У еки эз ижире духдиргьо, э товней коминигьо гуфдиренуьт, чуьки угьо эз Худои.
У хосдени нечогъгьой хуьшдере ве хьэрекети веноре ёгъинлуь э угьо кумеки доре: ве гофевоз, ве коревоз. Ве одомигьо рафденуьт эки эну э нечогъигьой хуьшдеревоз. Эхи рэхьмлуье гоф – гье у еки эз серворлуье дерму э кор хубе духдир. Гьер одоми дануьсдени, комини тилисими жунсогъи корисохи мидануь доре е гоф дуьлдореи, гофсохи духдир. Э чуькле курортни шегьер Пятигорск сарафанни радио лап хуб кор сохде, ве э сенигlэткорлуье эну мэгlлуьм сохде дуь эеки. Виктория Рафаиловна Якубова гьисди эз у духдиргьо, комигьоре муьгьбетлуьнуьт ве верзуьнденуьт неки нечогъгьо, оммо ве гьемкорсохгьо: у лап верзуьшлуье сенигlэткор. Азадлуье вэхд эну лап кеми, оммо эри дофусзереи иму у офди вэхд, гъэрезки э келе гурундиревоз.
— Сергуьрдем эз динлуье пуьрсуьш. Эже ишму хьэсуьл оморейт? Э комини школе тербие вегуьрдейт? Эже гирошди гlэильети ишму?
— Ме хьэсуьл оморем ве келе бирем э Махачкале. Унжо варасунде бегьем сохдем школе №13 э дорундарафдеи хундеиревоз английски зугьун. Эз гьемме очугълуье ёровурдеи гlэильети эн ме бесде оморе э гьеминони вэхд форигъэтии, коминигьоре ме гировундем э Ялте, эже зигьисдет келедеде ве холе эз лой бебе.
— Эзжеи гъумолет деде-бебе ишму, келетегьо ишму? Эз гъонун не ведарафдейт ми э кифлет деде-бебе гlэдотгьо хэлгъ имуре? Гоф сохдейт ми э жугьури.
— Деде-бебей ме гьемиге эз Махачкале. Бебе, Рафаил Яковлевич Ташимов бинегьо комини эз Маджалис ве Буйнакск, деде, Татьяна Михайловна (э духдери Моисеева), — эз Сергокала (Дешлагар) ве Дербенд. Гlэдот ве дин-гlэдотгьо хэлгъ имуре э кифлет деде-бебе дошдейм ве э зугьун дедеи гоф сохдейм. Оммо ме, э хьэйфкеши, не сохденуьм гоф э жугьури, гъэрезки екем варасиренуьм.
— Духдир – гъэдуьрдане ве гье евэхди жугьобдорлуье сенигlэткори. Эйчуь ишму вихдейт гьэгъигъэт уре? Э комини медицини вуз тербие вегуьрдейт? Комини жире сенигlэт рэхькори эн ишму?
— Ме варасунде бегьем сохдем Догъистуни медицини академие э сенигlэткори «лечебное дело». Войге бу мере бире сосудисты хирург. Эз институт бэгъдовой варасдем интернатуре э сенигlэткори «хирургие». Сергуьрдем сенигlэткори хуьшдере э крисохи э отделение хирургие. Э хьэсуьл омореи гlэилгьоре герек бисдо дегиш сохде сенигlэткори хуьшдере, чуьнки кифлет талаб сохде гъувот, тигъэти ве бэхшвегири. Ме гирошдем сенигlэткорлуье хьозуьрлугъи э сенигlэт «ультразвуковая диагностика».
— Нисди сенигlэт комини овурдени кими вэхд унгъэдер нэгъуьллуье хижолети, чуьтам духдири. Э песо мунди терслуье вэхдгьо, коминигьо э назар вегуьрди гьемме дуьньёгьэ — пандемие Ковиде. Гьеммере лап гурунд бу, духдиргьоре диеш гурундте. Чуьтам ишму эз гурундигьо гирошдит э гье у четине вэхд?
— Э ковидни отделение ме кор сохдем. Гъэрезки эз нечогъгьо зэгlифере вегуьрдем. Жире-бе-жирее гьис гирошдем э гье и вэхд: эз терс нечогъ бире ве зэгlфе гирошдеи э кифлетигьо те терс эри зиндегуни. Духдиргьо бири э пушо э гье и терслуье рузгьо.
