Гуьрдлеме э комики бэхш вегуьрдебируьт рэхьбергьой эн органгьой хьуькуьм гировунде оморебу э зир рэхьберьети эн Сергей Меликов, эже бирмунде оморебу бинелуье везифегьо эри декабрь. Э гIэрей вожиблуье тарафгьо гуфдире оморебу чуьтам э кор венгесде оморени миллетлуье проектгьо, гьемчуьн хьозуьрлугъи эки гировундеи артгьой эн Сал гъэлхэндчи Ватан.
Э гъуллугъ эн сервор регион гуьре хьуькуьм фегьм мисоху ведомствогьоре ве органгьой эн жигенлуье хуьшден рэхьберисохире э е ченд бирмунушигьо. Э план гуьре денишире оморени чуь фегьм сохде миев риз хэржи сохдеи бюджете, веровундеи гъэрхундигьоре э товун гъэзенжгьо, э кор венгесдеи социальни программегьоре ве гъувотдореи бэхшвегиргьой эн жирелуье гъовхолуье операцие.
Э суьфдеи рузгьой декабрь Сергей Меликов бэхш мивегинуь э гуьрдлеме ве мигировунуь гьермегьине гуьрдлеме э товун вожиблуье пуьрсьшгьо.
Гировунде миев гIэдотлуье гуьрдлемегьо ве гуьрдлемегьой комиссие, угьо гIуьзет сохде оморет э гъэршуй кори сохдеи э рушвохури, э боржбери э терроризмевоз, э лешгер огол зере оморенигьо компаниеревоз ве э расундеи низоме. Пуьруьш сохде миев э кор венгесдеи бюджетни кредитгьоре ве инвестиционни проектгьоре.
Э гIэрей де пуьрсуьшгьо – зуте мэгIлуьм сохдеи ве нисд сохдеи эзуновлейге бире гъозиегьой эн ЧС ве параменд сохдеи агломерациере.
Жирелуье тараф корисохи – гъувот доре лешгерчигьоре ве куьнде одомигьой энугьоре. Э плангьо вохурдеигьо э бэхшвегиргьой эн республикански программе «Игидьети догъгьо» ве э куьнде одомигьой эн пуч биригьо лешгерчигьоревоз.
Гьемчуьн гировунде миев мероприятиегьо эки Руз Игидгьой Ватан ве эки Руз Конституцие эн Уруссиет. Гьемчуьн сервор регион мигировуну вохурдеигьо э одомигьоревоз.
Эзуш бэгъэй э рэхьбер республике ихдилот сохде миев э товун гъобул сохде оморигьо чорегьо эри расундеи секонесуьзире э рузгьой мигIид. Э эхир сал сервор регион гIэилгьоре бэхш миду э гIэрей акцие «Елкей войгегьо».
Гьемчуьн гировунде миев гуьрдлемей меслэхьэт э товун кори сохдеи дуь э екиревоз э региональни отделениеревоз «Жуьмуьсдеи эн суьфдеигьо» ве э региональни политсовет эн партие «Еклуье Уруссиет». Э декабрь гировунде миев гIэдотлуье сессие эн Гуьрдлемей Хэлгъи.
Сал эн Гъэлхэндчи Ватане сэхд мисоху бирмундеи «ВОВекиСВО» э товун игидгьой эн Буьзуьрге довгIой Ватани ве эн жирелуье гъовхолуье операцие эн десдей шекуьлкешгьо «Зинде гъэлемдеш».
Корлуье повестке бегьем сохде миев э раче межлуьсевоз – сервор регион сеч биригьо догъистонигьоре миду хьуькуьметлуье бэхшгьо.
Сергей Меликов гуфдири ки эри догъистонигьо оморенигьо сал эн еклуьги хэлгъгьой Уруссиет мэгIнолуьни ве э ер овурди э товун вожиблуьи хьозуьр сохдеи мероприятиегьоре.
