Сервор регионе Сергей Меликов гировунди дуь э екиревоз гуьрдлеме Республикански оголзереие комиссие ве Оперативни бине регионе.
Бинелуье пуьрсуьш везифе – артгьо васалие оголзереие кампани.
Чуьтам мэгIлуьм сохди лешгерие сервор регионе Абдурахман Мурадханов, э жергей Ерэгъленмиш бирее Гъувотгьо ве екейгегьо лешгергьо бири фуьрсоре 3730 одомигьо. Оголзерегоргьо гъуллугъ сохде э Ерэгъленмиш бирее Гъувотгьо Уруссиете ВДВ ве ВКС, гьемчуьн э лешгергьо миллетлуье гъэреули ве серхьэдчие лешгеригьо ФСБ Уруссиете.
Э гъэд оголзереие кампани сеч биреи дуь э зеки э хубтее лой оголзереие жигегьой Махачкале, Каспийске, Хасавюрте, Буйнакске, Дербенде, Дагестански Огни, Хасавюртовски, Новолакски, Буйнакски, Хунзахски, Кайтагски, Дахадаевски, Дербендски, Ахтынски, Рутульски, Докузпарински, Сулейман-Стальски, Курахски, Тарумовски, Ногайски, Табасарански, Казбековски, Гумбетовски, Лакски, Кулински, Магарамкентски, Сергокалински, Акушински ве Гунибски улкегьо.
Бэшгъэ бири фегьм сохде четинигьо э гуьнжо овурдеиревоз жирелуье десдегьо, комикигьо веди бири э е ченд улкегьо.
Сергей Меликов э пушо нори огол зере эки кор э оголзереие жигегьо пес мундеие улкегьо келетегьоре СВО, ве бэхшвегиргьо программере «Вегири догъгьо» ве идоре «Ёргири догъгьо», э сер герекии – э пушо норе э угьо ёгъинлуье коргьоре.
Эзуш бэгъэй, сервор республике э пушо нори тозеден фегьм сохде жире гировундеи хундение-е ченд тегьергьо гуьрдбиреигьо эри серворгьо улкегьоре ве лешгерие серворгьоре э пушой сергуьрдеи васалие оголзереи эри омборте ёгъинлуье фегьмсохи хьозуьрлугъи эки э пушо дерие кампании.
У согъбоши гуфдиреи муниципалитетгьоре, комикигьо веровунди норе оморе э гъэд васалие оглзереи везиферевоз ве кумекии доре угьоре э песдеине берекетлуье коргьо.
Э бегьем сохдеи рэхьбер регионе бирмундеи тигъэте э вожиблуьи коре э мэгIлуьмети оголзерегоргьоре ве офде жигегьой эн угьоре гьеммише, неки э вэхд оголзереи: «Гьемме серворгьо муниципальни соводигьоре ве лешгерие серворгьо биё бу хьозуьр эхире хьисобе сохде э товун кор хуьшде э гIэрей жофокешие э вэхд гуьре е гъэдер вэгIэдо».
Эзуш бэгъэй, э гуьрдлеме гуфдире омори э товун гировундеи хэберлуье-андуьрмишие коре э оголзереи жовонгьоре э лешгерие училищегьо ве вузгьо.