Оголномей вогордундеи Карине И.:
«Гирошдем фегьмсохи э пушой операцие э шегьер Ставрополь, фегьмсохи э жиге зигьисдеи. УЗИ гирошдем эки Якубова В.Р. Лап хьэз омори мере духдир, эзуш бэгъэй, чуьки лап хубе сенигlэткор, диеш лап дуьлхошие зен, лап жунлуье. Фегьмсохи сергуьрди э вэхд ю, дегмишисуьз. Э гереклуье вэхд ме гене мидануьм руй бире эки гье и духдир, гьемиге э шинохгьой хуьшде несиет доре уре».
— Лап омборе Пятигорчанигьо несиет дори э ишмуревоз меслэхьэт сохде, гуфдирет э товун мэгlлуьмлуье сенигlэткорлуье бирмунушигьо. Ве оголномегьо э интернет гуфдирени гье э товун эну. Э чуь нушудоре кор духдир бинелуь? Чуьтами хосиетевоз у миё бу э суьфдеи нубот?
— Эз гьемме вожиблуье качества – гье и жугьобдорлуьи, инсоньети, хьэрекети эки данани – гереклуьи гьеммише зеверсохи квалификацие хуьшдере. Лап вожиби эри духдир божеренемэгlрифет эки езугъбери. Гъосут духдир – кумеки доре нечогъгьоре дошде енебуге хубте сохде жунсогъире.
Оголномей вогордундеи Анна К.:
«Эки духдир Викторие Рафаиловне ме оморем нехэбереки. Оммо нехэберекиегьо нисди нехэбереки! Хуьшденкордани зенг зерем ве нуьвуьсди мере э комфортни эри ме вэхд. Духдир жундорегор, э приём тапшуьрмиш сохди пуьрсуьшгьо, э пушой УЗИ сохде. Фегьм сохди тигъэти, дори кумекии тэгlрифноме, соводлуье сенигlэткор. Келе согъ боши. Эгенер гене герек мибу УЗИ сохде – энжэгъ эки эну».
Оголномей вогордундеи Владимир Ч.:
«Ме имбуруз бирем э приём э несиет хэгьеревоз. Гирошдем УЗИ дуьл ве шуьгъэм. Духдир варасирение тегьер андуьрмиш сохде гьеммере. Гlэмел миёв пуьрсире, жугьобдоре, соводи дореи. Согъ боши, дуьлхошие хэлгъи духдир!»
— Ихдилот сохит э товун кифлет.
— Ме шуьверлуьни. Мере се гlэилгьо: кук ве дуь духдер. Мере зиёдгуьзелие кифлет ве лап хубе гlэилгьо, коминигьорвоз ме текебуринуьм.
— Бовор сохдени ми духдир э Худо? Комини жиге гуьрде э зиндегуни ишму дин-догlот?
— Э вэхд духдири корисохи ме э еки офдорем э жире-бе-жирее гъозиегьоревоз. Кими вэхд терсдии зиндегуни зевер бири, оммо одоми зигьисди ве хос бири. Небуге чуьтам кумеки Офирегоре гье и не гуфдире. Ме не дануьсденуьм хуьшдере хьисоб сохде лугъондлуье дин-догlоти одоми, оммо хэрекети сохденуьм дошде гlэдотгьо хэлгъ хуьшдере.
— Комини хосиет ишму верзуьнденит э одомигьо?
— Жугьобдорлуьи, дорундуьли, бофо э дузгунлуьи, езугъбери.
— Э чуь ишму винирени мэгlдон гъувот хэлгъ иму?
— Еклуьги, мироси эрхэ, дошдеи гlэдотгьоре ве дин-гlэдотгьоре.
— Комини несиет ишму ми дорит э нушудорегоргьо жогьиле эрхэ, коминигьоре воисдени духдир бире?
— Герек нисди терсире четинигьоре, бурайт эки норе гъосут.
— Келе согъ боши, Виктория Рафаиловна, чуьки ишму офдейт вэхд меслэхьэт сохде э имуревоз ве ихдилот сохде э товун хуьшде э хундегоргьой иму, ве лап дуьруьждлуье разилуьи хуьшдере нушу доре эри гъэдуьрдане жофо ишму!
Нуьвуьсди Стелла Давыдова
Тержуьмесох Ильканаева И.
Сирот: STMEGI
