21-муьн сентябрь Сергей Меликов гъобул сохде бэхшвегири э вокурдеи корхонере «Эксонор» э Сулейман-Стальски районе.
Гье у лап келе корхоне э СКФО э ведешендеи полимерни тов, пур сохдение те эхир тозе оборудование, э десдин дебиреи э кент Орта-Стал. Э корхоне мибу э гуьнжо овурде эки 200 гьеймогьоине корисохие жиге. Доруние гъэдер пулдореи э вокурдеи корхонере бири омборте 3 млрд монет.
Сергей Меликов дори серворе ве пулдорегоре проекте «Эксонор» Пирмагомеде Балакеримове бэхш э песой бэхшвегири э социальни-экономически параменди Догъисту.
Бэгъдовой виниреи мол ведешендение гъувотлуьи корхонере ве шинох биреи э тозе технологигьоревоз сервор регионе гировунди э е гъэдер мескен корхоне гуьрдлеме э имиди э кор венгесде ведешендение молгьой эн угьоре э сер веровундеи социальни ве инфраструктурни проектгьо.
Нушудорегоргьо корхоне ихдилот сохде э товун параменди полимерни фурухдени Уруссиете ве норе везифегьо э параменди корхонегьо.
Е ченд сади сенигlэткоргьо мидану ведешенде товгьо эз 16 мм те е ченд метргьо эри омборе коргьо э у гъэдер хозяйствой дигьбони, электро-, гlове-, герми-, ве газедореи. Э е гъэдер мескен объекте – омборте 60 гьозор квадратни метргьо.
Бинелуье программе зевербиреи фурухдени полимерни товгьо гьисди товгьо эри гlовдореи ве гlовведебердеи. Угьо гереки эри веровундеи ижире проектгьо, чуьтам «Темизе гlов», «Экология» ве еккейгегьо. Э сер э гье у фурухдени нисе гъэдерлуье тергсохи э Догъистуревоз, эже веровунде оморе келе проектгьо, молгьо гереки э гъуншие регионгьо.
Эзуш бэгъэй бинелуье жиге э дегь мол ведешендение ризгьоревоз, э корхоне э кор венгесде хундениеи бине эн хуьшде, чуьки гьишде вегуьрде зигьисдегоргьой эн районе тозе сэнигlэткори ве минкини зевер сохде гьинорменди корсохгьоре.
