Сернуьш Хьуькуьме Догъистуре Абдулмуслим Абдулмуслимов вохурди э нушудорегоргьоревоз дуьруьжде идорегьоре, комикигьо веровунде хуреклуье молгьоре э республике.
Э у гъобул сохди бэхшвегири рэхьбергьо 10-и идорегьо, э гъэд комикигьо: ООО «Партнер», ООО «Зеленое яблоко», ООО «Тефи», ООО «Люкс Алко», ООО «Платан», Нунекорхоне №1 «Колос», гьемчуьн нунекорхонегьо № 3 ве 4, ООО Фурухдение хуне «Майдан».
Э вохурдеи пуьруьш сохде омори четиние пуьрсуьшгьо ве рафде расирение барасигьо э фурухдение иловле, зофру биреи «пэхьникие жигере» ве жофо дореи корсохгьоре, пуьрсуьшгьо зофру биреи налогови шеле венореире, кироие пуле дореигьо ве екейгегьо. Жирелуье тигьэти доре омори гереклуьи э гуьнжо овурдеи палаше жире хьисобсохире ве мэгIлуьмети э жире «Честный знак», комики эз жерге вегуьрде «пэхьникие тегьере» ве доренигьо ежирелуье минкинигьо эри гьемме бэхшвегиргьо.
Шолуми гуфдиреи кучмиш бирегоргьоре, Абдулмуслим Абдулмуслимов э ёр овурди, чуьки еки э лой хундеи миллетлуье секонеисуьзире гьисди дореи могьлугъе хуреклуье секонеисуьзи. У риз кешири, чуьки хьуькуьм республике мерэгълуь э параменди номуслуье барасилуье бизнесе, комики мидану доре зигьисдегоргьоре хубе хурекгьоре хурекхурире.
«Э дореи хуреклуье секонеисуьзире ишму, чуьтам дуьруьжде овурдегоргьо, гъобул сохденит желдлуье бэхшвегири. Войге сохденум согъбоши гуфдиреи э ишму э песой кор ишму эсер овурде расундеи эри могьлугъ ужуьзе хубе молгьоре. Гьееки э уревоз тогIин сохденим, чуьки гьисди ве четиние рэхьгьо, э сер гъэрорноме комикигьо иму гьееки биё кор сохим», — бирмунди Абдулмуслим Абдулмуслимов.
Э гъэд вохурдеи гьемчуьн пуьруьш сохде омори пуьрсуьш э товун гъиметлуье гъозие э хурек хурекхурире. Премьер-министр бирмунди э нисе гьишдеи зевер биреи гъиметгьоре э вэхд мигIидлуье рузгьо.
Э корисохи пуьруьсохире нушудорегоргьо овурдение компани гуфдири фикиргьой эн хуьшдере эсер хубте биреи налогови шелере, асантбиреи хьуькуьмлуье жирей корисохире ве зиёд фирегъсохи корисохире эки пуллуье овгъотлуьи.
Э товун корисохи тукунгьой «Зеленое яблоко ихдилот сохди сервор эсер парамендифу фурухдение тургьоре «Зеленое яблоко» Хаджимурад Абашилов. Э гофгьой энуревоз, э хотур чуьки вокурде оморе везифе корисохире э песини салгьо тур бирмундени гьуьндуьре бирмунушигьо фурухдеигьоре, э у гъэдер, э фикир энуревоз, гье у бесде оморе э торихевоз параменди туре, парамендиревоз онлайн-фурухдеигьо, зиёдте фирегьсохиревоз вихдеире ве э хуьшде вогосундеи восдорегоргьоре.
«Иму гуьрд сохдейм э идоре гьемме тукунгьоре э еклуьгие системе. Сохденим тигъэти э овурдеи молгьоре догъистуние хоригъуллугъсохие корсохгьоре. Иму бирмундеи тигъэте э суьфдеи нубот э хуби ве е гъэдер вэхд овурде молгьоре. Чуь гуфдире оморе э товун гъиметгьо, гереки варасире, чуьки бинелуье молгьо оморе эз екейгегьо регионгьо ве иму кор сохденим э гъиметгьоревоз, комикигьоре имуре дорени э гъэд игъролгьо овурдегоргьоревоз. Унегуьре, иму хьэрекети венореним фегьмгери сохде ве гуьрде гъиметгьоре, эри чуь нисе бире келе зевербиреи гъиметгьоре, кори сохдеи э восдореие божеренемэгIрифет», — гуфдири Абашилов.
Э везифегьо э 2026-муьн сал – гьеу вокурдеигенесупермаркетгьоре «Зеленое яблоко», зевер биреии гъэзенжгьоре фурухдеигьоре, дошдеи гъиметгьоре.
Э нубот эн хуьшде, сервор нунекорхоне №4, корсох ЖэгIметие идорегьо «Уруссиетие Союзе нунбуьржуьндегоргьо» Далгат Бийбулатов ихдилот сохди э товун коре екире эз дуьруьжде корсохгьой нуне ве гIордие кондитерски молгьоре.
Нунекорхоне желди гьемкоркии сохде э жигее хоригъуллугъсохие корсохгьоревоз, восдоре эз угьо лап хубе тэхуьле. Гье у гьишде неки кумекии доре региональни хозяйствой дигьбонире, оммо ве фегьм сохде хуби молгьоре э гьер е гъэдер вэгIэдо корхонере. Э корхоне жофо кешире эки 180 одоми.
Э корисохи вохурдеи Абдулмуслим Абдулмуслимов гуш дошди гьеммей фикиргьоре, боворини доре, чуьки гьемме фикиргьо миму тигъэтлуь фегьм сохде ве э хьисоб дешенде э сер э кор венгесдеи гъэдергьоре хьуькуьмлуье кумекиире.
Жейлее тигъэти бири доре пуьрсуьше зиёд фирегъсохи фурухдеи молгьоре, герекие жергей овурдеигьо хуреке, чуь, э фикиревоз премьер-министре, гьишде зевер сохде барасилуьи коре сэхьиблугъире.
Нушудорегоргьо оптови идорегьоре имид дори премьер-министре э хьозуьрлугъи эн хуьшдере дошдеи гьеммей талабигьоре жергей гъонунгьоре ве э кор венгесде омборе зиёдгъувотлуьигьоре эри дореи хуреклуье секонеисуьзи республикере.
Угьо согъбоши гуфдиреи сернуьше Хьуькуьме РД Абдулмуслиме Абдулмуслимове э песой вохурдеи, э песой кумекии ве тигъэти эки четинигьо сэхьиблугъи.
Гуфдиригьо э гуьрдлеме пуьрсуьшгьо ве фикиргьо вегуьрде омори э бине артие протоколе.
Премьер-министр республике гъэдэгъэ зери гировунде вохурдеире э ижире веди е гиле э чоримуьн бэхш.
Э вохурдеи гьемчуьн гъобул сохди бэхшвегири вице-премьер республике Ризван Газимагомедов, рэхьбер Комитете эсер онгурчигьи РД Шериф Керимханов, министр промышленности ве фурухдеи Низам Халилов ве екейгегьо.
