Москов рэхь сохдет э песине рэхь екире эз ведилуье нушудорегоргьой хуьшдере: Юрия Гилядовича Гилядова.
Юрий Гилядович хьэсуьл омори 14-муьн январь 1942-муьн сал э Дербенд э кифлет Гильод Даниловиче ве Лии Шимииевне. Келебебе Юрия Гилядовича, Данил бен Гильод Гилядов, бу мэгlлуьмлуье раби.
Юрий Гилядович варасунде бегьем сохди Москови технологически институт хуреки промышленности э сенигlэт «технологие шоробчилугъ». Гьемме песдеине жофолуье корисохи эну бири бесде оморе э шоробчилугъгьовоз.
Э 1965-муьн сал у фуьрсоре омори э Болгарие эри чуьки диеш зиёдте сохде данани хуьшдере, оммо э 1966-муьн сал – уре огол зери э Дербенд ве дори уре кор инженера-технолога э шоробсовхоз «Геджух» гуьрдноме «Дагвино». Эзуновлейге гье и жогьиле сенигlэткоре гировунди э кор э Дербенди шоробзавуд, эже у кор сохди рэхьберсох молведешендеи.
Э 1970-1980-муьн салгьо Ю.Г. Гилядов – сервор цех коньячни спиртокурение, сервор шороби цех, песде – серворлуье шоробчи Дербенди коньячни комбинат. Э зир рэхьбери эну э Дербенди коньячни комбинат вокурде омори солярий эри тозеденсохи э у вэхдине гуьре, э гуьнжо овурде омори ведешендеи асанте мадера ве марочни шороб «Мадера Догъистуни», э гуьнжо овурде омори, гъуьч сохде омори ве венгесде омори купажни гъобгьо эз парс ние гуьрдение пулат э жирелуье гъэриш сохденигьо устройствагьоревоз, вечире омори жирелуье коллекциегьо шороб ве коньякгьо.
Эз 1980-муьн те 1992-муьн салгьо Юрий Гилядович – жигегир сервор, серворлуье инженер молведешендеи-совхозни гуьрдноме «Дагвино». Э вэхд корисохи эну э гуьрдноме «Дагвино» Суьфдеи гиле э Догъисту бири сергуьрдеи мол ведешендеи шампански, гировунде омори тозеден вокурдеи Кизлярски коньячни завуд ве Дербенди коньячни комбинат, руьхсет доренигьо дуьвойне зиёд сохде гъэдер тоблуье коньячни спиртгьо ве диеш зиёд сохде ведешендеи коньяк те 1 млн. декалитргьо, гировунде омори дуьруьжде тозеден гъуьчсохи гьемме завудгьо суьфдеи шоробчилугъи гуьрдноме «Дагвино» э зиёдсохи мол ведешендеи гъувотлуьигьоре ве корисохи э онгуревоз ве дуьборе кор эз хоме мол. Юрий Гилядович бири желдлуье бэхшвегир э гуьнжолуьи ижире марке коньякгьо, чуьтам «Нарын-Кала», «Махачкала», «Багратион».
Э 1992-1998-муьн салгьо Ю.Г. Гилядов – бинелуье сервор акционерни жэгlмет «Уруссиети шоробгьо» (Москов). Э гье и жиге кор у гъэрор нори пуьрсуьшгьой параменди шоробчилугъи ве онгурбогъдори э жире-бе жирее регионгьой РФ. Ве э 1998-2022-муьн салгьо у бири несиет дорегор э технологически коргьо бинелуье сервор ОАО москови шороби-коньячни завуд «КиН». Э гье и вэхд Юрий Гилядович дори гъэдуьрлуье омонети э параменди шороби-коньячни мол ведешендеи кор хоне. Юрий Гилядович бири бэхшвегир э тозеден гъуьчсохи ве технически тозе сохдеи корхонере, э гуьнжолуьи ве дешендеи тозе маркагьо шороби-коньячни мол: коньякгьо «Московский», «Золотые купола», «Киновский», шоробгьо «Монастырская трапеза».
Юрий Гилядович гьеммишелуьг бэхш бири э дананигьой хуьшдеревоз ве синогъигьоревоз э жогьиле гьемкоркигьоревоз, бири еки эз завуд дэгlэме винирегор э комиссие. У гьисди сэхьиб чор шогьодидореи э коньячни мол ведешендеи ве корисохи э мундеигьоревоз эз шоробчилугъи.
Э келе хьэйфбериревоз, 28-муьн февраль 2026-муьн сал Гилядов Юрий Гилядович рафди эз зиндегуни, гьишде э песой хуьшде келе нишоне: эну овлете коребердегор – гье и гlэилгьо ве невегьо, гьемиге эну гъиметсуьзе омонети э шоробчилугъи ве параменди коньячни корхоне. Ёргири э товун шуьвер, бебе ве хубе одоми э гьеммишелугъи мимунуь э дуьлгьой гъовумгьо, э гьемме ки уре дануьсди!
Нуьвуьсди Ирина Михайлова
Тержуьмесох Ильканаева И.
